ਕਾਬੁਲ (ਰਾਘਵ) : ਤਾਲਿਬਾਨ ਨੇ ਕਾਬੁਲ 'ਚ ਸਥਿਤ ਦੇਸ਼ ਦੇ ਇਕਲੌਤੇ ਆਲੀਸ਼ਾਨ ਹੋਟਲ 'ਤੇ ਵੀ ਕਬਜ਼ਾ ਕਰ ਲਿਆ ਹੈ। 'ਦਿ ਸੇਰੇਨਾ ਹੋਟਲ' ਨੇ ਸ਼ੁੱਕਰਵਾਰ ਨੂੰ ਕਿਹਾ ਕਿ ਉਹ 1 ਫਰਵਰੀ ਤੋਂ ਹੋਟਲ ਦਾ ਸੰਚਾਲਨ ਬੰਦ ਕਰ ਦੇਵੇਗਾ, ਜਿਸ ਤੋਂ ਬਾਅਦ 'ਦਿ ਹੋਟਲ ਸਟੇਟ ਓਨਡ ਕਾਰਪੋਰੇਸ਼ਨ' ਇਸ ਨੂੰ ਸੰਭਾਲ ਲਵੇਗੀ। ਹੋਟਲ ਸਟੇਟ ਓਨਡ ਕਾਰਪੋਰੇਸ਼ਨ ਵਿੱਤ ਮੰਤਰਾਲੇ ਦੇ ਅਧੀਨ ਆਉਂਦੀ ਹੈ। ਵਿੱਤ ਮੰਤਰਾਲੇ ਨੇ ਇਸ ਮਾਮਲੇ 'ਤੇ ਤੁਰੰਤ ਕੋਈ ਟਿੱਪਣੀ ਨਹੀਂ ਕੀਤੀ ਅਤੇ ਨਾ ਹੀ ਸੇਰੇਨਾ ਅਤੇ ਨਾ ਹੀ ਸਰਕਾਰ ਨੇ ਹੋਟਲ ਦੀ ਮਾਲਕੀ 'ਚ ਬਦਲਾਅ ਦੇ ਕਾਰਨਾਂ 'ਤੇ ਕੋਈ ਸਪੱਸ਼ਟੀਕਰਨ ਦਿੱਤਾ ਹੈ। ਤਾਲਿਬਾਨ ਨੇ 2008 'ਚ ਅਤੇ ਫਿਰ 2014 'ਚ ਸੇਰੇਨਾ 'ਤੇ ਹਮਲਾ ਕੀਤਾ ਸੀ। ਕਾਰਜਕਾਰੀ ਗ੍ਰਹਿ ਮੰਤਰੀ ਸਿਰਾਜੁਦੀਨ ਹੱਕਾਨੀ ਨੇ 2008 ਦੇ ਹਮਲੇ ਦੀ ਯੋਜਨਾ ਬਣਾਉਣ ਦੀ ਗੱਲ ਕਬੂਲ ਕੀਤੀ ਸੀ, ਜਿਸ ਵਿਚ ਅਮਰੀਕੀ ਨਾਗਰਿਕ ਥੋਰ ਡੇਵਿਡ ਹੇਸਲਾ ਸਮੇਤ ਅੱਠ ਲੋਕ ਮਾਰੇ ਗਏ ਸਨ।