ਜਲੰਧਰ (ਨੀਰੂ) : ਜਲੰਧਰ ਕੈਂਟ ਤੋਂ ਸਾਬਕਾ ਵਿਧਾਇਕ ਅਤੇ ਆਮ ਆਦਮੀ ਪਾਰਟੀ (ਆਪ) ਦੇ ਆਗੂ ਜਗਬੀਰ ਸਿੰਘ ਬਰਾੜ ਦੇ ਭਾਜਪਾ 'ਚ ਸ਼ਾਮਲ ਹੋਣ ਤੋਂ ਬਾਅਦ ਜਲੰਧਰ ਕੈਂਟ ਸੁਰਖੀਆਂ 'ਚ ਆ ਗਿਆ ਹੈ। ਬਰਾੜ ਅਤੇ ਸਰਬਜੀਤ ਮੱਕੜ ਜੋ ਕਦੇ ਇੱਕ ਦੂਜੇ ਦੇ ਸਿਆਸੀ ਦੁਸ਼ਮਣ ਸਨ, ਅੱਜ ਇੱਕੋ ਸਟੇਜ 'ਤੇ ਇਕੱਠੇ ਬੈਠੇ ਨਜ਼ਰ ਆ ਰਹੇ ਹਨ। ਉਨ੍ਹਾਂ ਦੇ ਨਾਲ ਹੀ ਮੰਚ 'ਤੇ ਭਾਜਪਾ ਦੇ ਸੀਨੀਅਰ ਨੇਤਾ ਅਮਿਤ ਤਨੇਜਾ ਵੀ ਨਜ਼ਰ ਆਏ। ਸਿਆਸੀ ਸੂਤਰਾਂ ਅਨੁਸਾਰ ਇਹ ਤਿੰਨੋਂ ਕੈਂਟ ਹਲਕੇ ਦੀ ਵਾਗਡੋਰ ਸੰਭਾਲਣ ਦੇ ਦਾਅਵੇਦਾਰ ਹਨ।

ਬਰਾੜ ਅਤੇ ਮੱਕੜ ਨੇ 2022 ਦੀਆਂ ਚੋਣਾਂ ਵਿਚ ਇਕ-ਦੂਜੇ ਵਿਰੁੱਧ ਚੋਣ ਲੜੀ ਸੀ। ਉਦੋਂ ਬਰਾੜ ਅਕਾਲੀ ਦਲ ਵਿਚ ਸਨ ਤੇ ਮੱਕੜ ਭਾਜਪਾ ਵਿਚ ਸਨ। ਬਰਾੜ ਨੂੰ 27,387 ਵੋਟਾਂ ਮਿਲੀਆਂ ਸਨ ਜਦਕਿ ਸਰਬਜੀਤ ਮੱਕੜ ਨੂੰ ਸਿਰਫ਼ 15,946 ਵੋਟਾਂ ਹੀ ਮਿਲ ਸਕੀਆਂ ਸਨ। ਕੈਂਟ ਹਲਕੇ ਤੋਂ ਕਾਂਗਰਸ ਦੇ ਪਰਗਟ ਸਿੰਘ ਜੇਤੂ ਰਹੇ ਸਨ। ਉਦੋਂ ਤੋਂ ਉਹ ਮੱਕੜ ਛਾਉਣੀ ਹਲਕੇ ਵਿੱਚ ਕੰਮ ਕਰ ਰਹੇ ਹਨ। ਉਨ੍ਹਾਂ ਤੋਂ ਇਲਾਵਾ ਅਮਿਤ ਤਨੇਜਾ ਜੋ ਭਾਜਪਾ ਹਾਈਕਮਾਂਡ ਦੇ ਬਹੁਤ ਕਰੀਬੀ ਹਨ।

ਉਹ ਵੀ ਇਸੇ ਹਲਕੇ ਵਿੱਚ ਪਾਰਟੀ ਦੀ ਸੇਵਾ ਕਰ ਰਹੇ ਹਨ। ਹੁਣ ਬਰਾੜ ਨੇ ਭਾਜਪਾ 'ਚ ਪ੍ਰਵੇਸ਼ ਕਰ ਲਿਆ ਹੈ, ਜਿਸ ਕਾਰਨ ਸਥਿਤੀ ਹੋਰ ਗੁੰਝਲਦਾਰ ਹੋ ਗਈ ਹੈ। ਫਿਲਹਾਲ ਤਿੰਨੋਂ ਭਾਜਪਾ ਦੇ ਜਲੰਧਰ ਤੋਂ ਉਮੀਦਵਾਰ ਸੁਸ਼ੀਲ ਰਿੰਕੂ ਨੂੰ ਜਿਤਾਉਣ ਲਈ ਯਤਨਸ਼ੀਲ ਹਨ ਪਰ ਚੋਣਾਂ ਤੋਂ ਬਾਅਦ ਇਸ ਹਲਕੇ ਦੇ ਸਿਆਸੀ ਹਾਲਾਤ ਬਦਲ ਸਕਦੇ ਹਨ। ਮੱਕੜ, ਬਰਾੜ ਅਤੇ ਤਨੇਜਾ ਤਿੰਨੋਂ ਹੀ ਇਸ ਹਲਕੇ ਤੋਂ 2027 ਵਿਚ ਟਿਕਟ ਦੇ ਦਾਅਵੇਦਾਰ ਹਨ, ਪਰ ਦੇਖਣਾ ਇਹ ਹੋਵੇਗਾ ਕਿ ਪਾਰਟੀ ਆਉਣ ਵਾਲੇ ਸਮੇਂ ਵਿਚ ਕਿਸ 'ਤੇ ਭਰੋਸਾ ਕਰੇਗੀ।