ਮਿਸੀਸਾਗਾ (ਸਰਬ)- ਮਿਸੀਸਾਗਾ ਵਿੱਚ ਇੱਕ ਚੌਂਕਾਉਣਾ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ ਵਿੱਚ ਇੱਕ ਮਹਿਲਾ ਨੂੰ ਅਗਵਾ ਕਰਕੇ ਉਸ ਨੂੰ ਦੇਹ ਵਪਾਰ ਦੇ ਧੰਦੇ ਵਿੱਚ ਧੱਕਣ ਦੀ ਕੋਸ਼ਿਸ਼ ਕੀਤੀ ਗਈ। ਦਰਹਾਮ ਰੀਜਨਲ ਪੁਲਿਸ ਵੱਲੋਂ ਇਸ ਮਾਮਲੇ ਵਿੱਚ ਦੋ ਵਿਅਕਤੀਆਂ ਨੂੰ ਚਾਰਜ ਕੀਤਾ ਗਿਆ ਹੈ।

ਖਬਰਾਂ ਮੁਤਾਬਕ, 31 ਮਾਰਚ ਦੀ ਰਾਤ ਨੂੰ, ਐਜੈਕਸ ਵਿੱਚ ਕਿੰਗਜ਼ ਕ੍ਰੀਸੈਂਟ ਅਤੇ ਬਰਚਰ ਰੋਡ ਇਲਾਕੇ ਵਿੱਚ, ਪੁਲਿਸ ਨੂੰ ਇੱਕ ਮਹਿਲਾ ਦੇ ਵੈੱਲਨੈੱਸ ਚੈੱਕ ਲਈ ਬੁਲਾਇਆ ਗਿਆ। ਮਹਿਲਾ ਆਪਣੇ ਨਿੱਤ ਪਰਤਣ ਦੇ ਸਮੇਂ ਤੋਂ ਬਹੁਤ ਬਾਅਦ ਵੀ ਘਰ ਨਹੀਂ ਪਹੁੰਚੀ ਸੀ। ਜਾਂਚ ਦੌਰਾਨ ਪਤਾ ਲੱਗਿਆ ਕਿ ਮਹਿਲਾ ਦਿਨ ਵੇਲੇ ਫਰੈਂਚ ਸੋਸ਼ਲ ਮੀਡੀਆ ਐਪ ਯੂਬੋ ਰਾਹੀਂ ਇੱਕ ਮਸ਼ਕੂਕ ਨਾਲ ਗੱਲਬਾਤ ਕਰ ਰਹੀ ਸੀ ਅਤੇ ਉਹ ਦੁਪਹਿਰ ਦੇ ਸਮੇਂ ਮਿਲਣ ਵਾਲੀ ਸੀ ਪਰ ਮਸ਼ਕੂਕ ਉੱਤੇ ਨਿਰਧਾਰਤ ਸਮੇਂ ਤੇ ਨਹੀਂ ਪਹੁੰਚਿਆ। ਸ਼ਾਮ ਨੂੰ, ਜਦੋਂ ਮਹਿਲਾ ਆਪਣੀ ਦੋਸਤ ਨਾਲ ਸੈਰ ਕਰ ਰਹੀ ਸੀ, ਦੋ ਮਸ਼ਕੂਕ ਉਸ ਨੂੰ ਜ਼ਬਰਦਸਤੀ ਇੱਕ ਗੱਡੀ ਵਿੱਚ ਬਿਠਾ ਕੇ ਫਰਾਰ ਹੋ ਗਏ। ਮਹਿਲਾ ਨੇ ਕਿਸੇ ਤਰ੍ਹਾਂ ਆਪਣੀ ਸਹੇਲੀ ਨੂੰ ਟੈਕਸਟ ਭੇਜ ਕੇ ਮਦਦ ਮੰਗੀ ਤੇ ਇਹ ਵੀ ਦੱਸਿਆ ਕਿ ਉਸ ਨੂੰ ਜ਼ਬਰਦਸਤੀ ਦੇਹ ਵਪਾਰ ਵਿੱਚ ਧੱਕਿਆ ਜਾ ਰਿਹਾ ਹੈ। ਪੁਲਿਸ ਨੇ ਮਿਸੀਸਾਗਾ ਦੇ ਇੱਕ ਹੋਟਲ ਵਿੱਚੋਂ ਦੋਵਾਂ ਮਸ਼ਕੂਕਾਂ ਨੂੰ ਹਿਰਾਸਤ ਵਿੱਚ ਲਿਆ ਅਤੇ ਮਹਿਲਾ ਨੂੰ ਸੁਰੱਖਿਅਤ ਥਾਂ ਉੱਤੇ ਪਹੁੰਚਾਇਆ।

ਮਹਿਲਾ ਨੂੰ ਕੋਈ ਸ਼ਾਰੀਰਿਕ ਨੁਕਸਾਨ ਨਹੀਂ ਪਹੁੰਚਾਇਆ ਗਿਆ। ਦੋਵਾਂ ਮਸ਼ਕੂਕਾਂ, ਓਨੀਲ ਫੋਰਡ (19 ਸਾਲਾ, ਓਸ਼ਵਾ ਦੇ) ਅਤੇ ਡੀਸ਼ਾਅਨ ਬ੍ਰਾਊਨ (20 ਸਾਲਾ, ਪਿੱਕਰਿੰਗ ਦੇ) ਨੂੰ ਕਿਡਨੈਪਿੰਗ ਸਬੰਧੀ ਚਾਰਜ ਲਾਏ ਗਏ ਹਨ।