ਪੱਤਰ ਪ੍ਰੇਰਕ : ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਮੰਗਲਵਾਰ ਨੂੰ ਨਾਗੌਰ ਦੇ ਪਰਬਤਸਰ ਵਿਖੇ ਉਸ ਸਮੇਂ ਵਾਲ-ਵਾਲ ਬਚ ਗਏ ਜਦੋਂ ਉਨ੍ਹਾਂ ਦਾ ਕਾਫਲਾ ਚੋਣ ਰੈਲੀ ਲਈ ਜਾ ਰਿਹਾ ਸੀ। 'ਰੱਥ' (ਬੱਸ) ਜਿਸ ਵਿਚ ਉਹ ਸਫ਼ਰ ਕਰ ਰਹੇ ਸਨ, ਉਸ ਸਮੇਂ ਚੰਗਿਆੜੀਆਂ ਨਿਕਲੀਆਂ ਜਦੋਂ ਉਸ ਦਾ ਉਪਰਲਾ ਹਿੱਸਾ ਬਿਜਲੀ ਦੀ ਤਾਰ ਦੇ ਸੰਪਰਕ ਵਿਚ ਆ ਗਿਆ, ਗਨਿਮਤ ਰਹੀ ਕਿ ਇਸ ਹਾਦਸੇ ਵਿੱਚ ਕੋਈ ਅਣਸੁਖਾਵੀਂ ਘਟਨਾ ਨਹੀਂ ਵਾਪਰੀ ਪਰ ਚੰਗਿਆੜੀ ਨਾਲ ਤਾਰ ਟੁੱਟ ਕੇ ਡਿੱਗ ਗਈ। ਚੰਗਿਆੜੀਆਂ ਨਿਕਲਦੀਆਂ ਅਤੇ ਤਾਰਾਂ ਟੁੱਟਦੀਆਂ ਦੇਖ ਕੇ ਰੱਥ ਦੇ ਪਿੱਛੇ ਖੜ੍ਹੇ ਹੋਰ ਵਾਹਨ ਤੁਰੰਤ ਰੁਕ ਗਏ ਅਤੇ ਮੁਲਾਜ਼ਮਾਂ ਵੱਲੋਂ ਬਿਜਲੀ ਕੱਟ ਦਿੱਤੀ ਗਈ।

ਇਸ ਦੌਰਾਨ ਸ਼ਾਹ ਇਕ ਹੋਰ ਗੱਡੀ ਵਿਚ ਪਰਬਤਸਰ ਗਏ ਅਤੇ ਫਿਰ ਰੈਲੀ ਨੂੰ ਸੰਬੋਧਨ ਕੀਤਾ। ਉਹ ਰੱਥ 'ਤੇ ਸਵਾਰ ਹੋ ਕੇ ਪਿੰਡ ਬਿਦਿਆੜ ਤੋਂ ਪਰਬਤਸਰ ਜਾ ਰਹੇ ਸਨ। ਘਟਨਾ ਦੇ ਸਮੇਂ ਉਨ੍ਹਾਂ ਦਾ ਕਾਫਲਾ ਇੱਕ ਗਲੀ ਵਿੱਚੋਂ ਲੰਘ ਰਿਹਾ ਸੀ। ਇਸ ਘਟਨਾ ਦਾ ਇੱਕ ਵੀਡੀਓ ਵੀ ਸਾਹਮਣੇ ਆਈ ਹੈ। ਸ਼ਾਹ ਨੇ ਰਾਜਸਥਾਨ ਵਿੱਚ 25 ਨਵੰਬਰ ਨੂੰ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਲਈ ਪਾਰਟੀ ਉਮੀਦਵਾਰਾਂ ਦੇ ਸਮਰਥਨ ਵਿੱਚ ਨਾਗੌਰ ਵਿੱਚ ਕੁਚਮਨ, ਮਕਰਾਨਾ ਅਤੇ ਪਰਬਤਸਰ ਵਿੱਚ ਤਿੰਨ ਰੈਲੀਆਂ ਨੂੰ ਸੰਬੋਧਨ ਕੀਤਾ।