ਅਮਰਾਵਤੀ (ਰਾਘਵ) : ਆਂਧਰਾ ਪ੍ਰਦੇਸ਼ 'ਚ ਐੱਨ. ਚੰਦਰਬਾਬੂ ਨਾਇਡੂ ਨੂੰ ਐਨਡੀਏ ਵਿਧਾਇਕ ਦਲ ਦਾ ਨੇਤਾ ਚੁਣ ਲਿਆ ਗਿਆ ਹੈ। ਉਹ ਬੁੱਧਵਾਰ ਨੂੰ ਮੁੱਖ ਮੰਤਰੀ ਵਜੋਂ ਸਹੁੰ ਚੁੱਕਣਗੇ। ਇਸ ਸਮਾਰੋਹ 'ਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੀ ਮੌਜੂਦ ਰਹਿਣਗੇ।

ਤੁਹਾਨੂੰ ਦੱਸ ਦੇਈਏ ਕਿ ਆਂਧਰਾ ਪ੍ਰਦੇਸ਼ ਵਿਧਾਨ ਸਭਾ ਵਿੱਚ ਕੁੱਲ 175 ਸੀਟਾਂ ਹਨ। ਚੋਣ ਕਮਿਸ਼ਨ ਮੁਤਾਬਕ ਟੀਡੀਪੀ ਨੇ ਸਭ ਤੋਂ ਵੱਧ 135 ਸੀਟਾਂ ਜਿੱਤੀਆਂ ਹਨ। ਐਨਡੀਏ ਦੇ ਹੋਰ ਸਹਿਯੋਗੀਆਂ ਵਿੱਚੋਂ ਜਨ ਸੈਨਾ ਪਾਰਟੀ ਨੇ 21 ਅਤੇ ਭਾਜਪਾ ਨੇ 8 ਸੀਟਾਂ ਜਿੱਤੀਆਂ ਹਨ। ਇਸ ਤਰ੍ਹਾਂ ਕੁੱਲ 164 ਸੀਟਾਂ ਐਨਡੀਏ ਦੇ ਖਾਤੇ ਵਿੱਚ ਆਈਆਂ। ਸਾਬਕਾ ਮੁੱਖ ਮੰਤਰੀ ਵਾਈ ਐਸ ਜਗਨ ਮੋਹਨ ਰੈੱਡੀ ਦੀ ਪਾਰਟੀ ਵਾਈਐਸਆਰ ਕਾਂਗਰਸ ਸਿਰਫ਼ 11 ਸੀਟਾਂ ’ਤੇ ਹੀ ਸਿਮਟ ਗਈ।

ਅਮਰਾਵਤੀ ਹੁਣ ਆਂਧਰਾ ਪ੍ਰਦੇਸ਼ ਦੀ ਇਕਲੌਤੀ ਰਾਜਧਾਨੀ ਹੋਵੇਗੀ। ਚੰਦਰਬਾਬੂ ਨਾਇਡੂ ਨੇ ਇਹ ਐਲਾਨ ਕੀਤਾ ਹੈ। ਮੁੱਖ ਮੰਤਰੀ ਵਜੋਂ ਸਹੁੰ ਚੁੱਕਣ ਤੋਂ ਇਕ ਦਿਨ ਪਹਿਲਾਂ, ਟੀਡੀਪੀ ਸੁਪਰੀਮੋ ਨੇ ਮੰਗਲਵਾਰ ਨੂੰ ਕਿਹਾ ਕਿ ਅਮਰਾਵਤੀ ਰਾਜ ਦੀ ਇਕਲੌਤੀ ਰਾਜਧਾਨੀ ਹੋਵੇਗੀ। ਟੀਡੀਪੀ, ਭਾਜਪਾ ਅਤੇ ਜਨਸੈਨਾ ਵਿਧਾਇਕਾਂ ਦੀ ਸਾਂਝੀ ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਨਾਇਡੂ ਨੇ ਕਿਹਾ, 'ਸਾਡੀ ਸਰਕਾਰ ਵਿੱਚ ਤਿੰਨ ਰਾਜਧਾਨੀਆਂ ਦੀ ਆੜ ਵਿੱਚ ਕੋਈ ਖੇਡ ਨਹੀਂ ਹੋਵੇਗੀ। ਸਾਡੀ ਰਾਜਧਾਨੀ ਅਮਰਾਵਤੀ ਹੈ, ਅਮਰਾਵਤੀ ਰਾਜਧਾਨੀ ਹੈ।