ਓਟਾਵਾ (ਜਸਪ੍ਰੀਤ) : ਕੈਨੇਡਾ 'ਚ ਗੁਜਰਾਤੀ ਭਾਸ਼ਾ ਹਰਮਨ ਪਿਆਰੀ ਹੋ ਗਈ ਹੈ। ਗੁਜਰਾਤੀ ਕੈਨੇਡਾ ਵਿੱਚ ਭਾਰਤੀ ਪ੍ਰਵਾਸੀਆਂ ਵਿੱਚ ਤੀਜੀ ਸਭ ਤੋਂ ਵੱਧ ਬੋਲੀ ਜਾਣ ਵਾਲੀ ਭਾਸ਼ਾ ਬਣ ਗਈ ਹੈ। ਕੈਨੇਡੀਅਨ ਸਰਕਾਰ ਦੇ ਅੰਕੜਿਆਂ ਅਨੁਸਾਰ, 1980 ਤੋਂ ਲੈ ਕੇ ਹੁਣ ਤੱਕ ਲਗਭਗ 87,900 ਗੁਜਰਾਤੀ ਬੋਲਣ ਵਾਲੇ ਪ੍ਰਵਾਸੀ ਕੈਨੇਡਾ ਵਿੱਚ ਸੈਟਲ ਹੋ ਚੁੱਕੇ ਹਨ, ਜਿਨ੍ਹਾਂ ਵਿੱਚੋਂ ਸਭ ਤੋਂ ਵੱਧ 26 ਪ੍ਰਤੀਸ਼ਤ 2016 ਤੋਂ 2021 ਦਰਮਿਆਨ ਦੇਸ਼ ਵਿੱਚ ਆਏ ਹਨ।

ਉਂਜ ਇੱਥੇ ਸਭ ਤੋਂ ਵੱਧ ਪੰਜਾਬੀ ਬੋਲਣ ਵਾਲੇ ਲੋਕ ਵਸੇ, ਜਿਨ੍ਹਾਂ ਦੀ ਗਿਣਤੀ 75 ਹਜ਼ਾਰ 475 ਦੱਸੀ ਗਈ। ਉਸ ਤੋਂ ਬਾਅਦ ਹਿੰਦੀ ਬੋਲਣ ਵਾਲਿਆਂ ਦੀ ਗਿਣਤੀ 35,170 ਸੀ। ਇਸ ਦੇ ਨਾਲ ਹੀ ਗੁਜਰਾਤੀ ਬੋਲਣ ਵਾਲੇ ਲੋਕ 22,935 ਪ੍ਰਵਾਸੀਆਂ ਦੇ ਨਾਲ ਤੀਜੇ ਸਥਾਨ 'ਤੇ ਰਹੇ, ਜਦਕਿ ਮਲਿਆਲਮ ਬੋਲਣ ਵਾਲੇ 15,440 ਅਤੇ ਬੰਗਾਲੀ ਬੋਲਣ ਵਾਲੇ ਲੋਕ 13,835 ਸਨ। 1991 ਤੋਂ 2000 ਦਰਮਿਆਨ ਕੈਨੇਡਾ ਆਵਾਸ ਕਰਨ ਵਾਲੇ ਗੁਜਰਾਤੀ ਬੋਲਣ ਵਾਲਿਆਂ ਦੀ ਗਿਣਤੀ 13,365 ਸੀ। ਇਹ ਸੰਖਿਆ ਅਗਲੇ ਦਹਾਕੇ ਵਿੱਚ ਵਧ ਕੇ 29,620 ਹੋ ਗਈ ਅਤੇ 2011 ਤੋਂ 2021 ਤੱਕ 37,405 ਹੋ ਗਈ। ਹਾਲਾਂਕਿ, ਕੈਨੇਡੀਅਨ ਇਮੀਗ੍ਰੇਸ਼ਨ ਨਿਯਮਾਂ ਵਿੱਚ ਹਾਲ ਹੀ ਵਿੱਚ ਹੋਈਆਂ ਤਬਦੀਲੀਆਂ ਕਾਰਨ ਲੋਕਾਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਅਹਿਮਦਾਬਾਦ ਦੇ ਇੱਕ ਵੀਜ਼ਾ ਸਲਾਹਕਾਰ ਨੇ ਦੱਸਿਆ ਕਿ ਘਰਾਂ ਦੀ ਘਾਟ, ਨੌਕਰੀਆਂ ਦੀ ਘਾਟ ਅਤੇ ਪੀਆਰ ਲਈ ਸਖ਼ਤ ਨਿਯਮਾਂ ਕਾਰਨ ਗੁਜਰਾਤ ਤੋਂ ਕੈਨੇਡਾ ਲਈ ਵੀਜ਼ਾ ਅਰਜ਼ੀਆਂ ਵਿੱਚ 80% ਦੀ ਕਮੀ ਆਈ ਹੈ। ਕੰਸਲਟੈਂਟ ਨੇ ਕਿਹਾ ਕਿ ਵੀਜ਼ਾ ਮੌਕੇ ਘੱਟ ਹੋਣ ਕਾਰਨ ਵਿਦਿਆਰਥੀਆਂ ਅਤੇ ਪੇਸ਼ੇਵਰਾਂ ਤੋਂ ਪੁੱਛਗਿੱਛ ਵਿੱਚ ਭਾਰੀ ਕਮੀ ਆਈ ਹੈ। ਹੁਣ ਜ਼ਿਆਦਾਤਰ ਅਰਜ਼ੀਆਂ ਉਨ੍ਹਾਂ ਲੋਕਾਂ ਵੱਲੋਂ ਆ ਰਹੀਆਂ ਹਨ ਜਿਨ੍ਹਾਂ ਕੋਲ ਪਹਿਲਾਂ ਹੀ ਕੈਨੇਡਾ ਦੀ ਪੀਆਰ ਹੈ ਅਤੇ ਉਹ ਆਪਣੇ ਪਰਿਵਾਰਕ ਮੈਂਬਰਾਂ ਨੂੰ ਬੁਲਾਉਣਾ ਚਾਹੁੰਦੇ ਹਨ।