ਮੇਓਟ (ਰਾਘਵਾ) : ਹਿੰਦ ਮਹਾਸਾਗਰ 'ਚ ਫਰਾਂਸ ਦੇ ਇਲਾਕੇ ਮੇਓਟ 'ਚ ਚੱਕਰਵਾਤੀ ਤੂਫਾਨ 'ਚੀਡੋ' ਕਾਰਨ 11 ਲੋਕਾਂ ਦੀ ਮੌਤ ਹੋ ਗਈ। ਫਰਾਂਸ ਦੇ ਗ੍ਰਹਿ ਮੰਤਰਾਲੇ ਨੇ ਐਤਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਮੰਤਰਾਲੇ ਨੇ ਕਿਹਾ ਕਿ ਜ਼ਖਮੀਆਂ ਦੀ ਸਹੀ ਗਿਣਤੀ ਅਜੇ ਪਤਾ ਨਹੀਂ ਹੈ ਪਰ ਮਰਨ ਵਾਲਿਆਂ ਦੀ ਗਿਣਤੀ ਵਧਣ ਦਾ ਖਦਸ਼ਾ ਹੈ। ਮੇਓਟ ਦੇ ਇੱਕ ਹਸਪਤਾਲ ਨੇ ਦੱਸਿਆ ਕਿ ਉੱਥੇ ਦਾਖਲ ਨੌਂ ਲੋਕ ਗੰਭੀਰ ਹਾਲਤ ਵਿੱਚ ਹਨ ਅਤੇ 246 ਹੋਰ ਜ਼ਖਮੀ ਹਨ। ਖੰਡੀ ਚੱਕਰਵਾਤ ਦੱਖਣ-ਪੂਰਬੀ ਹਿੰਦ ਮਹਾਸਾਗਰ ਵਿੱਚੋਂ ਲੰਘਿਆ, ਕੋਮੋਰੋਸ ਅਤੇ ਮੈਡਾਗਾਸਕਰ ਨੂੰ ਵੀ ਪ੍ਰਭਾਵਿਤ ਕੀਤਾ। ਅਧਿਕਾਰੀਆਂ ਨੇ ਕਿਹਾ ਕਿ ਮੇਓਟ ਚੱਕਰਵਾਤ ਦੇ ਰਸਤੇ ਵਿੱਚ ਸਿੱਧਾ ਪਿਆ ਅਤੇ ਸ਼ਨੀਵਾਰ ਨੂੰ ਭਾਰੀ ਨੁਕਸਾਨ ਹੋਇਆ। ਮੇਓਟ ਦੇ ਪ੍ਰੀਫੈਕਟ (ਉੱਚ ਅਧਿਕਾਰੀ) ਨੇ ਕਿਹਾ ਕਿ ਇਹ 90 ਸਾਲਾਂ ਵਿੱਚ ਮੇਓਟ ਵਿੱਚ ਆਉਣ ਵਾਲਾ ਸਭ ਤੋਂ ਭਿਆਨਕ ਚੱਕਰਵਾਤ ਸੀ। 'ਚੀਡੋ' ਹੁਣ ਅਫਰੀਕੀ ਮੁੱਖ ਭੂਮੀ ਮੋਜ਼ਾਮਬੀਕ 'ਤੇ ਪਹੁੰਚ ਗਿਆ ਹੈ, ਜਿੱਥੇ ਐਮਰਜੈਂਸੀ ਅਧਿਕਾਰੀਆਂ ਨੂੰ ਡਰ ਹੈ ਕਿ ਦੋ ਉੱਤਰੀ ਸੂਬਿਆਂ ਦੇ 25 ਲੱਖ ਲੋਕ ਪ੍ਰਭਾਵਿਤ ਹੋ ਸਕਦੇ ਹਨ।