ਲਾਓਸ (ਨੇਹਾ): ਨਾਈਜੀਰੀਆ ਦੇ ਸ਼ਹਿਰ ਇਬਾਦਾਨ 'ਚ ਇਕ ਸਕੂਲ ਮੇਲੇ 'ਚ ਮਚੀ ਭਗਦੜ 'ਚ 35 ਬੱਚਿਆਂ ਦੀ ਮੌਤ ਹੋ ਗਈ ਅਤੇ 6 ਹੋਰ ਗੰਭੀਰ ਜ਼ਖਮੀ ਹੋ ਗਏ। ਸਥਾਨਕ ਪੁਲਿਸ ਨੇ ਵੀਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਓਯੋ ਸਟੇਟ ਪੁਲਿਸ ਕਮਾਨ ਦੇ ਬੁਲਾਰੇ, ਅਦੇਵਾਲੇ ਓਸੀਫੇਸੋ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਇਸ ਘਟਨਾ ਨੂੰ ਲੈ ਕੇ ਅੱਠ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਪੁਲਸ ਨੇ ਦੱਸਿਆ ਕਿ ਇਹ ਭਿਆਨਕ ਘਟਨਾ ਬੁੱਧਵਾਰ ਨੂੰ ਨਾਈਜੀਰੀਆ ਦੇ ਤੀਜੇ ਸਭ ਤੋਂ ਵੱਡੇ ਸ਼ਹਿਰ 'ਚ ਵਾਪਰੀ। ਹਿਰਾਸਤ ਵਿੱਚ ਲਏ ਗਏ ਲੋਕਾਂ ਵਿੱਚ ਬਸੋਰੂਨ ਇਸਲਾਮਿਕ ਹਾਈ ਸਕੂਲ ਵਿੱਚ ਸਮਾਗਮ ਦਾ ਮੁੱਖ ਪ੍ਰਾਯੋਜਕ ਵੀ ਸੀ, ਜਿਸਦਾ ਆਯੋਜਨ ਵਿੰਗਜ਼ ਫਾਊਂਡੇਸ਼ਨ ਅਤੇ ਏਗੀਡਿਗਬੋ ਐਫਐਮ ਰੇਡੀਓ ਦੁਆਰਾ ਕੀਤਾ ਗਿਆ ਸੀ।

ਪੁਲਿਸ ਅਧਿਕਾਰੀ ਨੇ ਕਿਹਾ ਕਿ ਰਾਜ ਦੇ ਅਪਰਾਧਿਕ ਜਾਂਚ ਵਿਭਾਗ ਦੀ ਹੋਮੀਸਾਈਡ ਬ੍ਰਾਂਚ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਓਯੋ ਰਾਜ ਦੇ ਗਵਰਨਰ ਸੇਈ ਮਾਕਿੰਡੇ ਨੇ ਬੁੱਧਵਾਰ ਨੂੰ ਸੋਗ ਪ੍ਰਗਟ ਕੀਤਾ। ਗਵਰਨਰ ਸੇਈ ਮਾਕਿੰਡੇ ਨੇ ਕਿਹਾ ਕਿ ਸਾਡੇ ਵਿਚਾਰ ਇਸ ਦੁਖਾਂਤ ਤੋਂ ਪ੍ਰਭਾਵਿਤ ਪਰਿਵਾਰਾਂ ਅਤੇ ਅਜ਼ੀਜ਼ਾਂ ਦੇ ਨਾਲ ਹਨ। ਮ੍ਰਿਤਕਾਂ ਦੀਆਂ ਆਤਮਾਵਾਂ ਨੂੰ ਸ਼ਾਂਤੀ ਮਿਲੇ। ਉਨ੍ਹਾਂ ਕਿਹਾ ਕਿ ਸਾਨੂੰ ਉਨ੍ਹਾਂ ਮਾਤਾ-ਪਿਤਾ ਨਾਲ ਹਮਦਰਦੀ ਹੈ, ਜਿਨ੍ਹਾਂ ਦੀਆਂ ਇਨ੍ਹਾਂ ਮੌਤਾਂ ਕਾਰਨ ਅਚਾਨਕ ਖੁਸ਼ੀ ਸੋਗ ਵਿੱਚ ਬਦਲ ਗਈ ਹੈ।