ਅੰਮ੍ਰਿਤਸਰ (ਨੇਹਾ): ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਦੇ ਮਨੋਵਿਗਿਆਨ ਵਿਭਾਗ ਨੇ ਐਨ.ਜੀ.ਓ. ਹੈਲਪ ਅ ਚਾਈਲਡ ਆਫ ਇੰਡੀਆ ਨਾਲ ਮਿਲ ਕੇ ਅਜਨਾਲਾ ਦੇ ਮਲਿਕਪੁਰ ਪਿੰਡ ਵਿੱਚ ਹੜ੍ਹ ਪੀੜਤ ਬੱਚਿਆਂ ਲਈ ਮਾਨਸਿਕ ਸਿਹਤ ਸਹਾਇਤਾ ਸੈਸ਼ਨ ਦਾ ਆਯੋਜਨ ਕੀਤਾ। ਇਸ ਪਹਿਲਕਦਮੀ ਨੇ ਹਾਲ ਹੀ ਦੇ ਵਿਨਾਸ਼ਕਾਰੀ ਹੜ੍ਹਾਂ ਦੇ ਮਾੜੇ ਪ੍ਰਭਾਵਾਂ ਨਾਲ ਜੂਝ ਰਹੇ ਬੱਚਿਆਂ ਨੂੰ ਮਾਨਸਿਕ ਸਹਾਰਾ ਪ੍ਰਦਾਨ ਕੀਤਾ।

ਵਾਈਸ ਚਾਂਸਲਰ ਪ੍ਰੋਫੈਸਰ ਡਾਕਟਰ ਕਰਮਜੀਤ ਸਿੰਘ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਡਾ. ਬਲਬਿੰਦਰ ਸਿੰਘ, ਸਹਾਇਕ ਪ੍ਰੋਫੈਸਰ, ਦੀ ਅਗਵਾਈ ਹੇਠ ਛੇ ਮਨੋਵਿਗਿਆਨ ਦੇ ਵਿਦਿਆਰਥੀਆਂ ਦੀ ਟੀਮ ਨੇ ਐਨ.ਜੀ.ਓ. ਵੱਲੋਂ ਸਥਾਪਿਤ ਚਾਈਲਡ ਫ੍ਰੈਂਡਲੀ ਸਪੇਸ ਵਿੱਚ ਬੱਚਿਆਂ ਨਾਲ ਸੰਪਰਕ ਕੀਤਾ ਗਿਆ। ਸੈਸ਼ਨ ਦੌਰਾਨ ਬੱਚਿਆਂ ਨੂੰ ਉਨ੍ਹਾਂ ਦੇ ਮਾਨਸਿਕ ਸਦਮਿਆਂ ਨੂੰ ਸਮਝਣ ਅਤੇ ਸੰਭਾਲਣ ਲਈ ਨਿਰਦੇਸ਼ਿਤ ਗਤੀਵਿਧੀਆਂ ਅਤੇ ਪਹਿਲੀ ਮਾਨਸਿਕ ਸਹਾਇਤਾ ਦੇ ਸਿਧਾਂਤਾਂ ਦੀ ਵਰਤੋਂ ਕੀਤੀ ਗਈ। ਡਾ. ਬਲਬਿੰਦਰ ਸਿੰਘ ਨੇ ਕਿਹਾ ਕਿ ਪੰਜਾਬ ਇਸ ਵਕਤ ਹੜਾਂ ਦੀ ਮਾਰ ਝੱਲ ਕੇ ਹਟਿਆ ਹੈ ਜਿਸ ਦਾ ਉਹਨਾਂ ਦੇ ਮਨੋਵਿਗਿਆਨਿਕ ਸੰਸਾਰ ਦੇ ਉੱਪਰ ਬਹੁਤ ਜਿਆਦਾ ਪ੍ਰਭਾਵ ਹੈ ਇਸ ਦਾ ਜਿਆਦਾ ਪ੍ਰਭਾਵ ਖਾਸ ਕਰਕੇ ਬੱਚਿਆਂ ਤੇ ਪਿਆ ਹੈ ਸਾਨੂੰ ਸਭ ਨੂੰ ਉਹਨਾਂ ਦੇ ਪੜਨ ਪੜਾਉਣ ਦੇ ਉਪਰਾਲਿਆਂ ਵਿੱਚ ਰਲ ਕੇ ਮਦਦ ਕਰਨੀ ਚਾਹੀਦੀ ਹੈ।

ਟੀਮ ਨੇ ਦੇਖਿਆ ਕਿ ਸਾਰੇ ਬੱਚਿਆਂ ਵਿੱਚ ਸਦਮੇ ਦੇ ਲੱਛਣ ਸਨ, ਪਰ ਲੜਕੀਆਂ ਵਿੱਚ ਲੜਕਿਆਂ ਦੇ ਮੁਕਾਬਲੇ ਚਿੰਤਾ ਦਾ ਪੱਧਰ ਕੁਝ ਜ਼ਿਆਦਾ ਸੀ। ਸੈਸ਼ਨ ਦੌਰਾਨ ਬੱਚਿਆਂ ਨੇ ਆਪਣੇ ਸੁਪਨਿਆਂ ਨੂੰ ਸਾਂਝਾ ਕੀਤਾ, ਜਿਸ ਵਿੱਚ ਉਨ੍ਹਾਂ ਨੇ ਫੌਜੀ, ਡਾਕਟਰ ਅਤੇ ਆਈ.ਏ.ਐਸ. ਅਫਸਰ ਬਣਨ ਦੀਆਂ ਇੱਛਾਵਾਂ ਜ਼ਾਹਰ ਕੀਤੀਆਂ, ਜੋ ਉਨ੍ਹਾਂ ਦੀ ਮੁਸੀਬਤਾਂ ਦੇ ਬਾਵਜੂਦ ਚੜਦੀ ਕਲਾ ਵਾਲੇ ਹੌਂਸਲੇ ਨੂੰ ਦਰਸਾਉਂਦਾ ਹੈ।

ਡਾ. ਬਲਬਿੰਦਰ ਸਿੰਘ ਨੇ ਕਿਹਾ ਹਰ ਪ੍ਰਭਾਵਿਤ ਬੱਚਿਆਂ ਦੀ ਮਨੋਵਿਗਿਆਨਿਕ ਪੱਧਰ ਤੇ ਮਦਦ ਕਰਕੇ ਜਿੱਥੇ ਇਹਨਾਂ ਬੱਚਿਆਂ ਨੂੰ ਲਾਭ ਪ੍ਰਾਪਤ ਹੋਇਆ ਹੈ ਉਥੇ ਯੂਨੀਵਰਸਿਟੀ ਦੇ ਮਨੋਵਿਗਿਆਨਿਕ ਵਿਭਾਗ ਦੇ ਵਿਦਿਆਰਥੀਆਂ ਨੂੰ ਵੀ ਮਨੋਵਿਗਿਆਨਿਕ ਖੋਜ ਦਾ ਅਨੁਭਵ ਮਿਲਿਆ ਹੈ। ਇਹ ਸਾਡੇ ਵਿਭਾਗ ਦੀ ਸਮਾਜਿਕ ਭਲਾਈ ਲਈ ਮਨੋਵਿਗਿਆਨਕ ਵਿਗਿਆਨ ਦੀ ਵਰਤੋਂ ਦੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ।"

ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਅਤੇ ਹੈਲਪ ਅ ਚਾਈਲਡ ਆਫ ਇੰਡੀਆ ਦੇ ਸਹਿਯੋਗ ਨੇ "ਹੀਲਿੰਗ ਹਾਰਟਸ" ਪ੍ਰੋਗਰਾਮ ਨੂੰ ਪੇਸ਼ੇਵਰ ਮੁਹਾਰਤ ਅਤੇ ਜ਼ਮੀਨੀ ਅਮਲ ਨਾਲ ਜੋੜਿਆ, ਜਿਸ ਨਾਲ ਮਲਿਕਪੁਰ ਦੇ ਹੜ੍ਹ ਪੀੜਤ ਬੱਚਿਆਂ ਲਈ ਇੱਕ ਵਿਆਪਕ ਸਹਾਇਤਾ ਪ੍ਰਣਾਲੀ ਤਿਆਰ ਹੋਈ।