ਕੋਲਕਾਤਾ (ਪਾਇਲ): ਪੱਛਮੀ ਬੰਗਾਲ ਦੇ ਦੁਰਗਾਪੁਰ ਰੇਪ ਮਾਮਲੇ ਨੂੰ ਲੈ ਕੇ ਸੋਮਵਾਰ ਦੇਰ ਰਾਤ ਕੋਲਕਾਤਾ 'ਚ 100 ਤੋਂ ਵੱਧ ਸਮਾਜ ਸੇਵੀਆਂ ਅਤੇ ਨਾਗਰਿਕਾਂ ਨੇ 'ਰੀਕਲੇਮ ਦ ਨਾਈਟ ਅਗੇਨ' ਤਹਿਤ ਪ੍ਰਦਰਸ਼ਨ ਕੀਤਾ। ਇਹ ਪ੍ਰਦਰਸ਼ਨ ਆਰਜੀ ਕਾਰ ਮੈਡੀਕਲ ਕਾਲਜ ਵਿੱਚ ਬਲਾਤਕਾਰ-ਕਤਲ ਤੋਂ ਬਾਅਦ ਬਣੀ ਅਭੈ ਮੰਚ ਨਾਮਕ ਜਥੇਬੰਦੀ ਵੱਲੋਂ ਕੀਤਾ ਗਿਆ ਸੀ।

ਇਸ ਪ੍ਰਦਰਸ਼ਨ ਵਿੱਚ ਜ਼ਿਆਦਾਤਰ ਔਰਤਾਂ ਸਨ, ਲੋਕਾਂ ਨੇ 'ਵੀ ਸ਼ਾਲ ਓਵਰਕਮ', 'ਇੰਤਜ਼ਾਰ ਹੈ' ਅਤੇ 'ਆਰ ਕਬੇ' (ਇਹ ਸਭ ਕਦੋਂ ਖਤਮ ਹੋਵੇਗਾ) ਵਰਗੇ ਗੀਤ ਗਾਏ ਅਤੇ ਔਰਤਾਂ ਦੀ ਸੁਰੱਖਿਆ ਦੀ ਮੰਗ ਕੀਤੀ। ਪ੍ਰਦਰਸ਼ਨਕਾਰੀ 8ਬੀ ਬੱਸ ਸਟੈਂਡ (ਜਾਦਵਪੁਰ) ਵਿਖੇ ਇਕੱਠੇ ਹੋਏ ਅਤੇ ਦੋਸ਼ੀਆਂ ਨੂੰ ਸਖ਼ਤ ਤੋਂ ਸਖ਼ਤ ਸਜ਼ਾ ਦੇਣ ਦੀ ਮੰਗ ਕੀਤੀ |

ਅਭਿਆ ਮੰਚ ਦੀ ਮਹਿਲਾ-ਟਰਾਂਸ-ਕਵੀਅਰ ਯੂਨਾਈਟਿਡ ਵਿੰਗ ਦੀ ਬੁਲਾਰਾ ਲੇਖਿਕਾ ਸਤਾਬਦੀ ਦਾਸ ਨੇ ਕਿਹਾ ਕਿ ਅਸੀਂ ਅਗਸਤ ਵਿੱਚ ਆਰਜੀ ਕਾਰ ਦੀ ਭੈਣ ਲਈ ਇਨਸਾਫ਼ ਦੀ ਮੰਗ ਕੀਤੀ ਸੀ, ਪਰ ਕੁਝ ਨਹੀਂ ਬਦਲਿਆ। ਔਰਤਾਂ ਅਜੇ ਵੀ ਅਸੁਰੱਖਿਅਤ ਹਨ - ਭਾਵੇਂ ਮੈਡੀਕਲ ਕਾਲਜ ਦੇ ਅੰਦਰ ਜਾਂ ਬਾਹਰ। ਪ੍ਰਦਰਸ਼ਨਕਾਰੀਆਂ ਨੇ ਮੁੱਖ ਮੰਤਰੀ ਮਮਤਾ ਬੈਨਰਜੀ ਦੀ ਉਸ ਟਿੱਪਣੀ ਦੀ ਵੀ ਆਲੋਚਨਾ ਕੀਤੀ ਜਿਸ ਵਿੱਚ ਉਨ੍ਹਾਂ ਨੇ ਵਿਦਿਆਰਥਣਾਂ ਨੂੰ ਰਾਤ ਨੂੰ ਬਾਹਰ ਨਾ ਜਾਣ ਦੀ ਸਲਾਹ ਦਿੱਤੀ ਸੀ। ਉਨ੍ਹਾਂ ਨੇ ਇਸ ਗੱਲ 'ਤੇ ਨਾਰਾਜ਼ਗੀ ਜ਼ਾਹਰ ਕੀਤੀ ਕਿ ਮਮਤਾ ਬੈਨਰਜੀ ਅਜੇ ਤੱਕ ਹਸਪਤਾਲ 'ਚ ਪੀੜਤਾ ਜਾਂ ਉਸ ਦੇ ਪਰਿਵਾਰ ਨੂੰ ਨਹੀਂ ਮਿਲੀ ਹੈ।

ਇਸ ਦੌਰਾਨ ਦੁਰਗਾਪੁਰ 'ਚ ਵਿਦਿਆਰਥਣ ਨਾਲ ਜਬਰ ਜਨਾਹ ਦੇ ਮਾਮਲੇ 'ਚ ਇਨਸਾਫ਼ ਦੀ ਵਧਦੀ ਮੰਗ ਦਰਮਿਆਨ ਪੁਲਿਸ ਨੇ ਵੱਡੀ ਕਾਰਵਾਈ ਕੀਤੀ ਹੈ। ਇਸ ਤਹਿਤ ਪੁਲਸ ਨੇ ਪੀੜਤਾ ਦੇ ਦੋਸਤ ਨੂੰ ਗ੍ਰਿਫਤਾਰ ਕਰ ਲਿਆ ਹੈ। ਇਸ ਮਾਮਲੇ ਵਿੱਚ ਇਹ ਹੁਣ ਤੱਕ ਦੀ ਛੇਵੀਂ ਗ੍ਰਿਫ਼ਤਾਰੀ ਹੈ। ਆਸਨਸੋਲ-ਦੁਰਗਾਪੁਰ ਪੁਲਸ ਕਮਿਸ਼ਨਰੇਟ ਮੁਤਾਬਕ ਦੋਸ਼ੀ ਦੀ ਭੂਮਿਕਾ ਸ਼ੱਕੀ ਪਾਈ ਗਈ, ਜਿਸ ਕਾਰਨ ਉਸ ਨੂੰ ਹਿਰਾਸਤ 'ਚ ਲਿਆ ਗਿਆ। ਪੁਲਿਸ ਮੁਤਾਬਕ ਸੀਸੀਟੀਵੀ ਫੁਟੇਜ 'ਚ ਦੋਸ਼ੀ ਨੂੰ ਪੀੜਤਾ ਦੇ ਨਾਲ ਸ਼ਾਮ 7:58 'ਤੇ ਕਾਲਜ ਤੋਂ ਬਾਹਰ ਨਿਕਲਦੇ ਅਤੇ 8:42 'ਤੇ ਇਕੱਲੇ ਵਾਪਸ ਆਉਂਦੇ ਦੇਖਿਆ ਗਿਆ।

ਪੀੜਤਾ ਦੇ ਪਿਤਾ ਨੇ ਪਹਿਲਾਂ ਹੀ ਦੋਸ਼ ਲਗਾਇਆ ਸੀ ਕਿ ਉਸ ਦੀ ਧੀ ਦਾ ਦੋਸਤ ਕਿਸੇ ਨਾ ਕਿਸੇ ਤਰੀਕੇ ਨਾਲ ਇਸ ਅਪਰਾਧ ਵਿੱਚ ਸ਼ਾਮਲ ਹੋ ਸਕਦਾ ਹੈ। ਉਸ ਨੇ ਕਿਹਾ ਸੀ ਕਿ ਮੈਨੂੰ ਯਕੀਨ ਹੈ ਕਿ ਇਹ ਸਭ ਪਹਿਲਾਂ ਤੋਂ ਯੋਜਨਾਬੱਧ ਕੀਤਾ ਗਿਆ ਸੀ। ਉਸ ਦਾ ਦੋਸਤ ਇਸ ਸਾਜ਼ਿਸ਼ ਦਾ ਹਿੱਸਾ ਹੋ ਸਕਦਾ ਹੈ।