ਨਵੀਂ ਦਿੱਲੀ (ਪਾਇਲ) : ਅਦਾਕਾਰਾ ਦੀਪਿਕਾ ਪਾਦੂਕੋਣ ਅਤੇ ਰਣਵੀਰ ਸਿੰਘ ਬਹੁਤ ਜਲਦ ਦਿਓਲ ਪਰਿਵਾਰ ਦੇ ਰਿਸ਼ਤੇਦਾਰ ਬਣਨ ਵਾਲੇ ਹਨ। ਜਾਣਕਾਰੀ ਮੁਤਾਬਕ ਦੀਪਿਕਾ ਦੀ ਭੈਣ ਅਨੀਸ਼ਾ ਪਾਦੁਕੋਣ ਸੰਨੀ ਦਿਓਲ ਦੀ ਨੂੰਹ ਦ੍ਰੀਸ਼ਾ ਆਚਾਰੀਆ ਦੇ ਭਰਾ ਰੋਹਨ ਆਚਾਰੀਆ ਨੂੰ ਡੇਟ ਕਰ ਰਹੀ ਹੈ। ਦੋਵਾਂ ਦੀ ਸਗਾਈ ਹੋਣ ਦਾ ਦਾਅਵਾ ਕੀਤਾ ਜਾ ਰਿਹਾ ਹੈ।

ਦੱਸ ਦਇਏ ਕਿ ਅਨੀਸ਼ਾ ਅਤੇ ਰੋਹਨ ਲੰਬੇ ਸਮੇਂ ਤੋਂ ਇੱਕ ਦੂਜੇ ਨੂੰ ਡੇਟ ਕਰ ਰਹੇ ਹਨ। ਹੁਣ ਅਨੀਸ਼ਾ ਲੰਬੇ ਸਮੇਂ ਦੇ ਬੁਆਏਫ੍ਰੈਂਡ ਰੋਹਨ ਨਾਲ ਵਿਆਹ ਕਰਨ ਜਾ ਰਹੀ ਹੈ। ਰੋਹਨ ਦੁਬਈ ਦਾ ਇੱਕ ਕਾਰੋਬਾਰੀ ਹੈ। ਉਹ ਸੰਨੀ ਦਿਓਲ ਦੇ ਵੱਡੇ ਬੇਟੇ ਕਰਨ ਦਿਓਲ ਦਾ ਜੀਜਾ ਲੱਗਦਾ ਹੈ। ਇਸ ਤਰ੍ਹਾਂ ਰੋਹਨ ਅਤੇ ਅਨੀਸ਼ਾ ਦੇ ਕਾਰਨ ਪਾਦੂਕੋਣ ਅਤੇ ਦਿਓਲ ਪਰਿਵਾਰਕ ਰਿਸ਼ਤੇਦਾਰ ਬਣ ਜਾਣਗੇ।

ਕਿਹਾ ਜਾ ਰਿਹਾ ਹੈ ਕਿ ਅਨੀਸ਼ਾ ਅਤੇ ਰੋਹਨ ਦੇ ਰਿਸ਼ਤੇ 'ਚ ਜੀਜਾ ਰਣਵੀਰ ਸਿੰਘ ਨੇ ਵੱਡੀ ਭੂਮਿਕਾ ਨਿਭਾਈ ਹੈ। ਰਣਵੀਰ ਦੇ ਮਾਤਾ-ਪਿਤਾ ਅਤੇ ਰੋਹਨ ਦੇ ਪਿਤਾ ਸੁਮਿਤ ਆਚਾਰੀਆ ਚੰਗੇ ਦੋਸਤ ਹਨ। ਇਸ ਤਰ੍ਹਾਂ ਅਨੀਸ਼ਾ ਅਤੇ ਰੋਹਨ ਇਕ ਪਰਿਵਾਰਕ ਸਮਾਗਮ 'ਚ ਇਕ-ਦੂਜੇ ਨੂੰ ਮਿਲੇ ਅਤੇ ਫਿਰ ਹੌਲੀ-ਹੌਲੀ ਨੇੜੇ ਆ ਗਏ।

ਅਨੀਸ਼ਾ ਦੇ ਵਰਕ ਫਰੰਟ ਦੀ ਗੱਲ ਕਰੀਏ ਤਾਂ ਉਸਨੇ ਆਪਣੇ ਪਿਤਾ ਦੇ ਨਕਸ਼ੇ ਕਦਮਾਂ 'ਤੇ ਚੱਲਦਿਆਂ ਖੇਡਾਂ ਦੀ ਦੁਨੀਆ ਵਿੱਚ ਆਪਣਾ ਕਰੀਅਰ ਬਣਾਇਆ। ਉਹ ਇੱਕ ਪੇਸ਼ੇਵਰ ਗੋਲਫ ਖਿਡਾਰੀ ਹੈ। ਇਸ ਤੋਂ ਇਲਾਵਾ ਉਸ ਨੂੰ ਕਾਰੋਬਾਰ ਵਿਚ ਵੀ ਕਾਫੀ ਦਿਲਚਸਪੀ ਹੈ। ਉਸਨੇ ਹਾਰਵਰਡ ਬਿਜ਼ਨਸ ਸਕੂਲ ਵਿੱਚ ਪੜ੍ਹਾਈ ਕੀਤੀ।

ਹੁਣ ਉਹ ਭੈਣ ਦੀਪਿਕਾ ਦੀ ਫਾਊਂਡੇਸ਼ਨ ਦਿ ਲਾਈਵ ਲਵ ਲਾਫ ਦੀ ਸੀਈਓ ਹੈ। ਇਸ ਦੌਰਾਨ, ਅਨੀਸ਼ਾ ਦਾ ਹੋਣ ਵਾਲਾ ਪਤੀ ਰੋਹਨ ਦੁਬਈ ਵਿੱਚ ਆਪਣੇ ਪਿਤਾ ਦਾ ਕਾਰੋਬਾਰ ਸੰਭਾਲਦਾ ਹੈ।