ਕੋਲੰਬੋ (ਪਾਇਲ): ਚੱਕਰਵਾਤੀ ਤੂਫਾਨ ਪ੍ਰਭਾਵਿਤ ਸ਼੍ਰੀਲੰਕਾ ਵਿਚ ਭਾਰਤ ਵਲੋਂ ਸਥਾਪਿਤ ਫੀਲਡ ਹਸਪਤਾਲ ਨੇ ਆਪਣਾ ਮਿਸ਼ਨ ਸਫਲਤਾਪੂਰਵਕ ਪੂਰਾ ਕਰਨ ਤੋਂ ਬਾਅਦ ਆਪਣਾ ਕੰਮਕਾਜ ਬੰਦ ਕਰ ਦਿੱਤਾ ਹੈ। ਇੱਥੇ ਸਥਿਤ ਭਾਰਤੀ ਹਾਈ ਕਮਿਸ਼ਨ ਨੇ ਇਹ ਜਾਣਕਾਰੀ ਦਿੱਤੀ। ਮਿਸ਼ਨ ਵੱਲੋਂ ਐਤਵਾਰ ਨੂੰ ਜਾਰੀ ਪ੍ਰੈਸ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਓਪਰੇਸ਼ਨ ਸਾਗਰ ਬੰਧੂ ਦੇ ਤਹਿਤ, ਭਾਰਤੀ ਫੌਜ ਦੀ ਸ਼ਤਰੂਜੀਤ ਬ੍ਰਿਗੇਡ ਦੀ 78 ਮੈਂਬਰੀ ਏਕੀਕ੍ਰਿਤ ਟਾਸਕ ਫੋਰਸ ਦੇ ਨਾਲ ਇੱਕ ਪੂਰੇ ਪੈਰਾ ਫੀਲਡ ਹਸਪਤਾਲ ਨੂੰ 2 ਦਸੰਬਰ ਨੂੰ ਸ਼੍ਰੀਲੰਕਾ ਲਈ ਏਅਰਲਿਫਟ ਕੀਤਾ ਗਿਆ ਸੀ ਅਤੇ ਕੈਂਡੀ ਦੇ ਨਜ਼ਦੀਕ ਮਹਿਯਾਂਗਨਾਯਾ ਵਿੱਚ ਤਾਇਨਾਤ ਕੀਤਾ ਗਿਆ ਤਾਂ ਕਿ ਤੁਰੰਤ ਡਾਕਟਰੀ ਜ਼ਰੂਰਤਾਂ ਨੂੰ ਪੂਰਾ ਕੀਤਾ ਜਾ ਸਕੇ।

ਇਸ ਵਿੱਚ ਕਿਹਾ ਗਿਆ ਹੈ ਕਿ ਸੁਵਿਧਾ ਵਿੱਚ ਰੋਜ਼ਾਨਾ ਲਗਭਗ 1,000 ਤੋਂ 1,200 ਮਰੀਜ਼ਾਂ ਦੀ ਦੇਖਭਾਲ ਕੀਤੀ ਜਾਂਦੀ ਹੈ ਅਤੇ ਹਸਪਤਾਲ ਟਰੌਮਾ ਪ੍ਰਬੰਧਨ ਸਰਜਰੀਆਂ ਸਮੇਤ ਗੰਭੀਰ ਜੀਵਨ ਬਚਾਉਣ ਵਾਲੀ ਡਾਕਟਰੀ ਦੇਖਭਾਲ ਪ੍ਰਦਾਨ ਕਰ ਰਿਹਾ ਹੈ। ਜਾਣਕਾਰੀ ਅਨੁਸਾਰ, ਆਪਣੇ ਆਪਰੇਸ਼ਨਾਂ ਦੇ ਦੌਰਾਨ ਹਸਪਤਾਲ ਨੇ ਸ਼ਾਨਦਾਰ ਨਤੀਜੇ ਪ੍ਰਾਪਤ ਕੀਤੇ, ਕੁੱਲ 7,176 ਮਰੀਜ਼ਾਂ ਦਾ ਇਲਾਜ ਕੀਤਾ, 513 ਛੋਟੀਆਂ ਸਰਜਰੀਆਂ ਕੀਤੀਆਂ ਅਤੇ 14 ਵੱਡੀਆਂ ਸਰਜਰੀਆਂ ਕੀਤੀਆਂ ਗਈਆਂ ਸਨ। ਸਭ ਤੋਂ ਬੁਰੀ ਤਰ੍ਹਾਂ ਪ੍ਰਭਾਵਿਤ ਖੇਤਰਾਂ ਵਿੱਚੋਂ ਇੱਕ ਵਿੱਚ ਮਰੀਜ਼ਾਂ ਨੂੰ ਰਾਹਤ ਅਤੇ ਆਰਾਮ ਪ੍ਰਦਾਨ ਕੀਤਾ ਗਿਆ ਸੀ। ਦੂਤਾਵਾਸ ਨੇ ਦੱਸਿਆ ਕਿ ਮਿਸ਼ਨ ਦੇ ਸਫਲਤਾਪੂਰਵਕ ਸੰਪੂਰਨ ਹੋਣ ਤੋਂ ਬਾਅਦ, ਫੀਲਡ ਹਸਪਤਾਲ ਨੇ ਮਹਿਯਾਂਗਨਾਯਾ ਵਿਖੇ ਆਪਣਾ ਸੰਚਾਲਨ ਖਤਮ ਕਰ ਦਿੱਤਾ ਅਤੇ ਟੀਮ ਐਤਵਾਰ ਨੂੰ ਭਾਰਤ ਵਾਪਸ ਆ ਗਈ।