by nripost
ਮਿਸਰ (ਪਾਇਲ) : ਮਿਸਰ ਦੇ ਬੀਚ 'ਤੇ ਫੋਟੋਸ਼ੂਟ ਦੌਰਾਨ ਚੀਨੀ ਸੈਲਾਨੀ ਮਾਡਲ ਨਾਲ ਵਾਪਰਿਆ ਹਾਦਸਾ ਸੋਸ਼ਲ ਮੀਡੀਆ 'ਤੇ ਲੋਕਾਂ ਦੇ ਸਾਹ ਰੋਕ ਰਿਹਾ ਹੈ। ਇਕ ਖਤਰਨਾਕ ਚੱਟਾਨ 'ਤੇ ਖੜ੍ਹੀ ਹੋਈ ਮਾਡਲ ਨੂੰ ਅਚਾਨਕ ਪਿੱਛੇ ਤੋਂ ਉੱਠੀ ਇਕ ਵੱਡੀ ਲਹਿਰ ਨੇ ਆਪਣੀ ਚਪੇਟ 'ਚ ਲੈ ਲਿਆ। ਇਹ ਪੂਰੀ ਘਟਨਾ ਕੈਮਰੇ 'ਚ ਕੈਦ ਹੋ ਗਈ ਅਤੇ ਹੁਣ ਇਹ ਵੀਡੀਓ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ।
ਜਾਣਕਾਰੀ ਅਨੁਸਾਰ ਇਹ ਘਟਨਾ ਮਾਰਸਾ ਮਟਰੋਹ ਸਥਿਤ ਮਸ਼ਹੂਰ ਸੈਰ-ਸਪਾਟਾ ਸਥਾਨ ਮਟਰੋਹ-1 'ਤੇ ਵਾਪਰੀ, ਜਿੱਥੇ ਖੂਬਸੂਰਤ ਚੱਟਾਨਾਂ ਅਤੇ ਉੱਡਦੀਆਂ ਲਹਿਰਾਂ ਨੂੰ ਦੇਖਣ ਲਈ ਸੈਲਾਨੀ ਵੱਡੀ ਗਿਣਤੀ 'ਚ ਆਉਂਦੇ ਹਨ। ਇਹ ਦੱਸਿਆ ਗਿਆ ਕਿ ਇਸ ਖੇਤਰ ਵਿੱਚ ਲਹਿਰਾਂ ਬਹੁਤ ਹੀ ਅਣਪਛਾਤੀਆਂ ਹਨ ਅਤੇ ਚੱਟਾਨਾਂ ਦੇ ਨੇੜੇ ਖੜ੍ਹੇ ਲੋਕਾਂ ਲਈ ਬਹੁਤ ਖਤਰਨਾਕ ਹੋ ਸਕਦੀਆਂ ਹਨ।
ਵਾਇਰਲ ਵੀਡੀਓ 'ਚ ਦੇਖਿਆ ਜਾ ਸਕਦਾ ਹੈ ਕਿ ਸੰਤਰੀ ਰੰਗ ਦੀ ਡਰੈੱਸ ਪਹਿਨੀ ਮਾਡਲ ਸਮੁੰਦਰੀ ਚੱਟਾਨਾਂ ਦੇ ਵਿਚਕਾਰ ਇਕ ਤੰਗ ਪਾਸ 'ਤੇ ਪੋਜ਼ ਦੇ ਰਹੀ ਸੀ। ਫਿਰ ਅਚਾਨਕ ਇੱਕ ਤੇਜ਼ ਲਹਿਰ ਦੱਰੇ ਵਿੱਚ ਦਾਖਲ ਹੋ ਜਾਂਦੀ ਹੈ ਅਤੇ ਮਾਡਲ ਸੰਤੁਲਨ ਗੁਆ ਬੈਠਦੀ ਹੈ ਤੇ ਹੇਠਾਂ ਸਮੁੰਦਰ ਵਿੱਚ ਡਿੱਗ ਜਾਂਦੀ ਹੈ। ਲਹਿਰਾਂ ਦੇ ਜ਼ੋਰ ਕਾਰਨ ਉਹ ਚੱਟਾਨਾਂ ਨਾਲ ਟਕਰਾ ਗਈ, ਜਿਸ ਕਾਰਨ ਉਸ ਦੇ ਸਰੀਰ 'ਤੇ ਗੰਭੀਰ ਝਰੀਟਾਂ ਅਤੇ ਸੱਟਾਂ ਲੱਗੀਆਂ। ਹਾਲਾਂਕਿ ਇਸ ਹਾਦਸੇ 'ਚ ਮਾਡਲ ਦੀ ਜਾਨ ਬਚ ਗਈ।
ਔਰਤ ਨੇ ਦੱਸਿਆ ਕਿ ਉਹ ਕਿਸੇ ਤਰ੍ਹਾਂ ਨੇੜੇ ਦੀ ਸੁਰੱਖਿਆ ਰੱਸੀ ਨੂੰ ਫੜ ਕੇ ਕਿਨਾਰੇ ਤੱਕ ਪਹੁੰਚਣ 'ਚ ਕਾਮਯਾਬ ਰਹੀ। ਸੋਸ਼ਲ ਮੀਡੀਆ ਯੂਜ਼ਰਸ ਦਾ ਦਾਅਵਾ ਹੈ ਕਿ ਇਹ ਜਾਨ ਬਚਾਉਣ ਵਾਲੀ ਰੱਸੀ ਹਾਲ ਹੀ 'ਚ ਉੱਥੇ ਲਗਾਈ ਗਈ ਸੀ, ਜਿਸ ਨਾਲ ਉਸ ਦੀ ਜਾਨ ਬਚ ਗਈ। ਹਾਦਸੇ ਤੋਂ ਬਾਅਦ ਔਰਤ ਨੇ ਕਿਹਾ ਕਿ ਉਹ ਆਪਣੇ ਆਪ ਨੂੰ ਖੁਸ਼ਕਿਸਮਤ ਸਮਝਦੀ ਹੈ ਅਤੇ ਭਵਿੱਖ ਵਿੱਚ ਯਾਤਰਾ ਕਰਦੇ ਸਮੇਂ ਹੋਰ ਸਾਵਧਾਨ ਰਹਿਣ ਦਾ ਸੰਕਲਪ ਲਿਆ ਹੈ।
ਦੱਸ ਦਇਏ ਕਿ ਇਹ ਘਟਨਾ ਇਕ ਵਾਰ ਫਿਰ ਤੋਂ ਸਾਨੂੰ ਅਜਿਹੀਆਂ ਘਟਨਾਵਾਂ ਦੀ ਵੱਧਦੀ ਗਿਣਤੀ ਦੀ ਯਾਦ ਦਿਵਾਉਂਦੀ ਹੈ ਜਿੱਥੇ ਖੂਬਸੂਰਤ ਪਰ ਖਤਰਨਾਕ ਥਾਵਾਂ 'ਤੇ ਫੋਟੋ ਖਿਚਵਾਉਣ ਦੀ ਇੱਛਾ ਲੋਕਾਂ ਦੀਆਂ ਜਾਨਾਂ ਲੈ ਰਹੀ ਹੈ। ਮਾਹਿਰਾਂ ਨੇ ਸੈਲਾਨੀਆਂ ਨੂੰ ਅਜਿਹੀਆਂ ਥਾਵਾਂ 'ਤੇ ਵਿਸ਼ੇਸ਼ ਸਾਵਧਾਨੀ ਵਰਤਣ ਦੀ ਅਪੀਲ ਕੀਤੀ ਹੈ।
More News
