ਟੋਰਾਂਟੋ (ਪਾਇਲ): ਤੁਹਾਨੂੰ ਦੱਸ ਦਇਏ ਕਿ 65 ਕੈਨੇਡੀਅਨ ਸੰਸਦ ਮੈਂਬਰ ਚੀਨੀ ਕਮਿਊਨਿਸਟ ਪਾਰਟੀ (ਸੀਸੀਪੀ) ਦੇ ਫਾਲੂਨ ਗੌਂਗ ਅਭਿਆਸੀਆਂ ਉੱਤੇ ਕੀਤੇ ਜਾ ਰਹੇ ਦਮਨ ਖ਼ਿਲਾਫ਼ ਸਖ਼ਤ ਸਟੈਂਡ ਲੈਣ ਲਈ ਇਕੱਠੇ ਹੋਏ ਹਨ। ਸੰਸਦ ਮੈਂਬਰਾਂ ਨੇ ਮੰਗ ਕੀਤੀ ਹੈ ਕਿ ਬੀਜਿੰਗ ਨਾ ਸਿਰਫ ਚੀਨ ਵਿੱਚ, ਸਗੋਂ ਵਿਦੇਸ਼ਾਂ ਵਿੱਚ ਵੀ, ਫਲੂਨ ਗੌਂਗ ਦੇ ਖਿਲਾਫ ਸੀਮਾ ਪਾਰ ਦੇ ਦਮਨ ਦੀ ਆਪਣੀ ਚੱਲ ਰਹੀ ਨੀਤੀ ਨੂੰ ਤੁਰੰਤ ਖਤਮ ਕਰੇ। ਇਹ ਸਾਂਝਾ ਐਲਾਨ ਅਜਿਹੇ ਸਮੇਂ 'ਚ ਹੋਇਆ ਹੈ ਜਦੋਂ ਹਾਲ ਹੀ 'ਚ 50 ਤੋਂ ਜ਼ਿਆਦਾ ਸੰਸਦ ਮੈਂਬਰਾਂ ਦੇ ਨਾਲ 12 ਹੋਰ ਸੰਸਦ ਮੈਂਬਰਾਂ ਨੇ ਇਸ ਬਿਆਨ ਦਾ ਸਮਰਥਨ ਕੀਤਾ ਹੈ। ਇਸ ਨਾਲ CCP ਦੀਆਂ ਨੀਤੀਆਂ ਵਿਰੁੱਧ ਆਵਾਜ਼ ਉਠਾਉਣ ਵਾਲੇ ਕੈਨੇਡੀਅਨ ਸੰਸਦ ਮੈਂਬਰਾਂ ਦੀ ਗਿਣਤੀ ਵੱਧ ਕੇ 65 ਹੋ ਗਈ ਹੈ। ਇਹ ਪਹਿਲਕਦਮੀ ਫਾਲੁਨ ਗੌਂਗ ਵਿਰੁੱਧ ਜਬਰ ਦੇ 27ਵੇਂ ਸਾਲ ਦੌਰਾਨ ਤੇਜ਼ ਹੋ ਗਈ ਹੈ।

ਸੰਯੁਕਤ ਬਿਆਨ ਵਿੱਚ ਕਿਹਾ ਗਿਆ ਹੈ, "ਅਸੀਂ, ਹਸਤਾਖਰ ਕਰਨ ਵਾਲੇ ਸੰਸਦ ਮੈਂਬਰ, ਫਾਲੁਨ ਗੋਂਗ ਭਾਈਚਾਰੇ ਨਾਲ ਇੱਕਮੁੱਠਤਾ ਪ੍ਰਗਟ ਕਰਦੇ ਹਾਂ ਅਤੇ ਪਿਛਲੇ 26 ਸਾਲਾਂ ਵਿੱਚ ਸੀਸੀਪੀ ਦੇ ਚੱਲ ਰਹੇ ਅਤਿਆਚਾਰ ਅਤੇ ਵਧ ਰਹੇ ਵਿਸ਼ਵ-ਵਿਆਪੀ ਦਮਨ ਦੀ ਸਖ਼ਤ ਨਿੰਦਾ ਕਰਦੇ ਹਾਂ।" ਜਾਣਕਾਰੀ ਅਨੁਸਾਰ, ਪਿਛਲੇ ਦੋ ਦਹਾਕਿਆਂ ਵਿੱਚ, ਕੈਨੇਡਾ ਵਿੱਚ ਰਹਿ ਰਹੇ ਫਾਲੂਨ ਗੌਂਗ ਪ੍ਰੈਕਟੀਸ਼ਨਰਾਂ ਨੇ ਨਿਗਰਾਨੀ, ਧਮਕੀਆਂ, ਪਰੇਸ਼ਾਨੀ, ਸਰੀਰਕ ਹਮਲੇ, ਗਲਤ ਜਾਣਕਾਰੀ, ਸਾਈਬਰ ਹਮਲਿਆਂ ਅਤੇ ਧਮਕੀਆਂ ਦਾ ਸਾਹਮਣਾ ਕੀਤਾ ਹੈ। ਫਾਲੁਨ ਗੋਂਗ, ਜਿਸ ਨੂੰ ਫਾਲੂਨ ਦਾਫਾ ਵੀ ਕਿਹਾ ਜਾਂਦਾ ਹੈ, ਇੱਕ ਰਵਾਇਤੀ ਚੀਨੀ ਅਧਿਆਤਮਿਕ ਅਭਿਆਸ ਹੈ ਜੋ ਸੱਚਾਈ, ਦਇਆ ਅਤੇ ਸਹਿਣਸ਼ੀਲਤਾ 'ਤੇ ਅਧਾਰਤ ਧਿਆਨ ਅਤੇ ਨੈਤਿਕ ਸਿੱਖਿਆਵਾਂ 'ਤੇ ਕੇਂਦ੍ਰਿਤ ਹੈ। 1990 ਦੇ ਦਹਾਕੇ ਵਿਚ ਚੀਨ ਵਿਚ ਇਸ ਦੇ ਪੈਰੋਕਾਰਾਂ ਦੀ ਗਿਣਤੀ 7 ਤੋਂ 10 ਕਰੋੜ ਤੱਕ ਪਹੁੰਚ ਗਈ ਸੀ, ਜਿਸ ਤੋਂ ਬਾਅਦ ਸੀਸੀਪੀ ਨੇ ਇਸ ਨੂੰ ਖ਼ਤਰਾ ਸਮਝਿਆ ਅਤੇ ਦਮਨ ਸ਼ੁਰੂ ਕਰ ਦਿੱਤਾ।

ਫਾਲੂਨ ਗੌਂਗ ਦੇ ਪੈਰੋਕਾਰਾਂ ਨੇ ਮਨਮਾਨੀ ਨਜ਼ਰਬੰਦੀ, ਤਸ਼ੱਦਦ, ਜਬਰੀ ਮਜ਼ਦੂਰੀ, ਜਿਨਸੀ ਸ਼ੋਸ਼ਣ, ਅਤੇ ਜ਼ਬਰਦਸਤੀ ਅੰਗ ਟ੍ਰਾਂਸਪਲਾਂਟੇਸ਼ਨ ਵਰਗੀਆਂ ਗੰਭੀਰ ਮਨੁੱਖੀ ਅਧਿਕਾਰਾਂ ਦੀ ਉਲੰਘਣਾ ਦਾ ਸਾਹਮਣਾ ਕੀਤਾ ਹੈ। ਸਾਂਝੇ ਐਲਾਨਨਾਮੇ ਵਿੱਚ ਇਹ ਵੀ ਕਿਹਾ ਗਿਆ ਹੈ ਕਿ ਹਾਲ ਹੀ ਦੇ ਸਾਲਾਂ ਵਿੱਚ, ਚੀਨ ਦਾ ਦਮਨ ਸ਼ੇਨ ਯੂਨ ਪਰਫਾਰਮਿੰਗ ਆਰਟਸ ਤੱਕ ਫੈਲ ਗਿਆ ਹੈ। ਨਿਊਯਾਰਕ ਸਥਿਤ ਇਸ ਸੱਭਿਆਚਾਰਕ ਸੰਸਥਾ ਦੇ ਪ੍ਰੋਗਰਾਮਾਂ ਨੂੰ ਲੈ ਕੇ ਕੈਨੇਡਾ ਦੇ ਚਾਰ ਸ਼ਹਿਰਾਂ ਵਿੱਚ ਬੰਬ ਅਤੇ ਗੋਲੀਬਾਰੀ ਦੀਆਂ ਧਮਕੀਆਂ ਮਿਲੀਆਂ ਸਨ। ਪਿਛਲੇ ਇੱਕ ਸਾਲ ਵਿੱਚ, ਦੁਨੀਆ ਭਰ ਵਿੱਚ 140 ਤੋਂ ਵੱਧ ਅਜਿਹੇ ਫਰਜ਼ੀ ਧਮਕੀ ਦੇ ਮਾਮਲੇ ਸਾਹਮਣੇ ਆਏ ਹਨ, ਜਿਨ੍ਹਾਂ ਵਿੱਚੋਂ ਕੁਝ ਦੇ ਸਰੋਤ ਚੀਨ ਨਾਲ ਸਬੰਧਤ ਦੱਸੇ ਜਾਂਦੇ ਹਨ।

ਦੱਸ ਦਇਏ ਕਿ ਬਿਆਨ 'ਤੇ ਹਸਤਾਖਰ ਕਰਨ ਵਾਲਿਆਂ ਵਿੱਚੋਂ ਇੱਕ ਲਿਬਰਲ ਐਮਪੀ ਜੂਡੀ ਸਕ੍ਰੋਗੋ ਨੇ ਕਿਹਾ ਕਿ ਕੈਨੇਡੀਅਨਾਂ ਲਈ ਇਹ ਜਾਣਨਾ ਮਹੱਤਵਪੂਰਨ ਹੈ ਕਿ ਕਿਵੇਂ ਵਿਦੇਸ਼ੀ ਤਾਨਾਸ਼ਾਹੀ ਲੋਕਤੰਤਰ ਵਿੱਚ ਰਹਿ ਰਹੇ ਅਸੰਤੁਸ਼ਟਾਂ ਨੂੰ ਵੀ ਨਿਸ਼ਾਨਾ ਬਣਾ ਰਹੀ ਹੈ।ਸੰਸਦ ਮੈਂਬਰਾਂ ਨੇ ਚੇਤਾਵਨੀ ਦਿੱਤੀ ਕਿ ਇਹ ਜਬਰ ਨਾ ਸਿਰਫ਼ ਫਾਲੂਨ ਗੌਂਗ ਭਾਈਚਾਰੇ ਲਈ, ਸਗੋਂ ਕੈਨੇਡਾ ਦੀ ਪ੍ਰਭੂਸੱਤਾ, ਜਮਹੂਰੀ ਸੰਸਥਾਵਾਂ ਅਤੇ ਕਦਰਾਂ-ਕੀਮਤਾਂ ਲਈ ਵੀ ਗੰਭੀਰ ਖ਼ਤਰਾ ਹੈ।