ਸਿਡਨੀ (ਪਾਇਲ): ਆਸਟ੍ਰੇਲੀਆ ਦੇ ਪੂਰਬੀ ਤੱਟ 'ਤੇ ਸਥਿਤ ਕਰਾਊਡੀ ਬੇ ਨੈਸ਼ਨਲ ਪਾਰਕ 'ਚ ਵੀਰਵਾਰ ਸਵੇਰੇ ਤੈਰਾਕੀ ਕਰਨ ਗਏ ਦੋ ਲੋਕਾਂ 'ਤੇ ਇਕ ਸ਼ਾਰਕ ਨੇ ਹਮਲਾ ਕਰ ਦਿੱਤਾ। ਹਮਲੇ 'ਚ ਇਕ ਔਰਤ ਦੀ ਮੌਤ ਹੋ ਗਈ, ਜਦਕਿ ਉਸ ਦੇ ਨਾਲ ਤੈਰਾਕੀ ਕਰ ਰਿਹਾ 25 ਸਾਲਾ ਵਿਅਕਤੀ ਗੰਭੀਰ ਰੂਪ 'ਚ ਜ਼ਖਮੀ ਹੋ ਗਿਆ। ਪੁਲਿਸ ਨੇ ਇਸ ਨੂੰ "ਬਹੁਤ ਹੀ ਅਸਾਧਾਰਨ" ਹਮਲਾ ਦੱਸਿਆ ਹੈ। ਇਹ ਘਟਨਾ ਕਾਇਲੀ ਬੀਚ 'ਤੇ ਸਵੇਰੇ 6:30 ਵਜੇ ਵਾਪਰੀ। ਪੁਲਿਸ ਮੁਤਾਬਕ ਦੋਵੇਂ ਇਕ-ਦੂਜੇ ਨੂੰ ਜਾਣਦੇ ਸਨ ਅਤੇ ਇਕੱਠੇ ਤੈਰਾਕੀ ਕਰ ਰਹੇ ਸਨ, ਜਦੋਂ ਵੱਡੇ ਬਲਦ ਸ਼ਾਰਕ ਨੇ ਉਨ੍ਹਾਂ 'ਤੇ ਹਮਲਾ ਕਰ ਦਿੱਤਾ। ਇਕ ਰਾਹਗੀਰ ਨੇ ਮੌਕੇ 'ਤੇ ਪਹੁੰਚ ਕੇ ਨੌਜਵਾਨ ਦੀ ਲੱਤ 'ਤੇ ਟੌਰਨੀਕੇਟ ਬੰਨ੍ਹ ਦਿੱਤਾ, ਜਿਸ ਨਾਲ ਉਸ ਦੀ ਜਾਨ ਬਚ ਗਈ। ਔਰਤ ਨੂੰ ਬਚਾਇਆ ਨਹੀਂ ਜਾ ਸਕਿਆ ਅਤੇ ਮੌਕੇ 'ਤੇ ਹੀ ਉਸ ਦੀ ਮੌਤ ਹੋ ਗਈ।

ਨੌਜਵਾਨ ਨੂੰ ਹੈਲੀਕਾਪਟਰ ਰਾਹੀਂ ਹਸਪਤਾਲ ਲਿਜਾਇਆ ਗਿਆ। ਪੈਰਾਮੈਡਿਕਸ ਦਾ ਕਹਿਣਾ ਹੈ ਕਿ ਉਸਦੀ ਹਾਲਤ ਗੰਭੀਰ ਪਰ ਸਥਿਰ ਹੈ। ਅਧਿਕਾਰੀਆਂ ਨੇ ਰਾਹਗੀਰ ਨੂੰ 'ਹੀਰੋ' ਵਜੋਂ ਪ੍ਰਸ਼ੰਸਾ ਕੀਤੀ ਜਿਸ ਨੇ ਸਮੇਂ ਸਿਰ ਮੁਢਲੀ ਸਹਾਇਤਾ ਦੇ ਕੇ ਇੱਕ ਹੋਰ ਦੀ ਜਾਨ ਬਚਾਈ। ਇੱਕ ਸਰਕਾਰੀ ਬਿਆਨ ਦੇ ਅਨੁਸਾਰ, ਵਿਗਿਆਨੀਆਂ ਨੇ ਪੁਸ਼ਟੀ ਕੀਤੀ ਹੈ ਕਿ ਇਹ ਹਮਲਾ ਇੱਕ ਵੱਡੇ ਬਲਦ ਸ਼ਾਰਕ ਦੁਆਰਾ ਕੀਤਾ ਗਿਆ ਸੀ। ਕਾਇਲੀ ਦੇ ਬੀਚ 'ਤੇ 5 ਡ੍ਰਮਲਾਈਨਾਂ (ਸ਼ਾਰਕ ਬੇਟ ਹੁੱਕ ਯੰਤਰ) ਤਾਇਨਾਤ ਕੀਤੇ ਗਏ ਸਨ। ਇਸ ਤੋਂ ਇਲਾਵਾ ਪੋਰਟ ਮੈਕਵੇਰੀ ਅਤੇ ਫੋਰਸਟਰ ਖੇਤਰਾਂ ਵਿੱਚ ਸੁਰੱਖਿਆ ਲਾਈਨਾਂ ਪਹਿਲਾਂ ਹੀ ਮੌਜੂਦ ਹਨ। ਹਮਲੇ ਤੋਂ ਬਾਅਦ ਨੇੜਲੇ ਸਾਰੇ ਬੀਚਾਂ ਨੂੰ ਅਣਮਿੱਥੇ ਸਮੇਂ ਲਈ ਬੰਦ ਕਰ ਦਿੱਤਾ ਗਿਆ ਹੈ।

ਯੂਨੀਵਰਸਿਟੀ ਆਫ ਫਲੋਰੀਡਾ ਦੇ ਸ਼ਾਰਕ ਰਿਸਰਚ ਪ੍ਰੋਗਰਾਮ ਦੇ ਨਿਰਦੇਸ਼ਕ ਗੇਵਿਨ ਨੈਲਰ ਦੇ ਅਨੁਸਾਰ, “ਇੱਕੋ ਸ਼ਾਰਕ ਦੁਆਰਾ ਦੋ ਵਿਅਕਤੀਆਂ ਉੱਤੇ ਹਮਲਾ ਕਰਨਾ ਬਹੁਤ ਹੀ ਦੁਰਲੱਭ ਹੈ। ਕਿਉਂਕਿ ਸ਼ਾਰਕ ਆਮ ਤੌਰ 'ਤੇ ਮਨੁੱਖਾਂ ਨੂੰ ਨਿਸ਼ਾਨਾ ਨਹੀਂ ਬਣਾਉਂਦੀਆਂ। ਪਰ ਇਸ ਤੋਂ ਪਹਿਲਾਂ ਵੀ ਅਜਿਹੀਆਂ ਘਟਨਾਵਾਂ ਵਾਪਰ ਚੁੱਕੀਆਂ ਹਨ। 2019 ਵਿੱਚ, ਉਸੇ ਸ਼ਾਰਕ ਨੇ ਗ੍ਰੇਟ ਬੈਰੀਅਰ ਰੀਫ ਵਿੱਚ ਦੋ ਬ੍ਰਿਟਿਸ਼ ਸੈਲਾਨੀਆਂ 'ਤੇ ਹਮਲਾ ਕੀਤਾ ਸੀ। ਸਤੰਬਰ 2025 ਵਿੱਚ, ਸਿਡਨੀ ਵਿੱਚ ਸ਼ਾਰਕ ਦੇ ਹਮਲੇ ਵਿੱਚ ਇੱਕ ਸਰਫਰ ਦੀ ਮੌਤ ਹੋ ਗਈ ਸੀ।