ਜ਼ੀਰਕਪੁਰ (ਨੇਹਾ): ਪੰਜਾਬ 'ਚ ਬੱਚਿਆਂ ਦੇ ਇਲਾਜ 'ਚ ਵਰਤੇ ਜਾਣ ਵਾਲੇ 'ਅਲਮੌਂਟ ਕਿਡ ਕਫ ਸ਼ਰਬਤ' ਨੂੰ ਘਟੀਆ ਕੁਆਲਿਟੀ ਵਾਲਾ ਕਰਾਰ ਦਿੰਦੇ ਹੋਏ ਫੂਡ ਐਂਡ ਡਰੱਗਜ਼ ਐਡਮਿਨਿਸਟ੍ਰੇਸ਼ਨ (ਐਫ.ਡੀ.ਏ.), ਪੰਜਾਬ, ਡਰੱਗਜ਼ ਵਿੰਗ ਨੇ ‘ਏਲਮੋਂਟ ਕਿਡ ਕਫ ਸ਼ਰਬਤ’ ਨੂੰ ਘਟੀਆ ਕੁਆਲਿਟੀ ਵਾਲਾ ਕਰਾਰ ਦਿੰਦਿਆਂ ਤੁਰੰਤ ਪ੍ਰਭਾਵ ਨਾਲ ਇਸ ਦੀ ਵਿਕਰੀ, ਵੰਡ ਅਤੇ ਵਰਤੋਂ ‘ਤੇ ਪੂਰੀ ਤਰ੍ਹਾਂ ਪਾਬੰਦੀ ਲਗਾ ਦਿੱਤੀ ਹੈ। ਇਹ ਹੁਕਮ ਡਿਪਟੀ ਡਰੱਗਜ਼ ਕੰਟਰੋਲਰ (ਆਈ), ਸੀਡੀਐਸਸੀਓ (ਪੂਰਬੀ ਜ਼ੋਨ) ਤੋਂ ਪ੍ਰਾਪਤ ਜਾਣਕਾਰੀ ਅਤੇ ਕੇਂਦਰੀ ਡਰੱਗ ਲੈਬਾਰਟਰੀ, ਕੋਲਕਾਤਾ ਦੀ ਜਾਂਚ ਰਿਪੋਰਟ ਦੇ ਆਧਾਰ 'ਤੇ ਜਾਰੀ ਕੀਤਾ ਗਿਆ ਹੈ।

ਅਲਮੋਂਟ-ਕਿਡ (ਲੇਵੋਸੇਟੀਰਾਈਜ਼ਾਈਨ ਡਾਇਹਾਈਡ੍ਰੋਕਲੋਰਾਈਡ ਅਤੇ ਮੋਂਟੇਲੁਕਾਸਟ ਸੋਡੀਅਮ ਸੀਰਪ) ਬੈਚ ਨੰਬਰ AL-24002, ਨਿਰਮਾਣ ਮਿਤੀ ਜਨਵਰੀ 2025 ਅਤੇ ਮਿਆਦ ਪੁੱਗਣ ਦੀ ਮਿਤੀ ਦਸੰਬਰ 2026 ਵਿੱਚ ਗੰਭੀਰ ਨੁਕਸ ਪਾਏ ਗਏ ਹਨ। ਇਹ ਦਵਾਈ Trides Remedies, Hajipur (ਬਿਹਾਰ) ਦੁਆਰਾ ਨਿਰਮਿਤ ਹੈ। ਲੈਬ ਟੈਸਟਿੰਗ ਦੌਰਾਨ, ਸ਼ਰਬਤ ਵਿੱਚ ਐਥੀਲੀਨ ਗਲਾਈਕੋਲ ਪਾਇਆ ਗਿਆ, ਜੋ ਸਿਹਤ ਲਈ ਬਹੁਤ ਹਾਨੀਕਾਰਕ ਮੰਨਿਆ ਜਾਂਦਾ ਹੈ ਅਤੇ ਦਵਾਈ ਨੂੰ ਅਸੁਰੱਖਿਅਤ ਬਣਾਉਂਦਾ ਹੈ। ਵਿਭਾਗ ਵੱਲੋਂ ਜਾਰੀ ਪੱਤਰ ਵਿੱਚ ਕਿਹਾ ਗਿਆ ਹੈ ਕਿ ਲੋਕ ਹਿੱਤਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਪੰਜਾਬ ਰਾਜ ਵਿੱਚ ਇਸ ਉਤਪਾਦ 'ਤੇ ਤੁਰੰਤ ਪ੍ਰਭਾਵ ਨਾਲ ਪੂਰੀ ਤਰ੍ਹਾਂ ਪਾਬੰਦੀ ਲਗਾਈ ਗਈ ਹੈ।

ਐਫ.ਡੀ.ਏ. ਪੰਜਾਬ ਨੇ ਸਾਰੇ ਰਿਟੇਲਰਾਂ, ਵਿਤਰਕਾਂ, ਰਜਿਸਟਰਡ ਮੈਡੀਕਲ ਪ੍ਰੈਕਟੀਸ਼ਨਰਾਂ, ਹਸਪਤਾਲਾਂ ਅਤੇ ਸਿਹਤ ਸੰਸਥਾਵਾਂ ਨੂੰ ਇਹ ਸ਼ਰਬਤ ਨਾ ਤਾਂ ਖਰੀਦਣ ਅਤੇ ਨਾ ਵੇਚਣ ਅਤੇ ਨਾ ਹੀ ਕਿਸੇ ਮਰੀਜ਼ ਨੂੰ ਇਸ ਨੂੰ ਪਿਲਾਉਣ ਲਈ ਸਖ਼ਤ ਹਦਾਇਤ ਕੀਤੀ ਹੈ। ਇਸ ਦੇ ਨਾਲ ਹੀ ਸੂਬੇ ਦੇ ਸਾਰੇ ਜ਼ਿਲ੍ਹਿਆਂ ਨੂੰ ਸੁਚੇਤ ਕੀਤਾ ਗਿਆ ਹੈ ਕਿ ਜੇਕਰ ਕਿਤੇ ਵੀ ਇਸ ਦਵਾਈ ਦਾ ਸਟਾਕ ਮਿਲਦਾ ਹੈ ਤਾਂ ਤੁਰੰਤ ਇਸ ਦੀ ਸੂਚਨਾ ਡਰੱਗਜ਼ ਕੰਟਰੋਲ, ਐਫ.ਡੀ.ਏ. ਪੰਜਾਬ ਨੂੰ ਦਿੱਤੀ ਜਾਵੇ।

ਸਮੂਹ ਡਰੱਗ ਕੰਟਰੋਲ ਅਫ਼ਸਰਾਂ ਨੂੰ ਹਦਾਇਤ ਕੀਤੀ ਗਈ ਹੈ ਕਿ ਜਿੱਥੇ ਵੀ ਇਹ ਸ਼ਰਬਤ ਉਪਲਬਧ ਹੋਵੇ, ਉਸ ਨੂੰ ਤੁਰੰਤ ਜ਼ਬਤ ਕਰਨ, ਨਮੂਨੇ ਇਕੱਤਰ ਕਰਨ ਅਤੇ ਅਗਲੇਰੀ ਕਾਨੂੰਨੀ ਕਾਰਵਾਈ ਕਰਨ ਲਈ ਕਿਹਾ ਗਿਆ ਹੈ। ਵਿਭਾਗੀ ਸੂਤਰਾਂ ਅਨੁਸਾਰ ਇਹ ਹੁਕਮ ਪੰਜਾਬ ਦੇ ਸਮੂਹ ਸਿਹਤ ਸੰਸਥਾਵਾਂ, ਡਰੱਗ ਲਾਇਸੈਂਸ ਧਾਰਕਾਂ, ਮੈਡੀਕਲ ਸਟੋਰਾਂ ਅਤੇ ਹਸਪਤਾਲਾਂ ਨੂੰ ਲਾਗੂ ਕਰਨ ਲਈ ਭੇਜ ਦਿੱਤੇ ਗਏ ਹਨ, ਤਾਂ ਜੋ ਸਮੇਂ ਸਿਰ ਘਟੀਆ ਗੁਣਵੱਤਾ ਵਾਲੀਆਂ ਦਵਾਈਆਂ ਕਾਰਨ ਹੋਣ ਵਾਲੇ ਕਿਸੇ ਵੀ ਤਰ੍ਹਾਂ ਦੇ ਨੁਕਸਾਨ ਨੂੰ ਰੋਕਿਆ ਜਾ ਸਕੇ।