ਚੰਡੀਗੜ੍ਹ (ਰਾਘਵ): ਪੰਜਾਬ ਸਰਕਾਰ ਨੇ ਆਪਣੇ ਕਰਮਚਾਰੀਆਂ ਨੂੰ ਪੈਨਸ਼ਨ ਯੋਜਨਾ ਵਿਚ ਵਧੇਰੇ ਲਚਕ ਦਿੱਤੀ ਹੈ। ਵਿੱਤ ਵਿਭਾਗ ਨੇ ਐਲਾਨ ਕੀਤਾ ਹੈ ਕਿ ਹੁਣ ਐੱਨ. ਪੀ. ਐੱਸ. Tier-1 ਹੇਠ ਸਰਕਾਰੀ ਕਰਮਚਾਰੀ ਆਪਣੀ ਪਸੰਦੀਦਾ ਪੈਨਸ਼ਨ ਫੰਡ ਅਤੇ ਨਿਵੇਸ਼ ਪੈਟਰਨ ਚੁਣ ਸਕਦੇ ਹਨ। ਸਰਕਾਰ ਵੱਲੋਂ ਜਾਰੀ ਨੋਟੀਫਿਕੇਸ਼ਨ ਵਿਚ ਕਿਹਾ ਗਿਆ ਹੈ ਕਿ ਕਰਮਚਾਰੀ ਕਿਸੇ ਵੀ ਸਰਕਾਰੀ ਜਾਂ ਪ੍ਰਾਈਵੇਟ ਸੈਕਟਰ ਦੇ ਪੈਨਸ਼ਨ ਫੰਡ ਦੀ ਚੋਣ ਕਰ ਸਕਦੇ ਹਨ। ਇਹ ਚੋਣ ਹਰ ਸਾਲ ਇਕ ਵਾਰੀ ਬਦਲੀ ਜਾ ਸਕਦੀ ਹੈ। ਜੇ ਕਰਮਚਾਰੀ ਨੇ ਕੋਈ ਚੋਣ ਨਹੀਂ ਕੀਤੀ ਹੈ ਤਾਂ ਉਸ ਉਪਰ ਡਿਫੌਲਟ ਸਕੀਮ ਲਾਗੂ ਰਹੇਗੀ।

ਨਿਵੇਸ਼ ਪੈਟਰਨ ਦੇ ਬਦਲ
ਡਿਫੌਲਟ ਸਕੀਮ : PFRDA ਵੱਲੋਂ ਤੈਅ ਕੀਤੇ ਤਰੀਕੇ ਅਨੁਸਾਰ ਤਿੰਨ ਸਰਕਾਰੀ ਫੰਡ ਮੈਨੇਜਰਾਂ ਰਾਹੀਂ ਨਿਵੇਸ਼।
ਸਕੀਮ ਜੀ : 100% ਨਿਵੇਸ਼ ਸਰਕਾਰੀ ਬਾਂਡਾਂ ਵਿਚ।
ਐੱਲ. ਸੀ. 25 : 25 ਫੀਸਦੀ ਤੱਕ ਇਕਵਿਟੀ ਵਿਚ - ਸੰਭਾਲੂ ਨਿਵੇਸ਼ਕਾਂ ਲਈ।
ਐੱਲ. ਸੀ. 50 : 50 ਫੀਸਦੀ ਤੱਕ ਇਕਵਿਟੀ ਵਿਚ - ਥੋੜੇ ਜ਼ਿਆਦਾ ਮੁਨਾਫੇ ਦੀ ਉਮੀਦ ਰੱਖਣ ਵਾਲਿਆਂ ਲਈ।

ਕਰਮਚਾਰੀ ਆਪਣੇ ਸੀ. ਆਰ. ਓ. ਲੌਗਇਨ ਰਾਹੀਂ ਆਨਲਾਈਨ ਵੀ ਚੋਣ ਕਰ ਸਕਦੇ ਹਨ। ਇਹ ਚੋਣ ਆਪਣੇ ਆਪ ਪ੍ਰਮਾਣਿਤ ਕੀਤੀ ਜਾ ਸਕਦੀ ਹੈ। ਇਸ ਲਈ ਨੋਡਲ ਦਫ਼ਤਰ ਦੀ ਮਨਜ਼ੂਰੀ ਦੀ ਲੋੜ ਨਹੀਂ ਹੈ। ਸਰਕਾਰ ਵੱਲੋਂ ਇਹ ਵੀ ਆਖਿਆ ਗਿਆ ਹੈ ਕਿ ਜੇ ਕਿਸੇ ਕਰਮਚਾਰੀ ਨੂੰ ਆਪਣੇ ਚੁਣੇ ਗਏ ਬਦਲ ਕਾਰਣ ਘੱਟ ਵਾਪਸੀ ਜਾਂ ਨੁਕਸਾਨ ਹੁੰਦਾ ਹੈ ਤਾਂ ਇਹ ਉਨ੍ਹਾਂ ਦੀ ਆਪਣੀ ਚੋਣ ਦੀ ਜ਼ਿੰਮੇਵਾਰੀ ਹੋਵੇਗੀ। ਭਵਿੱਖ ਵਿਚ ਨਵੀਂ ਪੈਨਸ਼ਨ ਸਕੀਮ ਲਾਗੂ ਹੋਣ ਦੀ ਸਥਿਤੀ ਵਿਚ, ਡਿਫੌਲਟ ਅਤੇ ਚੋਣੀ ਸਕੀਮ ਦੇ ਰਿਟਰਨ ਵਿਚਾਲੇ ਅੰਤਰ ਨੂੰ ਕਰਮਚਾਰੀ ਤੋਂ ਵਸੂਲਿਆ ਜਾ ਸਕਦਾ ਹੈ।