ਪਟਨਾ (ਪਾਇਲ): ਬਿਹਾਰ ਦੇ ਸੁਪੌਲ ਜ਼ਿਲੇ ਦੇ ਤ੍ਰਿਵੇਣੀਗੰਜ ਥਾਣਾ ਖੇਤਰ 'ਚ ਇਕ ਵਿਅਕਤੀ ਨੂੰ ਗੋਲੀ ਮਾਰ ਕੇ ਕਤਲ ਕਰਨ ਦੀ ਕੋਸ਼ਿਸ਼ ਕਰਨ ਦੇ ਦੋਸ਼ 'ਚ ਪੁਲਿਸ ਨੇ ਇਕ ਔਰਤ ਸਮੇਤ ਚਾਰ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ ਅਤੇ ਉਨ੍ਹਾਂ ਕੋਲੋਂ ਕਾਰਤੂਸ ਅਤੇ ਨਕਦੀ ਸਮੇਤ ਗੈਰ-ਕਾਨੂੰਨੀ ਹਥਿਆਰ ਵੀ ਬਰਾਮਦ ਕੀਤੇ ਹਨ।

ਪੁਲਿਸ ਸੁਪਰਡੈਂਟ ਸ਼ਰਤ ਆਰਐੱਸ ਨੇ ਐਤਵਾਰ ਨੂੰ ਪ੍ਰੈੱਸ ਕਾਨਫਰੰਸ 'ਚ ਦੱਸਿਆ ਕਿ ਤ੍ਰਿਵੇਣੀਗੰਜ ਥਾਣਾ ਖੇਤਰ ਦੇ ਮਹੇਸ਼ੂਆ ਪਿੰਡ ਦੇ ਰਹਿਣ ਵਾਲੇ ਸ਼ਸ਼ੀਰੰਜਨ ਜੈਸਵਾਲ ਦਾ ਵਿਆਹ ਕੁਝ ਸਾਲ ਪਹਿਲਾਂ ਮਧੇਪੁਰਾ ਜ਼ਿਲ੍ਹੇ ਦੇ ਘੈਲਾਡ ਪਿੰਡ ਦੀ ਸੋਨੀ ਕੁਮਾਰੀ ਨਾਲ ਹੋਇਆ ਸੀ। ਲੇਕਿਨ ਵਿਆਹ ਦੇ ਬਾਅਦ ਵੀ ਸੋਨੀ ਕੁਮਾਰੀ ਨੇ ਆਪਣੇ ਪ੍ਰੇਮੀ ਬ੍ਰਜੇਸ਼ ਕੁਮਾਰ ਨਾਲ ਗੱਲਬਾਤ ਜਾਰੀ ਰੱਖ ਰਹੀ ਸੀ। ਉਨ੍ਹਾਂ ਕਿਹਾ ਕਿ ਇਸ ਮਾਮਲੇ ਵਿੱਚ ਸੋਨੀ ਕੁਮਾਰੀ ਅਤੇ ਬ੍ਰਜੇਸ਼ ਕੁਮਾਰ ਨੇ ਇੱਕ ਯੋਜਨਾ ਅਨੁਸਾਰ ਸ਼ਸ਼ੀਰੰਜਨ ਜੈਸਵਾਲ ਨੂੰ ਉਨ੍ਹਾਂ ਦੇ ਰਸਤੇ ਤੋਂ ਹਟਾਉਣ ਦਾ ਫੈਸਲਾ ਕੀਤਾ ਅਤੇ ਭਾੜੇ ਦੇ ਦੋ ਅਪਰਾਧੀਆਂ ਰੁਪੇਸ਼ ਕੁਮਾਰ ਅਤੇ ਸੁਧਾਂਸ਼ੁ ਕੁਮਾਰ ਨਾਲ ਡੇਢ ਲੱਖ ਦਾ ਸੌਦਾ ਕੀਤਾ ਅਤੇ ਇੱਕ ਲੱਖ ਰੁਪਏ ਅੱਗੇ ਤੋਂ ਭੁਗਤਾਨ ਵੀ ਕਰ ਦਿੱਤਾ। ਪੁਲਿਸ ਸੁਪਰਡੈਂਟ ਨੇ ਦੱਸਿਆ ਕਿ ਯੋਜਨਾ ਅਨੁਸਾਰ ਜਦੋਂ ਸ਼ਸ਼ੀ ਰੰਜਨ ਜੈਸਵਾਲ 26 ਨਵੰਬਰ ਨੂੰ ਲਾਲ ਪੱਟੀ ਪਿੰਡ ਤੋਂ ਘਰ ਪਰਤ ਰਿਹਾ ਸੀ ਤਾਂ ਮਹੇਸ਼ੂਆ ਦੇ ਪੋਖਰਾ ਨੇੜੇ ਦੋਵਾਂ ਅਪਰਾਧੀਆਂ ਨੇ ਉਸ 'ਤੇ ਗੋਲੀਆਂ ਚਲਾ ਦਿੱਤੀਆਂ, ਜਿਸ ਕਾਰਨ ਉਹ ਗੰਭੀਰ ਜ਼ਖ਼ਮੀ ਹੋ ਗਿਆ।

ਸ਼ਰਤ ਨੇ ਦੱਸਿਆ ਕਿ ਅਪਰਾਧੀਆਂ ਨੂੰ ਫੜਨ ਲਈ ਤ੍ਰਿਵੇਣੀਗੰਜ ਪੁਲਿਸ ਉਪਮੰਡਲ ਅਧਿਕਾਰੀ ਵਿਭਾਸ਼ ਕੁਮਾਰ ਦੀ ਅਗਵਾਈ 'ਚ ਪੁਲਿਸ ਟੀਮ ਬਣਾਈ ਗਈ ਸੀ। ਜਾਂਚ ਦੌਰਾਨ ਸੋਨੀ ਕੁਮਾਰੀ ਅਤੇ ਉਸਦੇ ਪ੍ਰੇਮੀ ਨੇ ਇਸ ਮਾਮਲੇ ਵਿੱਚ ਆਪਣੀ ਸ਼ਮੂਲੀਅਤ ਕਬੂਲੀ ਅਤੇ ਦੋ ਸ਼ੂਟਰਾਂ ਦੇ ਨਾਂ ਵੀ ਦੱਸੇ। ਦੋਵਾਂ ਦੇ ਬਿਆਨਾਂ ਅਨੁਸਾਰ ਘਟਨਾ ਵਿੱਚ ਸ਼ਾਮਲ ਸ਼ੂਟਰਾਂ ਰੁਪੇਸ਼ ਕੁਮਾਰ ਅਤੇ ਸੁਧਾਂਸ਼ੂ ਕੁਮਾਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਐਸਪੀ ਨੇ ਦੱਸਿਆ ਕਿ ਸੋਨੀ ਕੁਮਾਰੀ, ਬ੍ਰਜੇਸ਼ ਕੁਮਾਰ, ਰੁਪੇਸ਼ ਕੁਮਾਰ ਅਤੇ ਸੁਧਾਂਸ਼ੂ ਕੁਮਾਰ ਦੇ ਘਰ ਛਾਪੇਮਾਰੀ ਦੌਰਾਨ ਪੁਲੀਸ ਨੇ 62 ਹਜ਼ਾਰ ਰੁਪਏ, ਦੋ ਦੇਸੀ ਪਿਸਤੌਲ, ਪੰਜ ਕਾਰਤੂਸ, ਪੰਜ ਮੋਬਾਈਲ ਫੋਨ ਅਤੇ ਇੱਕ ਮੋਟਰਸਾਈਕਲ ਬਰਾਮਦ ਕੀਤਾ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਮਾਮਲੇ ਵਿੱਚ ਸੋਨੀ ਕੁਮਾਰੀ, ਬ੍ਰਜੇਸ਼ ਕੁਮਾਰ, ਰੁਪੇਸ਼ ਕੁਮਾਰ ਅਤੇ ਸੁਧਾਂਸ਼ੂ ਕੁਮਾਰ ਨੂੰ ਨਿਆਂਇਕ ਹਿਰਾਸਤ ਵਿੱਚ ਭੇਜ ਦਿੱਤਾ ਗਿਆ ਹੈ।