ਪ੍ਰਾਗ (ਰਾਘਵ) : ਚੈੱਕ ਗਣਰਾਜ ਦੇ ਪੂਰਬੀ ਖੇਤਰ 'ਚ ਇਕ ਮਾਲ ਗੱਡੀ ਦੇ ਪਟੜੀ ਤੋਂ ਉਤਰਨ ਤੋਂ ਬਾਅਦ ਉਸ ਦੇ ਖਰਾਬ ਹੋਏ ਟੈਂਕ 'ਚ ਰੱਖੇ ਕਾਰਸੀਨੋਜਨਿਕ ਰਸਾਇਣਕ ਪਦਾਰਥ 'ਬੈਂਜ਼ੀਨ' ਕਾਰਨ ਅੱਗ ਲੱਗ ਗਈ। ਇਹ ਹਾਦਸਾ ਸਥਾਨਕ ਸਮੇਂ ਮੁਤਾਬਕ ਸ਼ੁੱਕਰਵਾਰ ਦੁਪਹਿਰ 12 ਵਜੇ ਹੁਸਟੋਪੇਸ ਨਾਦ ਬੇਕਾਵੂ ਸ਼ਹਿਰ ਦੇ ਸਟੇਸ਼ਨ ਨੇੜੇ ਵਾਪਰਿਆ ਅਤੇ ਅੱਗ ਕਾਰਨ ਕਾਲਾ ਧੂੰਆਂ ਦੂਰੋਂ ਹੀ ਦਿਖਾਈ ਦੇ ਰਿਹਾ ਸੀ। ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਇਸ ਹਾਦਸੇ ਵਿੱਚ ਕੋਈ ਵੀ ਵਿਅਕਤੀ ਜ਼ਖਮੀ ਨਹੀਂ ਹੋਇਆ ਹੈ। ਫਾਇਰ ਵਿਭਾਗ ਦੇ ਕਰਮਚਾਰੀਆਂ ਨੇ ਦੱਸਿਆ ਕਿ ਟਰੇਨ ਦੇ 17 ਟੈਂਕਾਂ 'ਚੋਂ 15 ਨੂੰ ਅੱਗ ਲੱਗ ਗਈ। ਹਰ ਟੈਂਕ ਵਿਚ ਲਗਭਗ 60 ਮੀਟ੍ਰਿਕ ਟਨ ਜ਼ਹਿਰੀਲਾ ਪਦਾਰਥ ਸੀ। ਉਨ੍ਹਾਂ ਨੇ ਅੱਗ 'ਤੇ ਕਾਬੂ ਪਾਉਣ ਲਈ ਹੈਲੀਕਾਪਟਰਾਂ ਦੀ ਵਰਤੋਂ ਕੀਤੀ ਅਤੇ ਗੁਆਂਢੀ ਸਲੋਵਾਕੀਆ ਤੋਂ ਉਨ੍ਹਾਂ ਦੇ ਹਮਰੁਤਬਾ ਮਦਦ ਲਈ ਪਹੁੰਚ ਰਹੇ ਹਨ। ਅਧਿਕਾਰੀਆਂ ਨੇ ਕਿਹਾ ਕਿ ਖਤਰਨਾਕ ਪਦਾਰਥਾਂ ਦਾ ਪੱਧਰ ਸ਼ਹਿਰ ਵਿੱਚ ਆਗਿਆਯੋਗ ਸੀਮਾਵਾਂ ਤੋਂ ਵੱਧ ਨਹੀਂ ਸੀ, ਪਰ ਉੱਥੇ ਦੇ ਵਸਨੀਕਾਂ ਅਤੇ ਨੇੜਲੇ ਕਸਬਿਆਂ ਅਤੇ ਪਿੰਡਾਂ ਨੂੰ ਆਪਣੀਆਂ ਖਿੜਕੀਆਂ ਨਾ ਖੋਲ੍ਹਣ ਅਤੇ ਘਰ ਦੇ ਅੰਦਰ ਰਹਿਣ ਦੀ ਸਲਾਹ ਦਿੱਤੀ ਗਈ ਸੀ।