ਇਸਲਾਮਾਬਾਦ (ਹਰਮੀਤ): ਪਾਕਿਸਤਾਨੀ ਫੌਜ ਦੀ ਮੈਡੀਕਲ ਕੋਰ ਵਿਚ ਸੇਵਾ ਨਿਭਾ ਰਹੀ ਡਾਕਟਰ ਹੈਲਨ ਮੈਰੀ ਰੌਬਰਟਸ ਨੇ ਦੇਸ਼ ਦੇ ਇਤਿਹਾਸ ਵਿਚ ਬ੍ਰਿਗੇਡੀਅਰ ਦਾ ਅਹੁਦਾ ਹਾਸਲ ਕਰਨ ਵਾਲੀ ਈਸਾਈ ਅਤੇ ਘੱਟ ਗਿਣਤੀ ਭਾਈਚਾਰੇ ਦੀ ਪਹਿਲੀ ਮਹਿਲਾ ਬਣ ਕੇ ਇਤਿਹਾਸ ਰਚ ਦਿੱਤਾ ਹੈ। ਬ੍ਰਿਗੇਡੀਅਰ ਹੈਲਨ ਪਾਕਿਸਤਾਨੀ ਫੌਜ ਦੇ ਉਨ੍ਹਾਂ ਅਫਸਰਾਂ ਵਿੱਚੋਂ ਸਨ ਜਿਨ੍ਹਾਂ ਨੂੰ ਚੋਣ ਬੋਰਡ ਨੇ ਬ੍ਰਿਗੇਡੀਅਰ ਅਤੇ ਫੁੱਲ ਕਰਨਲ ਵਜੋਂ ਤਰੱਕੀ ਦਿੱਤੀ ਸੀ।

ਹੈਲਨ ਨੂੰ ਬ੍ਰਿਗੇਡੀਅਰ ਦੇ ਅਹੁਦੇ 'ਤੇ ਤਰੱਕੀ 'ਤੇ ਵਧਾਈ ਦਿੰਦੇ ਹੋਏ ਪ੍ਰਧਾਨ ਮੰਤਰੀ ਸ਼ਹਿਬਾਜ਼ ਸ਼ਰੀਫ ਨੇ ਕਿਹਾ ਕਿ ਪੂਰੇ ਦੇਸ਼ ਨੂੰ ਉਸ 'ਤੇ ਅਤੇ ਘੱਟ ਗਿਣਤੀ ਭਾਈਚਾਰਿਆਂ ਦੀਆਂ ਉਸ ਵਰਗੀਆਂ ਹਜ਼ਾਰਾਂ ਮਿਹਨਤੀ ਔਰਤਾਂ 'ਤੇ ਮਾਣ ਹੈ ਜੋ ਦੇਸ਼ ਦੀ ਸੇਵਾ ਕਰ ਰਹੀਆਂ ਹਨ। ਸ਼ਾਹਬਾਜ਼ ਸ਼ਰੀਫ ਨੇ ਕਿਹਾ, ''ਮੈਂ ਅਤੇ ਪੂਰਾ ਦੇਸ਼ ਬ੍ਰਿਗੇਡੀਅਰ ਹੈਲਨ ਮੈਰੀ ਰੌਬਰਟਸ ਨੂੰ ਪਾਕਿਸਤਾਨੀ ਫੌਜ 'ਚ ਬ੍ਰਿਗੇਡੀਅਰ ਦੇ ਅਹੁਦੇ 'ਤੇ ਪਦਉੱਨਤ ਹੋਣ ਵਾਲੀ ਘੱਟ ਗਿਣਤੀ ਭਾਈਚਾਰੇ ਦੀ ਪਹਿਲੀ ਮਹਿਲਾ ਹੋਣ ਦਾ ਮਾਣ ਹਾਸਲ ਕਰਨ 'ਤੇ ਵਧਾਈ ਦਿੰਦਾ ਹਾਂ।

ਪਿਛਲੇ ਸਾਲ ਰਾਵਲਪਿੰਡੀ ਦੇ ਕ੍ਰਾਈਸਟ ਚਰਚ 'ਚ ਕ੍ਰਿਸਮਸ ਦੇ ਜਸ਼ਨਾਂ ਦੌਰਾਨ ਪਾਕਿਸਤਾਨ ਦੇ ਫੌਜ ਮੁਖੀ ਜਨਰਲ ਅਸੀਮ ਮੁਨੀਰ ਨੇ ਦੇਸ਼ ਦੇ ਵਿਕਾਸ 'ਚ ਘੱਟ ਗਿਣਤੀ ਭਾਈਚਾਰੇ ਵੱਲੋਂ ਨਿਭਾਈ ਗਈ ਭੂਮਿਕਾ ਦੀ ਸ਼ਲਾਘਾ ਕੀਤੀ ਸੀ। ਬ੍ਰਿਗੇਡੀਅਰ ਡਾਕਟਰ ਹੈਲਨ ਇੱਕ ਸੀਨੀਅਰ ਡਾਕਟਰ ਹੈ ਅਤੇ ਪਿਛਲੇ 26 ਸਾਲਾਂ ਤੋਂ ਪਾਕਿਸਤਾਨੀ ਫੌਜ ਵਿੱਚ ਸੇਵਾ ਨਿਭਾ ਰਹੀ ਹੈ।