ਓਡੀਸ਼ਾ (ਸਾਹਿਬ) - ਬੀਮਾਰੀ ਤੋਂ ਠੀਕ ਕਰਨ ਲਈ ਬੋਲਾਂਗੀਰ 'ਚ ਇੱਕ 19 ਸਾਲਾ ਲੜਕੀ ਨੂੰ ਉਸ ਦੇ ਸਿਰ 'ਚ ਕਈ ਸੂਈਆਂ ਮਾਰਨ ਦੇ ਇਲਜ਼ਾਮ 'ਚ ਇਕ 'ਤਾਂਤਰਿਕ' ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਪੀੜਤਾ ਹੁਣ ਭੀਮਾ ਭੋਈ ਮੈਡੀਕਲ ਕਾਲਜ ਅਤੇ ਹਸਪਤਾਲ ਵਿੱਚ ਜ਼ੇਰੇ ਇਲਾਜ ਹੈ। ਬੋਲਾਂਗੀਰ ਜ਼ਿਲ੍ਹੇ ਦੇ ਸਿੰਧਕੇਲਾ ਪੁਲਿਸ ਸੀਮਾ ਅਧੀਨ ਪੈਂਦੇ ਪਿੰਡ ਇੰਚ ਦੀ ਰਹਿਣ ਵਾਲੀ ਰੇਸ਼ਮਾ ਬੇਹਰਾ ਆਪਣੀ ਬੀਮਾਰੀ ਦੇ ਇਲਾਜ ਲਈ ਜ਼ਿਲ੍ਹੇ ਦੇ ਜਮੂਤਝੁਲਾ ਪਿੰਡ ਦੇ ਤਾਂਤਰਿਕ ਸੰਤੋਸ਼ ਰਾਣਾ ਕੋਲ ਗਈ ਸੀ।

ਦੱਸ ਦਈਏ ਕਿ ਰੇਸ਼ਮਾ ਚਾਰ ਸਾਲਾਂ ਤੋਂ ਰਹੱਸਮਈ ਬਿਮਾਰੀ ਤੋਂ ਪੀੜਤ ਹੈ। ਉਸ ਦੀ ਹਾਲਤ 'ਚ ਸੁਧਾਰ ਨਾ ਹੋਣ 'ਤੇ ਉਸ ਦੇ ਪਰਿਵਾਰ ਨੇ ਤਾਂਤਰਿਕ ਦੀ ਮਦਦ ਮੰਗੀ ਸੀ। ਕਥਿਤ ਤੌਰ 'ਤੇ ਤਾਂਤਰਿਕ ਨੇ ਰੇਸ਼ਮਾ ਦੇ ਸਿਰ 'ਤੇ ਸਰਿੰਜ ਦੀ ਸੂਈ ਨਾਲ ਵਾਰ ਕੀਤਾ, ਜਿਸ ਕਾਰਨ ਉਹ ਬੇਹੋਸ਼ ਹੋ ਗਈ। ਹਾਲ ਹੀ 'ਚ ਰੇਸ਼ਮਾ ਦੇ ਪਰਿਵਾਰ ਵਾਲਿਆਂ ਨੇ ਸੂਈਆਂ ਦੇਖ ਕੇ ਉਨ੍ਹਾਂ ਨੂੰ ਹਟਾ ਦਿੱਤਾ ਅਤੇ ਫਿਰ ਉਸ ਨੂੰ ਇਲਾਜ ਲਈ ਭੀਮਾ ਭੋਈ ਮੈਡੀਕਲ ਕਾਲਜ ਅਤੇ ਹਸਪਤਾਲ ਲੈ ਗਏ। ਸੀਟੀ ਸਕੈਨ ਤੋਂ ਪਤਾ ਲੱਗਿਆ ਕਿ ਉਸ ਦੇ ਸਿਰ ਵਿੱਚ ਅਜੇ ਵੀ 10 ਤੋਂ ਵੱਧ ਸੂਈਆਂ ਫਸੀਆਂ ਹੋਈਆਂ ਸਨ।

ਓਥੇ ਹੀ ਲੜਕੀ ਦੇ ਪਿਤਾ ਬਿਸ਼ਨੂ ਬੇਹਰਾ ਨੇ ਇਲਜ਼ਾਮ ਲਾਇਆ ਕਿ ਤਾਂਤਰਿਕ ਉਸ ਦੀ ਲੜਕੀ ਨੂੰ ਇੱਕ ਕਮਰੇ ਵਿੱਚ ਲੈ ਗਿਆ ਅਤੇ ਇੱਕ ਘੰਟੇ ਬਾਅਦ ਉਸ ਨੂੰ ਬਾਹਰ ਲੈ ਗਿਆ ਅਤੇ ਦਾਅਵਾ ਕੀਤਾ ਕਿ ਉਹ ਠੀਕ ਹੋ ਗਈ ਹੈ। ਪਰ ਬਾਅਦ 'ਚ ਪਰਿਵਾਰ ਨੂੰ ਭਿਆਨਕ ਸੱਚਾਈ ਦਾ ਪਤਾ ਲੱਗਾ। ਪਰਿਵਾਰ ਦੀ ਸ਼ਿਕਾਇਤ ਦੇ ਆਧਾਰ 'ਤੇ ਇਲਜ਼ਾਮ ਤਾਂਤਰਿਕ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ।