ਅੰਮ੍ਰਿਤਸਰ(ਨੇਹਾ): ਪਾਕਿਸਤਾਨ ਬੈਠੇ ਗੈਂਗਸਟਰ ਸ਼ਹਿਜ਼ਾਦ ਭੱਟੀ ਨੇ ਹਾਲ ਹੀ 'ਚ ਇਕ ਨਵੀਂ ਵੀਡੀਓ ਜਾਰੀ ਕਰ ਕੇ ਲਾਰੈਂਸ ਬਿਸ਼ਨੋਈ 'ਤੇ ਹਮਲਾ ਬੋਲਿਆ ਹੈ। ਇਸ ਵੀਡੀਓ 'ਚ ਸ਼ਹਿਜ਼ਾਦ ਭੱਟੀ ਨੇ ਲਾਰੈਂਸ ਨੂੰ ਦੇਸ਼ ਦਾ ਗੱਦਾਰ ਦੱਸਿਆ ਹੈ ਅਤੇ ਕਿਹਾ ਹੈ ਕਿ ਉਸਨੇ ਲਾਰੈਂਸ ਤੋਂ ਬਦਲਾ ਲੈਣ ਲਈ ਹਮਲਾ ਕਰਵਾਇਆ। ਸ਼ਹਿਜ਼ਾਦ ਭੱਟੀ ਨੇ ਕਿਹਾ ਕਿ ਉਸਦਾ ਭਾਰਤ ਸਰਕਾਰ ਜਾਂ ਏਜੰਸੀਆਂ ਨਾਲ ਕੋਈ ਮਸਲਾ ਨਹੀਂ ਹੈ, ਸਗੋਂ ਸਿਰਫ ਲਾਰੈਂਸ ਬਿਸ਼ਨੋਈ ਨਾਲ ਹੈ।

ਭੱਟੀ ਨੇ ਦੋਸ਼ ਲਾਇਆ ਕਿ ਲਾਰੈਂਸ ਨੇ ਪਾਕਿਸਤਾਨ 'ਤੇ ਬੁਰੀ ਨਜ਼ਰ ਰੱਖੀ ਤੇ ਦਹਿਸ਼ਤ ਫੈਲਾਉਣ ਲਈ ਪੈਸੇ ਭੇਜੇ। ਉਸਨੇ ਕਿਹਾ ਕਿ ਜੇਕਰ ਲਾਰੈਂਸ ਫਿਰ ਅਜਿਹਾ ਕਰੇਗਾ ਤਾਂ ਉਹ ਦੁੱਗਣਾ-ਤਿੱਗਣਾ ਜਵਾਬ ਦੇਵੇਗਾ। ਸ਼ਹਿਜ਼ਾਦ ਨੇ ਲਾਰੈਂਸ ਉੱਪਰ ਆਪਣੇ ਭਰਾ ਅਨਮੋਲ ਬਿਸ਼ਨੋਈ ਨੂੰ ਬਚਾਉਣ ਲਈ ਐਫਬੀਆਈ (FBI) ਨਾਲ ਮਿਲੀਭਗਤ ਕਰਨ ਅਤੇ ਭਾਰਤ ਦੀ ਜਾਣਕਾਰੀ ਦੇਣ ਦਾ ਵੀ ਦੋਸ਼ ਲਾਇਆ। ਨਾਲ ਹੀ ਭੱਟੀ ਨੇ ਧਮਕੀ ਦਿੱਤੀ ਹੈ ਕਿ ਉਹ ਸਿੱਧੇ ਲਾਰੈਂਸ ਨਾਲ ਨਜਿੱਠੇਗਾ ਅਤੇ ਉਸਨੂੰ ਮਾਰਨ ਲਈ ਤਿਆਰ ਹੈ।

ਸ਼ਹਿਜ਼ਾਦ ਭੱਟੀ ਨੇ ਸਪੱਸ਼ਟ ਕਿਹਾ ਕਿ ਲਾਰੈਂਸ ਆਪਣੀ ਔਕਾਤ 'ਚ ਰਹੇ ਤੇ ਉਸਨੇ ਗੱਦਾਰੀ ਕੀਤੀ ਹੈ, ਜਿਸ ਕਾਰਨ ਉਸਦਾ ਇਸ ਦੁਨੀਆ 'ਚ ਰਹਿਣ ਦਾ ਕੋਈ ਹੱਕ ਨਹੀਂ। ਉਸਨੇ ਦਾਅਵਾ ਕੀਤਾ ਕਿ ਜੇਕਰ ਲਾਰੈਂਸ ਨੇ ਫਿਰ ਤੋਂ ਪਾਕਿਸਤਾਨ ਵੱਲ ਕੋਈ ਗਲਤ ਨਜ਼ਰ ਪਾਈ ਤਾਂ ਤਗੜਾ ਜਵਾਬ ਦਿੱਤਾ ਜਾਵੇਗਾ। ਸ਼ਹਿਜ਼ਾਦ ਭੱਟੀ ਨੇ ਕਿਹਾ ਕਿ ਉਸਨੇ ਲਾਰੈਂਸ ਨੂੰ ਉਸਦੇ ਸ਼ਹਿਰ 'ਚ ਵੜ ਕੇ ਜਵਾਬ ਦਿੱਤਾ ਹੈ ਤੇ ਧਮਕੀ ਦਿੱਤੀ ਕਿ ਉਹ ਉਸਨੂੰ ਜਾਂ ਤਾਂ ਖੁਦ ਮਾਰ ਦੇਵੇਗਾ ਜਾਂ ਉਸਨੂੰ ਦੇ ਦੇਵੇਗਾ, ਜਿਸਨੂੰ ਉਹ ਮਾਰ ਸਕੇ।

ਪਾਕਿਸਤਾਨ ਸਥਿਤ ਗੈਂਗਸਟਰ ਸ਼ਹਿਜ਼ਾਦ ਭੱਟੀ ਨੇ ਹਰਿਆਣਾ ਦੇ ਸਿਰਸਾ ਜ਼ਿਲ੍ਹੇ 'ਚ ਮਹਿਲਾ ਥਾਣੇ 'ਤੇ ਗ੍ਰੇਨੇਡ ਸੁੱਟਣ ਦਾ ਦਾਅਵਾ ਕੀਤਾ ਸੀ। ਇਹ ਘਟਨਾ 27-28 ਨਵੰਬਰ 2025 ਦੀ ਹੈ, ਜਦੋਂ ਥਾਣੇ ਦੇ ਬਾਹਰ ਵਿਸਫੋਟਕ ਸੁੱਟਿਆ ਗਿਆ ਤੇ ਪੁਲਿਸ ਨੇ 5 ਸ਼ੱਕੀਆਂ ਨੂੰ ਹਿਰਾਸਤ ਵਿੱਚ ਲੈ ਲਿਆ।