ਗੁੜਗਾਓਂ (ਰਾਘਵ) : ਬੁੱਧਵਾਰ ਸਵੇਰੇ ਕਰੀਬ 6.30 ਵਜੇ ਆਈਐੱਮਟੀ ਮਾਨੇਸਰ ਦੇ ਸੈਕਟਰ-6 ਸਥਿਤ ਗੱਤੇ ਦੀ ਫੈਕਟਰੀ 'ਚ ਅੱਗ ਲੱਗ ਗਈ। ਕੰਪਨੀ ਵਿੱਚ ਕਾਗਜ਼, ਗੱਤੇ ਅਤੇ ਲੱਕੜ ਦਾ ਸਮਾਨ ਹੋਣ ਕਾਰਨ ਅੱਗ ਬਹੁਤ ਤੇਜ਼ੀ ਨਾਲ ਫੈਲ ਗਈ। ਅੱਗ ਲੱਗਦੇ ਹੀ ਕੰਪਨੀ ਵਿੱਚ ਦਹਿਸ਼ਤ ਦਾ ਮਾਹੌਲ ਬਣ ਗਿਆ। ਅੱਗ ਲੱਗਣ ਦੀ ਸੂਚਨਾ ਮਿਲਦੇ ਹੀ ਮਾਨੇਸਰ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਮੌਕੇ 'ਤੇ ਪਹੁੰਚ ਗਈਆਂ। ਕੰਪਨੀ ਦੀਆਂ ਤਿੰਨ ਮੰਜ਼ਿਲਾਂ 'ਤੇ ਅੱਗ ਲੱਗਣ ਕਾਰਨ ਹੋਰ ਫਾਇਰ ਸਟੇਸ਼ਨਾਂ ਤੋਂ ਵੀ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਮੰਗਵਾਉਣੀਆਂ ਪਈਆਂ। ਅਧਿਕਾਰੀਆਂ ਮੁਤਾਬਕ ਕਰੀਬ 6 ਘੰਟੇ ਦੀ ਮਿਹਨਤ ਤੋਂ ਬਾਅਦ 11 ਫਾਇਰ ਟੈਂਡਰਾਂ ਵੱਲੋਂ ਅੱਗ 'ਤੇ ਪੂਰੀ ਤਰ੍ਹਾਂ ਕਾਬੂ ਪਾਇਆ ਜਾ ਸਕਿਆ। ਇਸ ਘਟਨਾ ਵਿੱਚ ਲੱਖਾਂ ਰੁਪਏ ਦਾ ਸਾਮਾਨ ਅਤੇ ਮਸ਼ੀਨਾਂ ਸੜ ਗਈਆਂ ਹਨ।

ਫਾਇਰ ਅਫਸਰ ਲਲਿਤ ਕੁਮਾਰ ਨੇ ਦੱਸਿਆ ਕਿ ਬੁੱਧਵਾਰ ਸਵੇਰੇ ਪਲਾਟ ਨੰਬਰ 28 ਵਿੱਚ ਸਥਿਤ ਕ੍ਰਿਸ਼ੀ ਪੇਪਰ ਐਂਡ ਪੈਕੇਜਿੰਗ ਕੰਪਨੀ ਵਿੱਚ ਅੱਗ ਲੱਗਣ ਦੀ ਸੂਚਨਾ ਮਿਲੀ ਸੀ।ਸੱਤ ਕੁ ਵਜੇ ਦੇ ਕਰੀਬ ਅੱਗ ਲੱਗਣ ਦੀ ਸੂਚਨਾ ਮਿਲਦਿਆਂ ਹੀ ਫਾਇਰ ਟੈਂਡਰ ਨੂੰ ਮੌਕੇ ’ਤੇ ਭੇਜਿਆ ਗਿਆ। ਘਟਨਾ 'ਚ ਕੋਈ ਵਿਅਕਤੀ ਜ਼ਖਮੀ ਨਹੀਂ ਹੋਇਆ। ਸਾਮਾਨ ਅਤੇ ਮਸ਼ੀਨਾਂ ਦੇ ਸੜਨ ਦੀ ਹੱਦ ਦਾ ਮੁਲਾਂਕਣ ਕੀਤਾ ਜਾ ਰਿਹਾ ਹੈ। ਸ਼ੁਰੂਆਤੀ ਜਾਂਚ 'ਚ ਅੱਗ ਲੱਗਣ ਦਾ ਕਾਰਨ ਸ਼ਾਰਟ ਸਰਕਟ ਦੱਸਿਆ ਜਾ ਰਿਹਾ ਹੈ, ਹਾਲਾਂਕਿ ਅਜੇ ਤੱਕ ਇਸ ਦੀ ਪੁਸ਼ਟੀ ਨਹੀਂ ਹੋ ਸਕੀ ਹੈ। ਕੰਪਨੀ ਵਿੱਚ ਰੱਖੇ ਕਾਗਜ਼ ਅਤੇ ਹੋਰ ਜਲਣਸ਼ੀਲ ਸਮੱਗਰੀ ਕਾਰਨ ਅੱਗ ਤੇਜ਼ੀ ਨਾਲ ਫੈਲ ਗਈ। ਕੰਪਨੀ 'ਚ ਗਰਾਊਂਡ ਫਲੋਰ, ਪਹਿਲੀ ਮੰਜ਼ਿਲ ਅਤੇ ਦੂਜੀ ਮੰਜ਼ਿਲ 'ਚ ਰੱਖਿਆ ਸਾਮਾਨ ਸੜ ਗਿਆ, ਜਦਕਿ ਬੇਸਮੈਂਟ 'ਚ ਰੱਖਿਆ ਸਾਮਾਨ ਅੱਗ ਤੋਂ ਬਚ ਗਿਆ। ਕੰਪਨੀ ਵਿੱਚ ਅੱਗ ਦੀਆਂ ਲਪਟਾਂ ਅਤੇ ਧੂੰਆਂ ਦੂਰੋਂ ਹੀ ਦਿਖਾਈ ਦੇ ਰਿਹਾ ਸੀ। ਕੰਪਨੀ 'ਚ ਲੱਗੀ ਅੱਗ ਨੂੰ ਬੁਝਾਉਣ ਲਈ 11 ਫਾਇਰ ਇੰਜਨ ਬੁਲਾਉਣੇ ਪਏ। ਇਨ੍ਹਾਂ ਵਿੱਚ ਮਾਨੇਸਰ ਫਾਇਰ ਸਟੇਸ਼ਨ ਤੋਂ ਪੰਜ ਗੱਡੀਆਂ, ਸੈਕਟਰ-29, ਸੈਕਟਰ-37, ਪਟੌਦੀ ਅਤੇ ਭੀਮ ਨਗਰ ਤੋਂ ਇੱਕ-ਇੱਕ ਵਾਹਨ ਸ਼ਾਮਲ ਸਨ। ਇਸ ਦੇ ਨਾਲ ਹੀ ਮਾਰੂਤੀ ਅਤੇ ਹੌਂਡਾ ਕੰਪਨੀਆਂ ਤੋਂ ਵੀ ਇਕ-ਇਕ ਗੱਡੀ ਵੀ ਮੰਗਵਾਈ ਗਈ।