ਨਵੀਂ ਦਿੱਲੀ (ਪਾਇਲ): ਅਫਗਾਨਿਸਤਾਨ 'ਚ ਪਿਛਲੇ ਤਿੰਨ ਦਿਨਾਂ ਤੋਂ ਹੋ ਰਹੀ ਭਾਰੀ ਬਰਫਬਾਰੀ ਅਤੇ ਭਾਰੀ ਮੀਂਹ ਨੇ ਭਾਰੀ ਤਬਾਹੀ ਮਚਾਈ ਹੈ। ਇਸ ਤਬਾਹੀ 'ਚ ਹੁਣ ਤੱਕ 61 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ ਅਤੇ 110 ਲੋਕ ਜ਼ਖਮੀ ਹੋਏ ਹਨ। ਅਫਗਾਨਿਸਤਾਨ ਡਿਜ਼ਾਸਟਰ ਮੈਨੇਜਮੈਂਟ ਅਥਾਰਟੀ (ANDMA) ਨੇ ਸ਼ਨੀਵਾਰ ਨੂੰ ਇਹ ਜਾਣਕਾਰੀ ਦਿੱਤੀ।

ਅਧਿਕਾਰੀਆਂ ਮੁਤਾਬਕ ਇਹ ਮੌਤਾਂ ਬੁੱਧਵਾਰ ਅਤੇ ਸ਼ੁੱਕਰਵਾਰ ਦਰਮਿਆਨ ਦੇਸ਼ ਦੇ ਮੱਧ ਅਤੇ ਉੱਤਰੀ ਸੂਬਿਆਂ 'ਚ ਹੋਈਆਂ। ਮੌਸਮ ਕਾਰਨ 458 ਘਰ ਪੂਰੀ ਤਰ੍ਹਾਂ ਜਾਂ ਅੰਸ਼ਕ ਤੌਰ 'ਤੇ ਨੁਕਸਾਨੇ ਗਏ ਹਨ। ਇਸ ਆਫ਼ਤ ਨਾਲ 360 ਪਰਿਵਾਰ ਪ੍ਰਭਾਵਿਤ ਹੋਏ ਹਨ। ANDMA ਦੇ ਬੁਲਾਰੇ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਬਰਫ਼ ਨਾਲ ਢੱਕੀਆਂ ਸੜਕਾਂ 'ਤੇ ਬੇਲੋੜਾ ਸਫ਼ਰ ਨਾ ਕਰਨ।

ਅਧਿਕਾਰੀਆਂ ਨੇ ਦੱਸਿਆ ਕਿ ਜ਼ਿਆਦਾਤਰ ਮੌਤਾਂ ਛੱਤ ਡਿੱਗਣ ਅਤੇ ਬਰਫ਼ ਦੇ ਤੋਦੇ ਡਿੱਗਣ ਕਾਰਨ ਹੋਈਆਂ ਹਨ। ਬਹੁਤ ਸਾਰੇ ਲੋਕਾਂ ਦੀ ਮੌਤ ਜ਼ੀਰੋ ਤੋਂ ਘੱਟ ਤਾਪਮਾਨ 'ਚ ਠੰਢ ਕਾਰਨ ਵੀ ਹੋਈ ਹੈ। ਦੱਖਣੀ ਸੂਬੇ ਕੰਧਾਰ ਵਿੱਚ ਇੱਕ ਘਰ ਦੀ ਛੱਤ ਡਿੱਗਣ ਕਾਰਨ ਛੇ ਬੱਚਿਆਂ ਦੀ ਮੌਤ ਹੋ ਗਈ। ਇਹ ਹਾਦਸਾ ਤੇਜ਼ ਹਨੇਰੀ ਅਤੇ ਭਾਰੀ ਮੀਂਹ ਦੌਰਾਨ ਵਾਪਰਿਆ।

ਅਫਗਾਨਿਸਤਾਨ ਦੀ ਮਹੱਤਵਪੂਰਨ ਸੜਕ, ਸਾਲੰਗ ਹਾਈਵੇਅ ਨੂੰ ਬੰਦ ਕਰ ਦਿੱਤਾ ਗਿਆ ਹੈ। ਇਹ ਸੜਕ ਰਾਜਧਾਨੀ ਕਾਬੁਲ ਨੂੰ ਉੱਤਰੀ ਸੂਬਿਆਂ ਨਾਲ ਜੋੜਦੀ ਹੈ। ਸੜਕ ਬੰਦ ਹੋਣ ਕਾਰਨ ਆਵਾਜਾਈ ਪੂਰੀ ਤਰ੍ਹਾਂ ਠੱਪ ਹੋ ਕੇ ਰਹਿ ਗਈ ਹੈ। ਕੇਂਦਰੀ ਪ੍ਰਾਂਤ ਬਾਮਿਯਾਨ ਵਿੱਚ ਇੱਕ ਪਹਾੜੀ ਰਸਤੇ 'ਤੇ ਫਸੇ ਯਾਤਰੀਆਂ ਨੂੰ ਭੋਜਨ ਸਮੱਗਰੀ ਵੰਡੀ ਗਈ।

ਇਸ ਤੋਂ ਇਲਾਵਾ, ਉਜ਼ਬੇਕਿਸਤਾਨ ਤੋਂ ਬਿਜਲੀ ਲਿਆਉਣ ਵਾਲੀ ਟਰਾਂਸਮਿਸ਼ਨ ਲਾਈਨ ਖਰਾਬ ਹੋ ਗਈ ਹੈ, ਜਿਸ ਕਾਰਨ ਲਗਭਗ 12 ਸੂਬਿਆਂ ਵਿਚ ਬਿਜਲੀ ਸਪਲਾਈ ਵਿਚ ਵਿਘਨ ਪਿਆ ਹੈ। ਬਿਜਲੀ ਵਿਭਾਗ ਅਨੁਸਾਰ ਤਕਨੀਕੀ ਟੀਮਾਂ ਤਿਆਰ ਹਨ, ਪਰ ਸਲਾਂਗ ਦੱਰਾ ਬੰਦ ਹੋਣ ਕਾਰਨ ਉਹ ਮੌਕੇ ’ਤੇ ਨਹੀਂ ਪਹੁੰਚ ਸਕੀਆਂ।

ਜਾਣਕਾਰੀ ਮੁਤਾਬਕ ਜੇਕਰ ਬਰਫ ਅਤੇ ਬਾਰਿਸ਼ ਨੂੰ ਸਹੀ ਤਰੀਕੇ ਨਾਲ ਸੰਭਾਲਿਆ ਜਾਵੇ ਤਾਂ ਇਹ ਦੇਸ਼ ਦੇ ਵਾਤਾਵਰਣ ਅਤੇ ਜੀਵਨ ਲਈ ਫਾਇਦੇਮੰਦ ਹਨ। ਪਰ ਤਿਆਰੀ ਅਤੇ ਸਮੇਂ ਸਿਰ ਮਦਦ ਨਾ ਮਿਲਣ ਕਾਰਨ ਇਹ ਕੁਦਰਤੀ ਘਟਨਾਵਾਂ ਵੱਡੇ ਦੁਖਾਂਤ ਬਣ ਜਾਂਦੀਆਂ ਹਨ।

ਦੱਸ ਦਇਏ ਕਿ ਅਫਗਾਨਿਸਤਾਨ ਦੀ 40 ਮਿਲੀਅਨ ਤੋਂ ਵੱਧ ਆਬਾਦੀ ਦੇ ਲਗਭਗ ਅੱਧੇ ਨੂੰ ਇਸ ਸਾਲ ਮਨੁੱਖੀ ਸਹਾਇਤਾ ਦੀ ਜ਼ਰੂਰਤ ਹੋਏਗੀ। ਵਿਦੇਸ਼ੀ ਸਹਾਇਤਾ ਵਿੱਚ ਕਮੀ ਅਤੇ ਲਗਾਤਾਰ ਆਉਣ ਵਾਲੀਆਂ ਕੁਦਰਤੀ ਆਫ਼ਤਾਂ ਲੋਕਾਂ ਦੀਆਂ ਮੁਸ਼ਕਲਾਂ ਵਿੱਚ ਵਾਧਾ ਕਰ ਰਹੀਆਂ ਹਨ।