ਪੱਤਰ ਪ੍ਰੇਰਕ : ਪਠਾਨਕੋਟ ਪੁਲਿਸ ਨੇ ਪੰਜਾਬ, ਜੰਮੂ-ਕਸ਼ਮੀਰ ਅਤੇ ਹਿਮਾਚਲ ਪ੍ਰਦੇਸ਼ ਰਾਜਾਂ ਵਿੱਚ ਚੱਲ ਰਹੇ ਕ੍ਰਿਕਟ ਵਿਸ਼ਵ ਕੱਪ ਨਾਲ ਜੁੜੇ ਇੱਕ ਅੰਤਰਰਾਜੀ ਸੱਟੇਬਾਜ਼ੀ ਸਿੰਡੀਕੇਟ ਦਾ ਸਫਲਤਾਪੂਰਵਕ ਪਰਦਾਫਾਸ਼ ਕੀਤਾ ਹੈ। ਇਸ ਅਹਿਮ ਕਾਰਵਾਈ ਵਿੱਚ ਅੱਠ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਫੜੇ ਗਏ ਵਿਅਕਤੀਆਂ ਦੀ ਪਛਾਣ ਸੰਨੀ ਮਹਾਜਨ, ਰਮੇਸ਼ ਕੁਮਾਰ ਵਾਸੀ ਕਾਜੀਆਂ ਮੁਹੱਲਾ, ਵਰਿੰਦਰ ਜੋਸ਼ੀ ਵਾਸੀ ਅਬਰੋਲ ਨਗਰ, ਕਾਮੇਸ਼ਵਰ ਸਿੰਘ ਵਾਸੀ ਨੇੜੇ ਪੰਜਾਬ ਮੁਹੱਲਾ, ਸਾਹਿਲ ਮਹਾਜਨ ਵਾਸੀ ਜਿੰਦਰੀਆਂ ਮੁਹੱਲਾ, ਅਨੂਪ ਸ਼ਰਮਾ ਵਾਸੀ ਜਿੰਦਰੀਆਂ ਮੁਹੱਲਾ, ਬਲਵਿੰਦਰ ਸਿੰਘ ਵਾਸੀ ਪ੍ਰੀਤ ਨਗਰ, ਰਾਹੁਲ ਗੋਸਾਈਂ ਵਾਸੀ ਸ਼ੇਖਾਂ ਬਾਜ਼ਾਰ ਤੇਲ ਵਾਲੀ ਗਲੀ ਜਲੰਧਰ, ਗੋਵਿੰਦ ਗਿਰੀ ਕੋਠੇ ਮਾਨਵਾਲ ਵਜੋਂ ਹੋਈ ਹੈ।

ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਐੱਸ.ਐੱਸ.ਪੀ. ਹਰਕਮਲਪ੍ਰੀਤ ਸਿੰਘ ਖੱਖ ਨੇ ਖੁਲਾਸਾ ਕੀਤਾ ਕਿ ਗੁਪਤ ਸੂਚਨਾ 'ਤੇ ਕਾਰਵਾਈ ਕਰਦੇ ਹੋਏ ਥਾਣਾ ਸ਼ਾਹਪੁਰਕੰਡੀ ਦੇ ਇੰਚਾਰਜ ਸ਼ੋਹਰਤ ਮਾਨ ਦੀ ਅਗਵਾਈ 'ਚ ਡੀ.ਐੱਸ.ਪੀ. ਹੈੱਡਕੁਆਰਟਰ ਨਛੱਤਰ ਸਿੰਘ ਦੀ ਅਗਵਾਈ ਹੇਠ ਵਿਸ਼ੇਸ਼ ਟੀਮ ਨੇ ਅੱਠ ਵਿਅਕਤੀਆਂ ਨੂੰ ਕਾਬੂ ਕੀਤਾ ਹੈ। ਇਹ ਅਪਰਾਧੀ ਪੰਜਾਬ, ਜੰਮੂ-ਕਸ਼ਮੀਰ ਅਤੇ ਹਿਮਾਚਲ ਪ੍ਰਦੇਸ਼ ਸਮੇਤ ਕਈ ਰਾਜਾਂ ਤੋਂ ਮੋਬਾਈਲ ਫੋਨ ਐਪਲੀਕੇਸ਼ਨ ਰਾਹੀਂ ਆਪਣੀਆਂ ਗਤੀਵਿਧੀਆਂ ਨੂੰ ਅੰਜਾਮ ਦੇ ਰਹੇ ਸਨ।

ਜ਼ਬਤ ਕੀਤੀਆਂ ਗਈਆਂ ਵਸਤਾਂ ਵਿੱਚ ਤਿੰਨ ਲੈਪਟਾਪ, ਸੱਟੇਬਾਜ਼ੀ ਐਕਸਚੇਂਜ ਸਿਸਟਮ ਵਿੱਚ ਏਕੀਕ੍ਰਿਤ ਅੱਠ ਮੋਬਾਈਲ ਉਪਕਰਣ, ਸੱਟੇਬਾਜ਼ੀ ਲਈ ਵਿਸ਼ੇਸ਼ ਤੌਰ 'ਤੇ ਸਮਰਪਿਤ 20 ਮੋਬਾਈਲ ਫੋਨ, ਇੱਕ ਰਿਕਾਰਡਰ, ਪੰਜ ਕਾਪੀਆਂ/ਰਜਿਸਟਰ ਅਤੇ 11.50 ਲੱਖ ਰੁਪਏ ਦੀ ਨਕਦੀ ਸ਼ਾਮਲ ਹੈ।