ਜਲੰਧਰ (ਦੇਵ ਇੰਦਰਜੀਤ) : ਰਾਤ ਨੂੰ ਇਕ ਐਂਬੂਲੈਂਸ ਚਾਲਕ ਕੈਂਸਰ ਦੇ ਮਰੀਜ਼ ਨੂੰ ਸੜਕ ਕਿਨਾਰੇ ਤਡ਼ਫਦਾ ਛੱਡ ਗਿਆ। ਲਗਪਗ 20 ਮਿੰਟਾਂ ਲਈ ਮਰੀਜ਼ ਸੜਕ 'ਤੇ ਹੀ ਤਡ਼ਫਦਾ ਰਿਹਾ। ਮੌਕੇ 'ਤੇ ਲੰਘ ਰਹੀ ਪੁਲਿਸ ਟੀਮ ਨੇ ਉਸਨੂੰ ਵੇਖਿਆ ਅਤੇ ਰਿਸ਼ਤੇਦਾਰਾਂ ਨਾਲ ਸੰਪਰਕ ਕਰਕੇ ਉਨ੍ਹਾਂ ਨੂੰ ਬੁਲਾਇਆ। ਮਰੀਜ਼ ਦਾ ਬੇਟਾ ਇਕ ਹੋਰ ਕਾਰ ਲੈ ਕੇ ਆਇਆ ਅਤੇ ਪਿਤਾ ਨੂੰ ਇਲਾਜ ਲਈ ਅੰਮ੍ਰਿਤਸਰ ਲੈ ਕੇ ਗਿਆ।

ਫਗਵਾੜਾ ਦੇ ਵਸਨੀਕ ਨਵਦੀਪ ਨੇ ਦੱਸਿਆ ਕਿ ਉਸ ਦੇ ਪਿਤਾ ਸਤਨਾਮ ਸਿੰਘ ਨੂੰ ਚੂਲ੍ਹੇ ਦਾ ਕੈਂਸਰ ਹੈ। ਉਸ ਨੂੰ ਇਲਾਜ ਲਈ ਜਲੰਧਰ ਦੇ ਨਿਊ ਰੂਬੀ ਹਸਪਤਾਲ ਵਿਚ ਦਾਖ਼ਲ ਕਰਵਾਇਆ ਗਿਆ ਸੀ। ਹਾਲਤ ਗੰਭੀਰ ਹੋਣ 'ਤੇ ਉਸ ਨੂੰ ਸ਼੍ਰੀਮਨ ਹਸਪਤਾਲ ਲਿਜਾਣ ਦੀ ਸਲਾਹ ਦਿੱਤੀ ਗਈ ਸੀ।

ਉਸਦਾ ਛੋਟਾ ਭਰਾ ਸ਼੍ਰੀਮਨ ਹਸਪਤਾਲ ਗਿਆ ਅਤੇ ਬੈੱਡ ਖਾਲੀ ਕਰਨ ਅਤੇ ਆਪਣੇ ਪਿਤਾ ਨੂੰ ਦਾਖ਼ਲ ਕਰਨ ਦੀ ਗੱਲ ਕੀਤੀ। ਇਸ ਦੌਰਾਨ ਹਸਪਤਾਲ ਦੇ ਚਾਲਕਾਂ ਨੇ ਇਕ ਐਂਬੂਲੈਂਸ ਬੁਲਾ ਕੇ ਉਸ ਦੇ ਪਿਤਾ ਸਤਨਾਮ ਸਿੰਘ ਨੂੰ ਰੈਫਰ ਕਰ ਦਿੱਤਾ। ਉਸ ਨੇ ਦੋਸ਼ ਲਾਇਆ ਕਿ ਐਂਬੂਲੈਂਸ ਉਸ ਦੇ ਪਿਤਾ ਨੂੰ ਲੈ ਕੇ ਗਈ ਅਤੇ ਫਿਰ ਰਾਤ 10 ਵਜੇ ਨਾਮਦੇਵ ਚੌਕ ਨੇੜੇ ਸੜਕ 'ਤੇ ਉਸ ਨੂੰ ਛੱਡ ਦਿੱਤਾ। ਉਸਨੇ ਐਂਬੂਲੈਂਸ ਲਈ 900 ਰੁਪਏ ਵੀ ਮੰਗੇ। ਉਸ ਸਮੇਂ ਉਸ ਦੇ ਪਿਤਾ ਕੋਲ ਪੈਸੇ ਨਹੀਂ ਸਨ, ਇਸਦੇ ਬਾਵਜੂਦ ਐਂਬੂਲੈਂਸ ਚਾਲਕ ਉਸਨੂੰ ਬਿਨ੍ਹਾਂ ਕਿਸੇ ਪ੍ਰਬੰਧ ਦੇ ਉਥੇ ਛੱਡ ਕੇ ਚਲਾ ਗਿਆ। ਉਸ ਨੇ ਇਲਜ਼ਾਮ ਲਗਾਇਆ ਹੈ ਕਿ ਐਂਬੂਲੈਂਸ ਨੂੰ ਮਹਿੰਗੀ ਸਵਾਰੀ ਨੂੰ ਲੈ ਜਾਣ ਲਈ ਫ਼ੋਨ ਆਇਆ ਸੀ। ਇਸੇ ਕਰਕੇ ਉਹ ਪਿਤਾ ਨੂੰ ਹਸਪਤਾਲ ਛੱਡਣ ਦੀ ਬਜਾਏ ਸੜਕ ਕਿਨਾਰੇ ਛੱਡ ਕੇ ਫਰਾਰ ਹੋ ਗਿਆ।