ਨਿਊਜ਼ ਡੈਸਕ (ਰਿੰਪੀ ਸ਼ਰਮਾ) : ਯੂਨਾਈਟਿਡ ਕਿੰਗਡਮ ਤੋਂ ਸ਼ੁਰੂ ਹੋਏ MonkeyPox ਵਾਇਰਸ ਦੇ ਮਾਮਲੇ ਹੁਣ 12 ਤੋਂ ਵੱਧ ਦੇਸ਼ਾਂ ਵਿੱਚ ਸਾਹਮਣੇ ਆ ਚੁੱਕੇ ਹਨ। ਇਹ ਮੰਨਿਆ ਜਾ ਰਿਹਾ ਹੈ ਕਿ ਇਹ ਸੰਕਰਮਣ ਉਦੋਂ ਫੈਲਿਆ ਜਦੋਂ ਯੂਕੇ 'ਚ ਕੁਝ ਸੰਕਰਮਿਤ ਲੋਕ ਨਾਈਜੀਰੀਆ ਗਏ ਸਨ।

WHO ਦੇ ਅਨੁਸਾਰ, ਹੁਣ ਤੱਕ ਲਗਭਗ 80 ਮਾਮਲਿਆਂ ਦੀ ਪੁਸ਼ਟੀ ਹੋ ​​ਚੁੱਕੀ ਹੈ ਅਤੇ 50 ਜਾਂਚਾਂ ਅਜੇ ਬਾਕੀ ਹਨ। ਜਦਕਿ ਇਸ ਦੇ ਮਾਮਲੇ ਹੋਰ ਵਧਣ ਦੀ ਸੰਭਾਵਨਾ ਹੈ। ਇੰਡੀਅਨ ਐਕਸਪ੍ਰੈਸ ਦੇ ਅਨੁਸਾਰ, MonkeyPox ਇੱਕ ਜ਼ੂਨੋਸਿਸ ਬਿਮਾਰੀ ਹੈ ਜੋ ਜਾਨਵਰਾਂ ਤੋਂ ਮਨੁੱਖਾਂ ਵਿੱਚ ਫੈਲਦੀ ਹੈ।

MonkeyPox ਕੀ ਹੈ : MonkeyPox ਇੱਕ ਜ਼ੂਨੋਸਿਸ ਬਿਮਾਰੀ ਹੈ ਜੋ ਜਾਨਵਰਾਂ ਤੋਂ ਮਨੁੱਖਾਂ ਵਿੱਚ ਫੈਲਦੀ ਹੈ। ਇਹ ਚੇਚਕ ਵਰਗਾ ਇੱਕ ਆਰਥੋਪੋਕਸ ਵਾਇਰਸ ਹੈ ਪਰ ਚੇਚਕ ਨਾਲੋਂ ਘੱਟ ਗੰਭੀਰ ਹੈ। ਇਹ ਪਹਿਲੀ ਵਾਰ 1958 ਵਿੱਚ ਖੋਜਿਆ ਗਿਆ ਸੀ। ਫਿਰ ਪ੍ਰਯੋਗਸ਼ਾਲਾ ਦੇ ਬਾਂਦਰਾਂ ਵਿੱਚ ਚੇਚਕ ਵਰਗੀ ਬਿਮਾਰੀ ਦੇ ਦੋ ਲੱਛਣ ਦੇਖੇ ਗਏ ਅਤੇ ਉਨ੍ਹਾਂ ਨੂੰ ਖੋਜ ਲਈ ਇੱਥੇ ਰੱਖਿਆ ਗਿਆ। ਸਾਲ 1970 ਵਿੱਚ ਪਹਿਲੀ ਵਾਰ ਇਹ ਮਨੁੱਖ ਵਿੱਚ ਪਾਇਆ ਗਿਆ ਸੀ।

MonkeyPox ਕਿਵੇਂ ਫੈਲਦਾ ਹੈ
MonkeyPox ਕਿਸੇ ਲਾਗ ਵਾਲੇ ਵਿਅਕਤੀ ਜਾਂ ਜਾਨਵਰ ਦੇ ਸੰਪਰਕ 'ਚ ਆਉਣ ਨਾਲ ਫੈਲਦਾ ਹੈ। ਇਹ ਵਾਇਰਸ ਮਰੀਜ਼ ਦੇ ਜ਼ਖ਼ਮ ਵਿੱਚੋਂ ਬਾਹਰ ਨਿਕਲਦੇ ਹੋਏ ਅੱਖਾਂ, ਨੱਕ, ਕੰਨ ਅਤੇ ਮੂੰਹ ਰਾਹੀਂ ਸਰੀਰ ਵਿੱਚ ਦਾਖਲ ਹੁੰਦਾ ਹੈ। ਇਸ ਤੋਂ ਇਲਾਵਾ ਬਾਂਦਰ, ਚੂਹੇ 'ਤੇ ਗਿਲਹਰੀਆਂ ਵਰਗੇ ਜਾਨਵਰਾਂ ਦੇ ਕੱਟਣ ਨਾਲ ਵੀ ਇਹ ਵਾਇਰਸ ਫੈਲਣ ਦਾ ਡਰ ਬਣਿਆ ਰਹਿੰਦਾ ਹੈ।

MonkeyPox ਦੇ ਲੱਛਣ
ਰੋਗ ਨਿਯੰਤਰਣ ਅਤੇ ਰੋਕਥਾਮ ਕੇਂਦਰ ਦੇ ਅਨੁਸਾਰ, MonkeyPox ਬੁਖਾਰ, ਸਿਰ ਦਰਦ, ਮਾਸਪੇਸ਼ੀਆਂ ਵਿੱਚ ਦਰਦ ਅਤੇ ਥਕਾਵਟ ਨਾਲ ਸ਼ੁਰੂ ਹੁੰਦਾ ਹੈ। ਲਾਗ ਤੋਂ ਲੈ ਕੇ MonkeyPox ਦੇ ਲੱਛਣਾਂ ਤੱਕ ਦਾ ਸਮਾਂ ਆਮ ਤੌਰ 'ਤੇ 7-14 ਦਿਨ ਹੁੰਦਾ ਹੈ ਪਰ ਇਹ 5-21 ਦਿਨਾਂ ਤੱਕ ਦਾ ਵੀ ਹੋ ਸਕਦਾ ਹੈ। ਬੁਖਾਰ ਸ਼ੁਰੂ ਹੋਣ ਤੋਂ ਬਾਅਦ 1 ਤੋਂ 3 ਦਿਨਾਂ ਦੇ ਅੰਦਰ, ਮਰੀਜ਼ ਦੇ ਸਰੀਰ ਉੱਤੇ ਧੱਫੜ ਨਿਕਲ ਆਉਂਦੇ ਹਨ ਜੋ ਅਕਸਰ ਚਿਹਰੇ ਤੋਂ ਸ਼ੁਰੂ ਹੁੰਦੇ ਹਨ। ਫਿਰ ਇਹ ਵਾਇਰਲ ਹੌਲੀ-ਹੌਲੀ ਸਰੀਰ ਦੇ ਹੋਰ ਹਿੱਸਿਆਂ ਵਿੱਚ ਫੈਲ ਜਾਂਦਾ ਹੈ।