ਦਤੀਆ (ਰਾਘਵ) : ਮੱਧ ਪ੍ਰਦੇਸ਼ ਦੇ ਦਤੀਆ ਜ਼ਿਲੇ 'ਚ ਭਾਰੀ ਮੀਂਹ ਤੋਂ ਬਾਅਦ ਕਿਲੇ ਦੀ ਕੰਧ ਡਿੱਗਣ ਨਾਲ 7 ਲੋਕਾਂ ਦੀ ਮੌਤ ਹੋ ਗਈ। ਕਲੈਕਟਰ ਮੁਤਾਬਕ ਇਹ ਘਟਨਾ ਵੀਰਵਾਰ ਸਵੇਰੇ ਕਰੀਬ 4 ਵਜੇ ਜ਼ਿਲ੍ਹੇ ਦੇ ਖਲਕਾਪੁਰਾ ਇਲਾਕੇ 'ਚ ਵਾਪਰੀ। ਸਥਾਨਕ ਲੋਕਾਂ ਨੇ ਏਜੰਸੀ ਨੂੰ ਦੱਸਿਆ ਕਿ ਦਤੀਆ ਵਿੱਚ ਰਾਜਗੜ੍ਹ ਕਿਲ੍ਹੇ ਦੀ ਕੰਧ ਢਹਿ ਗਈ ਅਤੇ ਨਾਲ ਲੱਗਦੇ ਇੱਕ ਘਰ ਉੱਤੇ ਡਿੱਗ ਗਈ, ਜਿਸ ਵਿੱਚ ਇੱਕੋ ਪਰਿਵਾਰ ਦੇ 9 ਲੋਕ ਫਸ ਗਏ। ਸਥਾਨਕ ਲੋਕਾਂ ਨੇ ਇਨ੍ਹਾਂ 'ਚੋਂ ਦੋ ਨੂੰ ਬਚਾ ਲਿਆ, ਜਦਕਿ ਸੱਤ ਲੋਕ ਉਥੇ ਹੀ ਫਸੇ ਰਹੇ।

ਕੁਲੈਕਟਰ ਨੇ ਦੱਸਿਆ ਕਿ ਘਟਨਾ ਸਥਾਨ ਨੂੰ ਜਾਣ ਵਾਲੀ ਸੜਕ ਬਹੁਤ ਤੰਗ ਸੀ, ਜਿਸ ਕਾਰਨ ਜੇਸੀਬੀ ਅਤੇ ਪੋਕਲੇਨ ਮਸ਼ੀਨ ਉੱਥੇ ਨਹੀਂ ਪਹੁੰਚ ਸਕੀ। ਇਸ ਲਈ ਉਸਨੇ SDERF (ਸਟੇਟ ਡਿਜ਼ਾਸਟਰ ਐਮਰਜੈਂਸੀ ਰਿਸਪਾਂਸ ਫੋਰਸ) ਟੀਮ ਅਤੇ ਪੁਲਿਸ ਸੁਪਰਡੈਂਟ, ਉਪ ਮੰਡਲ ਮੈਜਿਸਟ੍ਰੇਟ ਅਤੇ ਹੋਰ ਅਧਿਕਾਰੀਆਂ ਨੂੰ ਬੁਲਾਇਆ। ਮੌਕੇ 'ਤੇ ਪਹੁੰਚੀ ਐਸਡੀਆਰਐਫ ਟੀਮ ਦੀ ਮਦਦ ਨਾਲ ਤਿੰਨ ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ, ਜਿਸ ਤੋਂ ਬਾਅਦ ਪੋਕਲੇਨ ਮਸ਼ੀਨ ਦੀ ਵਰਤੋਂ ਕਰਕੇ ਕੰਧ ਨੂੰ ਥੋੜਾ ਹੋਰ ਤੋੜਿਆ ਗਿਆ ਅਤੇ ਫਿਰ ਸਾਰੀਆਂ ਸੱਤ ਲਾਸ਼ਾਂ ਨੂੰ ਮੌਕੇ ਤੋਂ ਬਰਾਮਦ ਕੀਤਾ ਗਿਆ। ਕੁਲੈਕਟਰ ਨੇ ਕਿਹਾ ਕਿ ਮੁੱਖ ਮੰਤਰੀ ਮੋਹਨ ਯਾਦਵ ਨੇ ਇਸ ਘਟਨਾ 'ਤੇ ਚਿੰਤਾ ਪ੍ਰਗਟ ਕੀਤੀ ਹੈ ਅਤੇ ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ ਸੂਬਾ ਸਰਕਾਰ ਵੱਲੋਂ 4-4 ਲੱਖ ਰੁਪਏ ਦੀ ਰਾਹਤ ਰਾਸ਼ੀ ਦੇਣ ਦਾ ਐਲਾਨ ਕੀਤਾ ਹੈ।

ਮ੍ਰਿਤਕਾਂ ਦੀ ਪਛਾਣ ਸ਼ਿਵਮ ਵੰਸ਼ਕਰ (22), ਸੂਰਜ ਵੰਸ਼ਕਰ (18), ਕਿਸ਼ਨ ਵੰਸ਼ਕਰ (60), ਪ੍ਰਭਾ ਵੰਸ਼ਕਰ (56), ਨਿਰੰਜਨ ਵੰਸ਼ਕਰ (60), ਮਮਤਾ ਵੰਸ਼ਕਰ (55) ਅਤੇ ਰਾਧਾ ਵੰਸ਼ਕਰ (25) ਵਜੋਂ ਹੋਈ ਹੈ। ਜ਼ਖਮੀਆਂ ਦੀ ਪਛਾਣ ਮੁੰਨਾ ਵੰਸ਼ਕਰ (59) ਅਤੇ ਆਕਾਸ਼ ਵੰਸ਼ਕਰ (25) ਵਜੋਂ ਹੋਈ ਹੈ।