ਕਰਾਚੀ (ਰਾਘਵ) : ਭਾਰਤ ਅਤੇ ਪਾਕਿਸਤਾਨ ਵਿਚਾਲੇ ਜੰਗਬੰਦੀ ਲਾਗੂ ਹੋ ਗਈ ਹੈ। ਇਸ ਦੌਰਾਨ ਪਾਕਿਸਤਾਨ ਦੇ ਅਸ਼ਾਂਤ ਬਲੋਚਿਸਤਾਨ ਸੂਬੇ ਤੋਂ ਬੰਬ ਧਮਾਕੇ ਦੀ ਖ਼ਬਰ ਆਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਬੰਬ ਧਮਾਕੇ 'ਚ ਘੱਟੋ-ਘੱਟ 4 ਲੋਕਾਂ ਦੀ ਮੌਤ ਹੋ ਗਈ, ਜਦਕਿ 20 ਲੋਕ ਜ਼ਖਮੀ ਹੋ ਗਏ। ਬਲੋਚਿਸਤਾਨ ਦੇ ਕਿਲਾ ਅਬਦੁੱਲਾ ਜ਼ਿਲੇ ਦੇ ਜੱਬਾਰ ਮਾਰਕੀਟ ਨੇੜੇ ਐਤਵਾਰ ਨੂੰ ਇਕ ਧਮਾਕਾ ਹੋਇਆ, ਜਿਸ ਨਾਲ ਇਮਾਰਤ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਅਤੇ ਦਹਿਸ਼ਤ ਫੈਲ ਗਈ।

ਧਮਾਕੇ ਤੋਂ ਬਾਅਦ ਕਈ ਦੁਕਾਨਾਂ ਢਹਿ ਗਈਆਂ ਅਤੇ ਕਈ ਅਦਾਰਿਆਂ ਨੂੰ ਅੱਗ ਲੱਗ ਗਈ। ਇਸ ਸਬੰਧੀ ਡਿਪਟੀ ਕਮਿਸ਼ਨਰ ਰਿਆਜ਼ ਖਾਨ ਦਾ ਬਿਆਨ ਵੀ ਸਾਹਮਣੇ ਆਇਆ ਹੈ। ਉਨ੍ਹਾਂ ਨੇ ਕਿਹਾ- ਧਮਾਕੇ 'ਚ ਚਾਰ ਲੋਕਾਂ ਦੀ ਮੌਤ ਹੋ ਗਈ ਹੈ ਅਤੇ 20 ਹੋਰ ਜ਼ਖਮੀ ਹੋ ਗਏ ਹਨ। ਡਿਪਟੀ ਕਮਿਸ਼ਨਰ ਨੇ ਅੱਗੇ ਦੱਸਿਆ ਕਿ ਇਹ ਮਾਰਕੀਟ ਫਰੰਟੀਅਰ ਕੋਰ (ਐਫ.ਸੀ.) ਕਿਲੇ ਦੀ ਪਿਛਲੀ ਕੰਧ ਦੇ ਨੇੜੇ ਸਥਿਤ ਹੈ। ਧਮਾਕੇ ਤੋਂ ਬਾਅਦ, ਅਣਪਛਾਤੇ ਹਮਲਾਵਰਾਂ ਅਤੇ ਐਫਸੀ ਕਰਮਚਾਰੀਆਂ ਵਿਚਕਾਰ ਥੋੜ੍ਹੀ ਦੇਰ ਤੱਕ ਗੋਲੀਬਾਰੀ ਹੋਈ। ਇਹ ਧਮਾਕਾ ਖੁਜ਼ਦਾਰ ਜ਼ਿਲੇ ਦੇ ਨਲ ਇਲਾਕੇ 'ਚ ਇਕ ਚੈਕ ਪੋਸਟ 'ਤੇ ਅਣਪਛਾਤੇ ਹਥਿਆਰਬੰਦ ਵਿਅਕਤੀਆਂ ਵੱਲੋਂ ਕੀਤੇ ਗਏ ਘਾਤਕ ਬੰਦੂਕ ਦੇ ਹਮਲੇ 'ਚ ਚਾਰ ਲੇਵੀਜ਼ ਦੇ ਜਵਾਨਾਂ ਦੇ ਮਾਰੇ ਜਾਣ ਤੋਂ ਕੁਝ ਦਿਨ ਬਾਅਦ ਹੋਇਆ ਹੈ।

ਬਲੋਚਿਸਤਾਨ ਕਰੀਬ ਦੋ ਦਹਾਕਿਆਂ ਤੋਂ ਸਥਾਨਕ ਨਸਲੀ ਬਲੋਚ ਸਮੂਹਾਂ ਅਤੇ ਪਾਰਟੀਆਂ ਵੱਲੋਂ ਲਾਏ ਦੋਸ਼ਾਂ ਕਾਰਨ ਅਸ਼ਾਂਤੀ ਦਾ ਸਾਹਮਣਾ ਕਰ ਰਿਹਾ ਹੈ। ਕਾਨੂੰਨ ਲਾਗੂ ਕਰਨ ਵਾਲੇ ਅਧਿਕਾਰੀਆਂ ਨੇ ਖੇਤਰ ਨੂੰ ਸੀਲ ਕਰ ਦਿੱਤਾ ਅਤੇ ਵੱਡੇ ਪੱਧਰ 'ਤੇ ਤਲਾਸ਼ੀ ਅਤੇ ਨਿਕਾਸੀ ਮੁਹਿੰਮ ਚਲਾਈ। ਜ਼ਖਮੀਆਂ ਵਿਚ ਕਬਾਇਲੀ ਬਜ਼ੁਰਗ ਹਾਜੀ ਫੈਜ਼ੁੱਲਾ ਖਾਨ ਗਾਬੀਜ਼ਈ ਦਾ ਸੁਰੱਖਿਆ ਗਾਰਡ ਅਤੇ ਕਈ ਰਾਹਗੀਰ ਸ਼ਾਮਲ ਹਨ।