ਕਾਠਮੰਡੂ (ਜਸਪ੍ਰੀਤ) : ਨੇਪਾਲ 'ਚ ਦੁਨੀਆ ਦੀ ਸੱਤਵੀਂ ਸਭ ਤੋਂ ਉੱਚੀ ਚੋਟੀ 'ਮਾਊਂਟ ਧੌਲਾਗਿਰੀ' ਤੋਂ ਫਿਸਲਣ ਨਾਲ 5 ਰੂਸੀ ਪਰਬਤਾਰੋਹੀਆਂ ਦੀ ਮੌਤ ਹੋ ਗਈ ਹੈ। ਪਰਬਤਾਰੋਹ ਮੁਹਿੰਮ ਦੇ ਇਕ ਆਯੋਜਕ ਨੇ ਮੰਗਲਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਰੂਸੀ ਪਰਬਤਾਰੋਹੀ ਨੇਪਾਲ ਦੇ ਪਤਝੜ ਪਰਬਤਾਰੋਹੀ ਸੀਜ਼ਨ ਦੌਰਾਨ 8,167 ਮੀਟਰ ਉੱਚੇ ਧੌਲਾਗਿਰੀ ਪਰਬਤ ਦੀ ਚੋਟੀ 'ਤੇ ਚੜ੍ਹ ਰਹੇ ਸਨ।

ਕਾਠਮੰਡੂ ਸਥਿਤ I AM ਟ੍ਰੈਕਿੰਗ ਐਂਡ ਐਕਸਪੀਡੀਸ਼ਨਜ਼ ਦੇ ਪੇਮਬਾ ਜੰਗਬੂ ਸ਼ੇਰਪਾ ਨੇ ਕਿਹਾ ਕਿ ਪਰਬਤਾਰੋਹੀ ਐਤਵਾਰ ਤੋਂ ਲਾਪਤਾ ਸਨ ਅਤੇ ਮੰਗਲਵਾਰ ਨੂੰ ਉਨ੍ਹਾਂ ਦੀਆਂ ਲਾਸ਼ਾਂ ਨੂੰ ਇੱਕ ਬਚਾਅ ਹੈਲੀਕਾਪਟਰ ਦੁਆਰਾ ਦੇਖਿਆ ਗਿਆ। ਧੌਲਾਗਿਰੀ ਪਰਬਤ ਤੋਂ ਲਾਸ਼ਾਂ ਨੂੰ ਕਦੋਂ ਅਤੇ ਕਿਵੇਂ ਹੇਠਾਂ ਲਿਆਂਦਾ ਜਾਵੇਗਾ ਇਸ ਬਾਰੇ ਅਜੇ ਫੈਸਲਾ ਨਹੀਂ ਕੀਤਾ ਗਿਆ ਹੈ ਕਿਉਂਕਿ ਇਸ ਲਈ ਵਿਆਪਕ ਯੋਜਨਾਬੰਦੀ, ਮਨੁੱਖੀ ਸ਼ਕਤੀ ਅਤੇ ਸਾਜ਼ੋ-ਸਾਮਾਨ ਦੀ ਲੋੜ ਹੋਵੇਗੀ। ਕਿਹਾ ਜਾਂਦਾ ਹੈ ਕਿ ਦੋ ਪਰਬਤਰੋਹੀ ਸਿਖਰ 'ਤੇ ਪਹੁੰਚ ਗਏ ਸਨ ਪਰ ਬਾਕੀ ਪਰਬਤਾਰੋਹੀ ਸਿਖਰ 'ਤੇ ਪਹੁੰਚੇ ਬਿਨਾਂ ਵਾਪਸ ਪਰਤ ਗਏ ਸਨ। ਇਸ ਤੋਂ ਬਾਅਦ ਉਸ ਦਾ ਅਤੇ ਬੇਸ ਕੈਂਪ ਵਿੱਚ ਮੌਜੂਦ ਟੀਮ ਮੈਂਬਰਾਂ ਵਿਚਕਾਰ ਰੇਡੀਓ ਸੰਪਰਕ ਟੁੱਟ ਗਿਆ।