ਵੈਲਿੰਗਟਨ (ਨੇਹਾ): ਨਿਊਜ਼ੀਲੈਂਡ ਭੂਚਾਲ ਦੇ ਤੇਜ਼ ਝਟਕਿਆਂ ਨਾਲ ਹਿੱਲ ਗਿਆ। ਅਧਿਕਾਰੀਆਂ ਮੁਤਾਬਕ ਨਿਊਜ਼ੀਲੈਂਡ ਦੇ ਦੱਖਣੀ ਟਾਪੂ 'ਤੇ ਲੋਕਾਂ ਨੇ ਭੂਚਾਲ ਦੇ ਤੇਜ਼ ਝਟਕੇ ਮਹਿਸੂਸ ਕੀਤੇ। ਰਿਕਟਰ ਪੈਮਾਨੇ 'ਤੇ ਭੂਚਾਲ ਦੀ ਤੀਬਰਤਾ 6.7 ਮਾਪੀ ਗਈ। ਹੁਣ ਨਿਊਜ਼ੀਲੈਂਡ ਦੀ ਡਿਜ਼ਾਸਟਰ ਏਜੰਸੀ ਇਸ ਗੱਲ ਦਾ ਮੁਲਾਂਕਣ ਕਰਨ 'ਚ ਲੱਗੀ ਹੋਈ ਹੈ ਕਿ ਕੀ ਸੁਨਾਮੀ ਦਾ ਕੋਈ ਖਤਰਾ ਹੈ ਜਾਂ ਨਹੀਂ। ਜ਼ਿਕਰਯੋਗ ਹੈ ਕਿ ਨਿਊਜ਼ੀਲੈਂਡ ਭੂਚਾਲ ਦੇ ਰੂਪ 'ਚ ਸਰਗਰਮ 'ਰਿੰਗ ਆਫ ਫਾਇਰ' 'ਤੇ ਸਥਿਤ ਹੈ। ਰਿੰਗ ਆਫ਼ ਫਾਇਰ ਲਗਭਗ 40000 ਕਿਲੋਮੀਟਰ ਦਾ ਇੱਕ ਚੱਕਰ ਹੈ। ਇਹ ਜੁਆਲਾਮੁਖੀ ਅਤੇ ਸਮੁੰਦਰੀ ਖਾਈ ਨਾਲ ਭਰਿਆ ਹੋਇਆ ਹੈ ਜੋ ਪ੍ਰਸ਼ਾਂਤ ਮਹਾਸਾਗਰ ਦੇ ਬਹੁਤ ਸਾਰੇ ਹਿੱਸੇ ਨੂੰ ਕਵਰ ਕਰਦੇ ਹਨ। ਨੈਸ਼ਨਲ ਐਮਰਜੈਂਸੀ ਮੈਨੇਜਮੈਂਟ ਏਜੰਸੀ ਨੇ ਸਾਊਥਲੈਂਡ ਅਤੇ ਫਿਓਰਲੈਂਡ ਖੇਤਰਾਂ ਦੇ ਲੋਕਾਂ ਨੂੰ ਬੀਚਾਂ ਅਤੇ ਸਮੁੰਦਰੀ ਖੇਤਰਾਂ ਤੋਂ ਦੂਰ ਰਹਿਣ ਦੀ ਸਲਾਹ ਦਿੱਤੀ ਹੈ।

ਏਜੰਸੀ ਦਾ ਕਹਿਣਾ ਹੈ ਕਿ ਅਸਾਧਾਰਨ ਸਮੁੰਦਰੀ ਧਾਰਾਵਾਂ ਖ਼ਤਰਾ ਬਣ ਸਕਦੀਆਂ ਹਨ। ਨਿਊਜ਼ੀਲੈਂਡ ਦੇ ਸਰਕਾਰੀ ਭੂਚਾਲ ਮਾਨੀਟਰ ਜੀਓਨੈੱਟ ਨੇ ਕਿਹਾ ਕਿ 4,700 ਤੋਂ ਵੱਧ ਲੋਕਾਂ ਨੇ ਭੂਚਾਲ ਮਹਿਸੂਸ ਕੀਤਾ। ਸੂਤਰਾਂ ਅਨੁਸਾਰ ਦੱਸਿਆ ਕਿ ਚੀਜ਼ਾਂ ਡਿੱਗਣ ਅਤੇ ਇਮਾਰਤਾਂ ਦੇ ਹਿੱਲਣ ਦੀ ਜਾਣਕਾਰੀ ਸਾਂਝੀ ਕੀਤੀ। ਨਿਊਜ਼ੀਲੈਂਡ ਹੇਰਾਲਡ ਅਖਬਾਰ ਮੁਤਾਬਕ ਇਕ ਵਿਅਕਤੀ ਨੇ ਫੇਸਬੁੱਕ 'ਤੇ ਪੋਸਟ ਕੀਤਾ ਕਿ ਸਾਡੀ ਅਲਮਾਰੀ 'ਚੋਂ ਚੀਜ਼ਾਂ ਡਿੱਗਣ ਲੱਗ ਪਈਆਂ ਹਨ। ਲੱਕੜ ਦਾ ਮੇਜ਼ ਘੁੰਮਣ ਲੱਗਾ। ਜਿਓਨੇਟ ਦੇ ਅਨੁਸਾਰ, ਭੂਚਾਲ ਨਿਊਜ਼ੀਲੈਂਡ ਦੇ ਸਨੇਰਸ ਟਾਪੂ ਦੇ ਉੱਤਰ-ਪੱਛਮ ਵਿੱਚ ਲਗਭਗ 160 ਕਿਲੋਮੀਟਰ ਦੂਰ 33 ਕਿਲੋਮੀਟਰ ਦੀ ਡੂੰਘਾਈ ਵਿੱਚ ਆਇਆ। ਸੰਯੁਕਤ ਰਾਜ ਭੂ-ਵਿਗਿਆਨ ਸਰਵੇਖਣ ਨੇ ਦੱਸਿਆ ਕਿ ਭੂਚਾਲ ਲਗਭਗ 10 ਕਿਲੋਮੀਟਰ ਦੀ ਡੂੰਘਾਈ 'ਤੇ ਆਇਆ।