ਦੁਬਈ (ਰਾਘਵ) : ਸਾਊਦੀ ਅਰਬ ਅਤੇ ਯੂਏਈ ਵਰਗੇ ਖਾੜੀ ਦੇਸ਼ਾਂ 'ਚ ਪਾਕਿਸਤਾਨੀ ਭਿਖਾਰੀਆਂ ਦਾ ਸੰਕਟ ਵਧਦਾ ਜਾ ਰਿਹਾ ਹੈ। ਧਾਰਮਿਕ ਯਾਤਰਾ ਦੇ ਨਾਂ 'ਤੇ ਵੀਜ਼ਾ ਲੈ ਕੇ ਖਾੜੀ ਦੇਸ਼ਾਂ 'ਚ ਪਹੁੰਚਣ ਵਾਲੇ ਪਾਕਿਸਤਾਨੀ ਨਾ ਸਿਰਫ ਭੀਖ ਮੰਗ ਰਹੇ ਹਨ ਸਗੋਂ ਇਸ ਨੂੰ ਮਾਫੀਆ ਦਾ ਰੂਪ ਵੀ ਦੇ ਰਹੇ ਹਨ। ਖਬਰਾਂ ਮੁਤਾਬਕ ਸਾਊਦੀ ਅਰਬ ਨੇ ਪਾਕਿਸਤਾਨ ਨੂੰ ਇਸ ਤਰ੍ਹਾਂ ਆਪਣੇ ਨਾਗਰਿਕਾਂ ਨੂੰ ਭੇਜਣਾ ਬੰਦ ਕਰਨ ਦੀ ਸਖਤ ਚਿਤਾਵਨੀ ਦਿੱਤੀ ਸੀ। ਸੂਤਰਾਂ ਮੁਤਾਬਕ ਸਾਊਦੀ ਅਤੇ ਹੋਰ ਖਾੜੀ ਦੇਸ਼ਾਂ ਦੇ ਗੁੱਸੇ ਤੋਂ ਬਾਅਦ ਪਾਕਿਸਤਾਨ ਸਰਕਾਰ ਨੇ 4300 ਭਿਖਾਰੀਆਂ ਨੂੰ ਨੋ ਫਲਾਈ ਲਿਸਟ 'ਚ ਪਾ ਦਿੱਤਾ ਹੈ। ਇਨ੍ਹਾਂ ਭਿਖਾਰੀਆਂ 'ਤੇ ਉਮਰਾਹ ਵੀਜ਼ਾ ਲੈ ਕੇ ਖਾੜੀ ਦੇਸ਼ਾਂ 'ਚ ਜਾ ਕੇ ਉਥੇ ਭੀਖ ਮੰਗਣ ਦਾ ਦੋਸ਼ ਹੈ।

ਪਾਕਿਸਤਾਨੀ ਭਿਖਾਰੀ ਉਮਰਾਹ ਅਤੇ ਹਜ ਵੀਜ਼ਿਆਂ ਦੀ ਦੁਰਵਰਤੋਂ ਕਰ ਰਹੇ ਹਨ। 2023 ਵਿੱਚ ਸਾਊਦੀ ਅਰਬ ਨੇ ਉਮਰਾਹ ਵੀਜ਼ਾ ਤਹਿਤ ਭੀਖ ਮੰਗਣ ਦੇ ਦੋਸ਼ ਵਿੱਚ 16 ਪਾਕਿਸਤਾਨੀ ਨਾਗਰਿਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਇਸ ਤੋਂ ਬਾਅਦ ਸਾਊਦੀ ਹੱਜ ਮੰਤਰਾਲੇ ਨੇ ਪਾਕਿਸਤਾਨ ਨੂੰ ਸਖ਼ਤ ਚੇਤਾਵਨੀ ਦਿੱਤੀ ਸੀ। ਸਾਊਦੀ ਅਰਬ ਦੇ ਉਪ ਗ੍ਰਹਿ ਮੰਤਰੀ ਨਸੀਰ ਬਿਨ ਅਬਦੁਲ ਅਜ਼ੀਜ਼ ਅਲ-ਦਾਊਦ ਨੇ ਪਾਕਿਸਤਾਨੀ ਗ੍ਰਹਿ ਮੰਤਰੀ ਮੋਹਸਿਨ ਰਜ਼ਾ ਨਕਵੀ ਨਾਲ ਮੁਲਾਕਾਤ ਦੌਰਾਨ ਕਿਹਾ ਕਿ ਜੇਕਰ ਇਸ ਧੰਦੇ ਨੂੰ ਨਾ ਰੋਕਿਆ ਗਿਆ ਤਾਂ ਇਸ ਦਾ ਅਸਰ ਅਸਲੀ ਉਮਰਾਹ ਅਤੇ ਹੱਜ ਯਾਤਰੀਆਂ 'ਤੇ ਪਵੇਗਾ। ਨਕਵੀ ਨੇ ਭਰੋਸਾ ਦਿੱਤਾ ਕਿ ਪਾਕਿਸਤਾਨ ਇਨ੍ਹਾਂ ਭਿਖਾਰੀ ਮਾਫੀਆ ਦੇ ਖਿਲਾਫ ਜ਼ੀਰੋ ਟੋਲਰੈਂਸ ਦੀ ਨੀਤੀ ਅਪਣਾਏਗਾ।

ਹਾਲ ਹੀ 'ਚ ਕਰਾਚੀ ਏਅਰਪੋਰਟ 'ਤੇ ਸਾਊਦੀ ਜਾ ਰਹੀ ਫਲਾਈਟ ਤੋਂ 11 ਭਿਖਾਰੀਆਂ ਨੂੰ ਉਤਾਰਿਆ ਗਿਆ ਸੀ। FIA ਦੀ ਜਾਂਚ 'ਚ ਪਤਾ ਲੱਗਾ ਹੈ ਕਿ ਇਹ ਸਾਰੇ ਸਾਊਦੀ ਅਰਬ 'ਚ ਭੀਖ ਮੰਗਣ ਜਾ ਰਹੇ ਸਨ। ਪਾਕਿਸਤਾਨ ਹੁਣ ਉਮਰਾਹ ਐਕਟ ਲਿਆਉਣ 'ਤੇ ਵਿਚਾਰ ਕਰ ਰਿਹਾ ਹੈ, ਤਾਂ ਜੋ ਟਰੈਵਲ ਏਜੰਸੀਆਂ ਅਤੇ ਫਰਜ਼ੀ ਸ਼ਰਧਾਲੂਆਂ 'ਤੇ ਸਖਤੀ ਲਾਈ ਜਾ ਸਕੇ। ਇਨ੍ਹਾਂ ਏਜੰਸੀਆਂ ਦੀ ਨਿਗਰਾਨੀ ਦੀ ਜ਼ਿੰਮੇਵਾਰੀ ਧਾਰਮਿਕ ਮਾਮਲਿਆਂ ਦੇ ਮੰਤਰਾਲੇ ਨੂੰ ਦਿੱਤੀ ਜਾਵੇਗੀ। ਪਾਕਿਸਤਾਨੀ ਭਿਖਾਰੀਆਂ ਦੀ ਇਹ ਕਾਰਵਾਈ ਦੇਸ਼ ਦੇ ਅੰਤਰਰਾਸ਼ਟਰੀ ਅਕਸ ਨੂੰ ਨੁਕਸਾਨ ਪਹੁੰਚਾ ਰਹੀ ਹੈ। ਸਾਊਦੀ ਰਾਜਦੂਤ ਨਵਾਫ ਬਿਨ ਸਈਦ ਅਹਿਮਦ ਅਲ ਮਲਕੀ ਨਾਲ ਗੱਲਬਾਤ ਦੌਰਾਨ ਪਾਕਿਸਤਾਨੀ ਗ੍ਰਹਿ ਮੰਤਰੀ ਨੇ ਸਖ਼ਤ ਕਾਰਵਾਈ ਕਰਨ ਦਾ ਭਰੋਸਾ ਦਿੱਤਾ।