ਕੀਵ (ਪਾਇਲ): ਯੂਕਰੇਨ-ਰੂਸ ਜੰਗ ਵਿਚ ਤਣਾਅ ਇਕ ਵਾਰ ਫਿਰ ਸਿਖਰ 'ਤੇ ਪਹੁੰਚ ਗਿਆ ਹੈ। ਸ਼ੁੱਕਰਵਾਰ ਨੂੰ, ਰੂਸ ਨੇ ਯੂਕਰੇਨ ਦੇ ਚੋਰਨੋਮੋਰਸਕ ਬੰਦਰਗਾਹ 'ਤੇ ਤਾਜ਼ਾ ਹਮਲੇ ਕੀਤੇ, ਘੱਟੋ ਘੱਟ ਤਿੰਨ ਤੁਰਕੀ ਦੀ ਮਲਕੀਅਤ ਵਾਲੇ ਜਹਾਜ਼ਾਂ ਨੂੰ ਨੁਕਸਾਨ ਪਹੁੰਚਾਇਆ। ਚਸ਼ਮਦੀਦ ਗਵਾਹਾਂ ਵੱਲੋਂ ਰਿਕਾਰਡ ਕੀਤੀ ਗਈ ਵੀਡੀਓ ਫੁਟੇਜ ਵਿੱਚ ਦੇਖਿਆ ਗਿਆ ਕਿ ਕਿਵੇਂ ਇੱਕ ਪ੍ਰੋਜੈਕਟਾਈਲ ਸਿੱਧਾ ਬੰਦਰਗਾਹ ਵਿੱਚ ਖੜ੍ਹੇ ਇੱਕ ਜਹਾਜ਼ ਨਾਲ ਟਕਰਾਇਆ। ਯੂਕਰੇਨ ਦੇ ਅਧਿਕਾਰੀਆਂ ਮੁਤਾਬਕ ਨੁਕਸਾਨੇ ਗਏ ਜਹਾਜ਼ਾਂ ਵਿੱਚ ਭੋਜਨ ਸਪਲਾਈ ਕਰਨ ਵਾਲਾ ਇੱਕ ਬੇੜਾ ਵੀ ਸ਼ਾਮਲ ਸੀ। ਇਨ੍ਹਾਂ ਹਮਲਿਆਂ ਨੂੰ ਕਾਲੇ ਸਾਗਰ ਖੇਤਰ ਵਿੱਚ ਵਧਦੀ ਅਸਥਿਰਤਾ ਅਤੇ ਰੂਸ ਦੀ ਹਮਲਾਵਰ ਰਣਨੀਤੀ ਦੇ ਸੰਕੇਤ ਵਜੋਂ ਦੇਖਿਆ ਜਾ ਰਿਹਾ ਹੈ।

ਇਹ ਹਮਲਾ ਉਦੋਂ ਹੋਇਆ ਜਦੋਂ ਤੁਰਕੀ ਦੇ ਰਾਸ਼ਟਰਪਤੀ ਰੇਸੇਪ ਤੈਯਪ ਏਰਦੋਗਨ ਨੇ ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨਾਲ ਸਥਿਤੀ ਨੂੰ ਸ਼ਾਂਤ ਕਰਨ ਲਈ ਬੰਦਰਗਾਹਾਂ ਅਤੇ ਊਰਜਾ ਬੇਸਾਂ ਨੂੰ ਕਵਰ ਕਰਨ ਵਾਲੀ ਸੀਮਤ ਜੰਗਬੰਦੀ ਬਾਰੇ ਗੱਲ ਕੀਤੀ। ਹਾਲਾਂਕਿ, ਰੂਸ ਦੇ ਹਮਲੇ ਨੇ ਤੁਰਕੀਏ ਦੀ ਇਸ ਸ਼ਾਂਤੀ ਪਹਿਲਕਦਮੀ ਨੂੰ ਝਟਕਾ ਦਿੱਤਾ ਹੈ। ਤੁਰਕੀ ਸਰਕਾਰ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਹੈ ਕਿ ਚੋਰਨੋਮੋਰਸਕ ਬੰਦਰਗਾਹ 'ਤੇ ਤੁਰਕੀ ਦੇ ਜਹਾਜ਼ਾਂ ਨੂੰ ਨੁਕਸਾਨ ਪਹੁੰਚਿਆ ਹੈ ਪਰ ਰਾਹਤ ਦੀ ਗੱਲ ਇਹ ਹੈ ਕਿ ਇਸ ਹਮਲੇ 'ਚ ਤੁਰਕੀ ਦੇ ਕਿਸੇ ਵੀ ਨਾਗਰਿਕ ਦੇ ਜ਼ਖਮੀ ਹੋਣ ਦੀ ਸੂਚਨਾ ਨਹੀਂ ਹੈ।

ਜਾਣਕਾਰੀ ਮੁਤਾਬਕ ਇਹ ਹਮਲੇ ਰੂਸ ਦੀ ਉਸ ਤਾਜ਼ਾ ਧਮਕੀ ਤੋਂ ਬਾਅਦ ਹੋਏ ਹਨ, ਜਿਸ 'ਚ ਉਸ ਨੇ ਯੂਕਰੇਨ ਨੂੰ ਸਮੁੰਦਰ ਤੋਂ ਪੂਰੀ ਤਰ੍ਹਾਂ ਕੱਟਣ ਦੀ ਚਿਤਾਵਨੀ ਦਿੱਤੀ ਸੀ। ਇਹ ਧਮਕੀ ਉਦੋਂ ਸਾਹਮਣੇ ਆਈ ਜਦੋਂ ਯੂਕਰੇਨ ਨੇ ਰੂਸ ਦੇ ਅਖੌਤੀ "ਸ਼ੈਡੋ ਫਲੀਟ" ਨੂੰ ਨਿਸ਼ਾਨਾ ਬਣਾਇਆ, ਜਿਸ ਨੂੰ ਰੂਸ ਤੇਲ ਨਿਰਯਾਤ ਦੁਆਰਾ ਯੁੱਧ ਲਈ ਫੰਡ ਇਕੱਠਾ ਕਰਨ ਲਈ ਵਰਤਦਾ ਹੈ। ਕਾਲੇ ਸਾਗਰ ਵਿੱਚ ਇਹ ਵਧਦੇ ਹਮਲੇ ਨਾ ਸਿਰਫ਼ ਯੂਕਰੇਨ ਦੀ ਆਰਥਿਕਤਾ ਅਤੇ ਵਿਸ਼ਵ ਖੁਰਾਕ ਸਪਲਾਈ ਲਈ ਖ਼ਤਰਾ ਹਨ, ਸਗੋਂ ਤੁਰਕੀ ਵਰਗੇ ਖੇਤਰੀ ਦੇਸ਼ਾਂ ਲਈ ਵੀ ਗੰਭੀਰ ਸੁਰੱਖਿਆ ਚਿੰਤਾ ਬਣ ਰਹੇ ਹਨ।