ਮੁੰਬਈ (ਰਾਘਵ) : ਇਸ ਸਾਲ ਆਯੋਜਿਤ ਹੋਣ ਜਾ ਰਹੀ ਇੰਟਰਨੈਸ਼ਨਲ ਮਾਸਟਰਜ਼ ਲੀਗ (ਆਈ.ਐੱਮ.ਐੱਲ.) ਦੇ ਪਹਿਲੇ ਐਡੀਸ਼ਨ ਵਿਚ ਇਸ ਸ਼ਾਨਦਾਰ ਟੀ-20 ਫਰੈਂਚਾਇਜ਼ੀ ਟੂਰਨਾਮੈਂਟ ਲਈ ਦੁਨੀਆ ਭਰ ਦੇ ਕ੍ਰਿਕਟ ਦਿੱਗਜ ਭਾਰਤ ਵਿਚ ਇਕੱਠੇ ਹੋਣਗੇ। ਛੇ ਟੀਮਾਂ ਦੀ ਇਸ ਲੀਗ ਦੀ ਕਲਪਨਾ ਵਿਸ਼ਵ ਦੇ ਦੋ ਮਹਾਨ ਕ੍ਰਿਕਟਰਾਂ, ਸੁਨੀਲ ਮਨੋਹਰ ਗਾਵਸਕਰ ਅਤੇ ਸਚਿਨ ਰਮੇਸ਼ ਤੇਂਦੁਲਕਰ ਦੁਆਰਾ ਕੀਤੀ ਗਈ ਸੀ। ਇਹ ਦੋਵੇਂ ਮਹਾਨ ਖਿਡਾਰੀ ਲੀਗ ਦੇ ਆਯੋਜਨ ਲਈ ਭਾਰਤ ਵਿੱਚ ਇੱਕ ਕੰਪਨੀ ਸਥਾਪਤ ਕਰਨ ਲਈ ਭਾਰਤ ਦੀ ਪ੍ਰਮੁੱਖ ਖੇਡ ਪ੍ਰਬੰਧਨ ਕੰਪਨੀ, ਪੀਐਮਜੀ ਸਪੋਰਟਸ ਅਤੇ ਮਸ਼ਹੂਰ ਗਲੋਬਲ ਸਪੋਰਟਸ ਮਾਰਕੀਟਿੰਗ ਕੰਪਨੀ, ਸਪੋਰਟਫਾਈਵ ਨਾਲ ਸਹਿਯੋਗ ਕਰਨਗੇ।

ਭਾਰਤੀ ਦਿੱਗਜ ਸਚਿਨ ਤੇਂਦੁਲਕਰ ਦੀ ਵਾਪਸੀ ਨਾਲ ਲੱਖਾਂ ਪ੍ਰਸ਼ੰਸਕਾਂ ਵਿੱਚ ਇੱਕ ਵਾਰ ਫਿਰ ਉਤਸ਼ਾਹ ਪੈਦਾ ਹੋਵੇਗਾ, ਜੋ ਮਾਸਟਰ ਬਲਾਸਟਰ ਦੇ ਬੱਲੇ ਦਾ ਜਾਦੂ ਮੁੜ ਪਿੱਚ 'ਤੇ (22 ਗਜ਼ ਦੀ ਦੂਰੀ ਦੇ ਵਿਚਕਾਰ) ਦੇਖਣ ਲਈ ਬੇਸਬਰੀ ਨਾਲ ਉਡੀਕ ਕਰ ਰਹੇ ਹਨ। ਮਹਾਨ ਕ੍ਰਿਕਟਰ ਸੁਨੀਲ ਗਾਵਸਕਰ ਨੂੰ ਲੀਗ ਕਮਿਸ਼ਨਰ ਨਿਯੁਕਤ ਕੀਤਾ ਗਿਆ ਹੈ। ਇਹ ਮੈਚ ਮੁੰਬਈ, ਲਖਨਊ ਅਤੇ ਰਾਏਪੁਰ ਵਿੱਚ ਹੋਣਗੇ।