ਨਿਊਜ਼ ਡੈਸਕ (ਜਸਕਮਲ) : ਕੇਂਦਰੀ ਸਿੱਖਿਆ ਮੰਤਰਾਲੇ ਦੇ ਅਧਿਕਾਰੀਆਂ ਨੇ ਵੀਰਵਾਰ ਨੂੰ ਕਿਹਾ ਕਿ 11 ਰਾਜਾਂ 'ਚ ਸਕੂਲ ਪੂਰੀ ਤਰ੍ਹਾਂ ਖੁੱਲ੍ਹੇ ਹਨ। ਅੰਸ਼ਕ ਤੌਰ 'ਤੇ 16 ਰਾਜਾਂ 'ਚ ਮੁੱਖ ਤੌਰ 'ਤੇ ਉੱਚ ਜਮਾਤਾਂ ਲਈ ਖੋਲ੍ਹੇ ਗਏ ਹਨ ਤੇ ਨੌਂ ਰਾਜਾਂ 'ਚ ਬੰਦ ਰਹਿਣਗੇ। ਦੇਸ਼ ਭਰ 'ਚ ਸਕੂਲਾਂ ਦੇ ਬੰਦ ਹੋਣ ਦੀ ਸਥਿਤੀ ਨੂੰ ਸਾਂਝਾ ਕਰਦੇ ਹੋਏ ਅਧਿਕਾਰੀਆਂ ਨੇ ਕਿਹਾ ਕਿ ਸਾਰੇ ਸੂਬਿਆਂ 'ਚ ਘੱਟੋ-ਘੱਟ 95 ਫੀਸਦੀ ਅਧਿਆਪਨ ਤੇ ਗੈਰ-ਅਧਿਆਪਕ ਸਟਾਫ ਦਾ ਟੀਕਾਕਰਨ ਕੀਤਾ ਗਿਆ ਹੈ, ਜਦੋਂ ਕਿ ਕੁਝ ਰਾਜਾਂ ਨੇ ਸਕੂਲਾਂ 'ਚ ਸਟਾਫ ਲਈ 100 ਪ੍ਰਤੀਸ਼ਤ ਟੀਕਾਕਰਨ ਕਵਰੇਜ ਵੀ ਪ੍ਰਾਪਤ ਕੀਤੀ ਹੈ।

ਸਿੱਖਿਆ ਮੰਤਰਾਲੇ ਦੀ ਸੰਯੁਕਤ ਸਕੱਤਰ ਸਵੀਟੀ ਚਾਂਗਸਨ ਨੇ ਇਕ ਪ੍ਰੈਸ ਕਾਨਫਰੰਸ ਦੌਰਾਨ ਕਿਹਾ ਵਿਆਪਕ ਟੀਕਾਕਰਨ ਕਵਰੇਜ ਨੂੰ ਧਿਆਨ 'ਚ ਰੱਖਦੇ ਹੋਏ, ਸਿੱਖਿਆ ਮੰਤਰਾਲੇ ਨੇ ਪਿਛਲੇ ਸਾਲ ਦਸੰਬਰ 'ਚ ਰਾਜਾਂ ਨੂੰ ਸੰਸ਼ੋਧਿਤ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ ਸਨ ਅਤੇ ਮਾਪਿਆਂ ਦੀ ਸਹਿਮਤੀ ਮੰਗਣ ਦਾ ਫੈਸਲਾ ਸੂਬਿਆਂ 'ਤੇ ਛੱਡ ਦਿੱਤਾ ਗਿਆ ਸੀ। ਇਸ ਤੋਂ ਇਲਾਵਾ, ਸੋਧੇ ਹੋਏ ਦਿਸ਼ਾ-ਨਿਰਦੇਸ਼ਾਂ 'ਚ ਸਭਾਵਾਂ ਤੇ ਇਕੱਠਾਂ ਬਾਰੇ ਗੱਲ ਕੀਤੀ ਗਈ ਸੀ, ਜਿਨ੍ਹਾਂ 'ਤੇ ਪਹਿਲਾਂ ਸਕੂਲਾਂ 'ਚ ਪਾਬੰਦੀ ਲਗਾਈ ਗਈ ਸੀ। ਨਵੀਂ ਸਲਾਹ ਦੇ ਅਨੁਸਾਰ, ਸਕੂਲ ਸਬੰਧਤ ਸੂਬਿਆਂ ਦੁਆਰਾ ਜਾਰੀ ਕੀਤੇ ਗਏ SOPs ਦੇ ਅਨੁਸਾਰ ਸਮਾਗਮ ਮਨਾ ਸਕਦੇ ਹਨ ਤੇ ਇਕੱਠ ਕਰ ਸਕਦੇ ਹਨ।