ਟਿਹਰੀ ਗੜ੍ਹਵਾਲ (ਰਾਘਵ) : ਉਤਰਾਖੰਡ 'ਚ ਉੱਚ ਗੜ੍ਹਵਾਲ ਹਿਮਾਲੀਅਨ ਖੇਤਰ 'ਚ ਸਥਿਤ ਵਿਸ਼ਵ ਪ੍ਰਸਿੱਧ ਬਦਰੀਨਾਥ ਧਾਮ ਦੇ ਦਰਵਾਜ਼ੇ ਇਸ ਸਾਲ 4 ਮਈ ਨੂੰ ਸ਼ਰਧਾਲੂਆਂ ਲਈ ਖੋਲ੍ਹ ਦਿੱਤੇ ਜਾਣਗੇ। ਟਿਹਰੀ ਰਿਆਸਤ ਦੇ ਸਾਬਕਾ ਮਹਾਰਾਜਾ ਮਨੁਜੇਂਦਰ ਸ਼ਾਹ ਨੇ ਐਤਵਾਰ ਨੂੰ ਕਿਹਾ ਕਿ ਇਸ ਸਾਲ 4 ਮਈ ਨੂੰ ਸਵੇਰੇ 6 ਵਜੇ ਬਦਰੀਨਾਥ ਦੇ ਦਰਵਾਜ਼ੇ ਸ਼ਰਧਾਲੂਆਂ ਲਈ ਖੋਲ੍ਹ ਦਿੱਤੇ ਜਾਣਗੇ। ਬਸੰਤ ਪੰਚਮੀ ਦੇ ਮੌਕੇ 'ਤੇ ਨਰਿੰਦਰ ਨਗਰ ਸਥਿਤ ਸਾਬਕਾ ਟਿਹਰੀ ਰਾਜ ਦਰਬਾਰ 'ਚ ਵਿਸ਼ੇਸ਼ ਪੂਜਾ ਅਰਚਨਾ ਕਰਕੇ ਮੰਦਿਰ ਖੋਲ੍ਹਣ ਦੀ ਰਸਮ ਅਦਾ ਕੀਤੀ ਗਈ।

ਰਾਜ ਪੁਰੋਹਿਤ ਅਚਾਰੀਆ ਕ੍ਰਿਸ਼ਨ ਪ੍ਰਸਾਦ ਉਨਿਆਲ ਨੇ ਗਣੇਸ਼ ਪੰਚਾਂਗ ਅਤੇ ਚੌਂਕੀ ਪੂਜਨ ਤੋਂ ਬਾਅਦ ਮਨੁਜੇਂਦਰ ਸ਼ਾਹ ਦੀ ਕੁੰਡਲੀ ਦਾ ਅਧਿਐਨ ਕਰਨ ਅਤੇ ਗ੍ਰਹਿਆਂ ਅਤੇ ਤਾਰਾਮੰਡਲਾਂ ਦੀ ਸਥਿਤੀ ਨੂੰ ਦੇਖ ਕੇ ਭਗਵਾਨ ਬਦਰੀਨਾਥ ਮੰਦਰ ਦੇ ਦਰਵਾਜ਼ੇ ਖੋਲ੍ਹਣ ਦੀ ਤਰੀਕ ਤੈਅ ਕੀਤੀ। ਇਸ ਮੌਕੇ ਮਨੁਜੇਂਦਰ ਸ਼ਾਹ ਤੋਂ ਇਲਾਵਾ ਉਨ੍ਹਾਂ ਦੀ ਪਤਨੀ ਅਤੇ ਟਿਹਰੀ ਲੋਕ ਸਭਾ ਮੈਂਬਰ ਮਾਲਾ ਰਾਜ ਲਕਸ਼ਮੀ ਸ਼ਾਹ, ਬਦਰੀਨਾਥ ਦੇ ਮੁੱਖ ਪੁਜਾਰੀ ਰਾਵਲ ਅਮਰਨਾਥ ਨੰਬੂਦਰੀ, ਮਨੁਜੇਂਦਰ ਸ਼ਾਹ ਦੀ ਬੇਟੀ ਸ਼੍ਰੀਜਾ, ਬਦਰੀਨਾਥ ਕੇਦਾਰਨਾਥ ਮੰਦਰ ਕਮੇਟੀ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਵਿਜੇ ਥਪਲਿਆਲ ਅਤੇ ਕਈ ਧਾਰਮਿਕ ਅਧਿਕਾਰੀ ਮੌਜੂਦ ਸਨ। ਹਰ ਸਾਲ ਦੀਵਾਲੀ ਤੋਂ ਬਾਅਦ, ਅਕਤੂਬਰ-ਨਵੰਬਰ ਵਿੱਚ ਸਰਦੀਆਂ ਦੇ ਮੌਸਮ ਵਿੱਚ, ਬਦਰੀਨਾਥ - ਕੇਦਾਰਨਾਥ, ਗੰਗੋਤਰੀ ਅਤੇ ਯਮੁਨੋਤਰੀ ਸਮੇਤ ਚਾਰਧਾਮਾਂ ਦੇ ਦਰਵਾਜ਼ੇ ਸ਼ਰਧਾਲੂਆਂ ਲਈ ਬੰਦ ਕਰ ਦਿੱਤੇ ਜਾਂਦੇ ਹਨ, ਜੋ ਅਗਲੇ ਸਾਲ ਅਪ੍ਰੈਲ-ਮਈ ਵਿੱਚ ਦੁਬਾਰਾ ਖੋਲ੍ਹੇ ਜਾਂਦੇ ਹਨ। ਸਾਲ ਵਿੱਚ ਛੇ ਮਹੀਨੇ ਚੱਲਣ ਵਾਲੀ ਇਸ ਯਾਤਰਾ ਦੌਰਾਨ ਦੇਸ਼-ਵਿਦੇਸ਼ ਤੋਂ ਲੱਖਾਂ ਸ਼ਰਧਾਲੂ ਚਾਰਧਾਮਾਂ ਦੇ ਦਰਸ਼ਨਾਂ ਲਈ ਆਉਂਦੇ ਹਨ।