ਚੀਨ (ਪਾਇਲ): ਚੀਨ ਦੇ ਯੂਨਾਨ ਸੂਬੇ ਤੋਂ ਇਕ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ, ਜਿਸ ਨੇ ਸਾਬਤ ਕਰ ਦਿੱਤਾ ਹੈ ਕਿ ਕਈ ਵਾਰ ਵਿਆਹ ਦੇ ਲੰਬੇ ਸਮੇਂ ਬਾਅਦ ਵੀ ਨਜ਼ਦੀਕੀ ਰਿਸ਼ਤਿਆਂ 'ਚ ਛੁਪੇ ਹੋਏ ਰਾਜ਼ ਕਿੰਨੇ ਖਤਰਨਾਕ ਹੋ ਸਕਦੇ ਹਨ। ਮਾਮਲਾ ਇੱਕ ਜੋੜੇ ਦਾ ਹੈ, ਜਿੱਥੇ ਪਤੀ ਨੇ ਸਿਹਤ ਨਾਲ ਜੁੜੀ ਇੱਕ ਬਹੁਤ ਹੀ ਗੰਭੀਰ ਸੱਚਾਈ ਨੂੰ ਆਪਣੀ ਪਤਨੀ ਤੋਂ ਦਸ ਸਾਲ ਤੱਕ ਲੁਕਾ ਕੇ ਰੱਖਿਆ।

ਕਹਾਣੀ ਉਸ ਲਾਲ ਗੋਲੀ ਨਾਲ ਸ਼ੁਰੂ ਹੁੰਦੀ ਹੈ ਜੋ ਪਤੀ ਹਰ ਰਾਤ ਨਿਯਮਿਤ ਤੌਰ 'ਤੇ ਲੈਂਦਾ ਸੀ। ਜਦੋਂ ਪਤਨੀ ਨੇ ਕਈ ਵਾਰ ਪੁੱਛਿਆ ਤਾਂ ਉਸ ਨੇ ਆਪਣੇ ਪਤੀ ਤੋਂ ਸਿਰਫ ਇੰਨਾ ਹੀ ਸੁਣਿਆ ਕਿ ਇਹ ਦਵਾਈ ਜਿਗਰ ਦੀ ਪੁਰਾਣੀ ਸਮੱਸਿਆ ਲਈ ਹੈ। ਪਤਨੀ ਉਸ ਨਾਲ ਸਹਿਮਤ ਹੋ ਗਈ ਅਤੇ ਸੋਚਿਆ ਕਿ ਇਹ ਇੱਕ ਸਧਾਰਨ ਸਿਹਤ ਸਮੱਸਿਆ ਸੀ।

ਸਮਾਂ ਬੀਤਦਾ ਗਿਆ, ਪਰ ਹਾਲ ਹੀ ਵਿਚ ਪਤੀ 'ਤੇ ਗੈਰ-ਕਾਨੂੰਨੀ ਤੌਰ 'ਤੇ ਜੂਆ ਖੇਡਣ ਦਾ ਦੋਸ਼ ਲੱਗਾ ਅਤੇ ਉਸ ਨੂੰ ਜੇਲ੍ਹ ਭੇਜ ਦਿੱਤਾ ਗਿਆ। ਫਿਰ ਪਤਾ ਲੱਗਾ ਕਿ ਉਹ ਜੋ ਦਵਾਈ ਲੈ ਰਿਹਾ ਸੀ ਉਹ ਅਸਲ ਵਿੱਚ ਐੱਚਆਈਵੀ (ਏਡਜ਼) ਦੀ ਦਵਾਈ ਸੀ। ਜੇਲ੍ਹ ਪ੍ਰਸ਼ਾਸਨ ਨੇ ਪਤਨੀ ਨੂੰ ਉਸ ਦੀ ਦਵਾਈ ਦਾ ਇੰਤਜ਼ਾਮ ਕਰਨ ਲਈ ਕਿਹਾ ਅਤੇ ਉਸ ਸਮੇਂ ਪਤਨੀ ਨੂੰ ਵਿਸ਼ਵਾਸ ਹੋ ਗਿਆ ਕਿ ਉਸ ਦੇ ਪਤੀ ਨੇ ਅਸਲ ਵਿੱਚ ਦਸ ਸਾਲ ਝੂਠ ਬੋਲ ਕੇ ਇਸ ਨੂੰ ਛੁਪਾਇਆ ਸੀ।

ਪਤੀ ਨੇ ਮੰਨਿਆ ਕਿ ਉਸਨੂੰ 2011 ਵਿੱਚ ਐੱਚ.ਆਈ.ਵੀ. ਦਾ ਪਤਾ ਲੱਗਾ ਸੀ ਅਤੇ ਉਸਨੇ ਵਿਆਹ ਤੋਂ ਬਾਅਦ ਤੋਂ ਹੀ ਇਹ ਗੱਲ ਆਪਣੀ ਪਤਨੀ ਤੋਂ ਲੁਕਾਈ ਰੱਖੀ ਸੀ। ਉਸਨੇ ਮੁਆਫੀ ਮੰਗੀ, ਇਹ ਦਲੀਲ ਦਿੱਤੀ ਕਿ ਉਹ ਦਵਾਈ ਲੈ ਕੇ ਆਪਣੀ ਸਥਿਤੀ ਨੂੰ ਕਾਬੂ ਕਰ ਰਿਹਾ ਸੀ। ਪਰ ਪਤਨੀ ਲਈ ਇਹ ਸਵੀਕਾਰ ਕਰਨਾ ਆਸਾਨ ਨਹੀਂ ਸੀ।

ਸਭ ਤੋਂ ਚਿੰਤਾਜਨਕ ਗੱਲ ਇਹ ਸੀ ਕਿ ਜੋੜੇ ਨੇ ਆਪਣੇ ਵਿਆਹ ਦੇ ਸ਼ੁਰੂਆਤੀ ਸਾਲਾਂ ਵਿੱਚ ਅਸੁਰੱਖਿਅਤ ਸੈਕਸ ਕੀਤਾ ਸੀ, ਜਿਸ ਕਾਰਨ ਪਤਨੀ ਨੂੰ ਲੱਗਦਾ ਸੀ ਕਿ ਉਸਦੀ ਸਿਹਤ ਨੂੰ ਗੰਭੀਰ ਖਤਰਾ ਹੈ। ਉਸਨੇ ਤੁਰੰਤ ਐੱਚਆਈਵੀ ਲਈ ਟੈਸਟ ਕਰਵਾਇਆ,ਪਰ ਰਾਹਤ ਦੀ ਗੱਲ ਇਹ ਰਹੀ ਕਿ ਉਸ ਦੀ ਰਿਪੋਰਟ ਨਕਾਰਾਤਮਕ ਆਈ।

ਹਾਲਾਂਕਿ, ਮਾਨਸਿਕ ਅਤੇ ਭਾਵਨਾਤਮਕ ਦੁੱਖ ਨੇ ਉਸਦੇ ਵਿਆਹ 'ਤੇ ਸਥਾਈ ਪ੍ਰਭਾਵ ਛੱਡਿਆ। ਉਸਨੇ ਆਪਣੇ ਪਤੀ ਵਿਰੁੱਧ ਧੋਖਾਧੜੀ ਅਤੇ ਬੇਵਫ਼ਾਈ ਦਾ ਦੋਸ਼ ਲਾਉਂਦਿਆਂ ਤਲਾਕ ਲਈ ਦਾਇਰ ਕੀਤੀ। ਯੂਨਾਨ ਦੀ ਅਦਾਲਤ ਨੇ ਵੀ ਪਤਨੀ ਦੇ ਹੱਕ ਵਿੱਚ ਫੈਸਲਾ ਸੁਣਾਇਆ।