ਵਾਸ਼ਿੰਗਟਨ (ਪਾਇਲ): ਅਫਰੀਕੀ ਦੇਸ਼ ਨਾਈਜੀਰੀਆ ਵਿੱਚ ਈਸਾਈਆਂ ਦੇ ਕਤਲੇਆਮ ਤੋਂ ਨਾਰਾਜ਼ ਅਮਰੀਕੀ ਰਾਸ਼ਟਰਪਤੀ ਨੂੰ ਹੁਣ ਜਵਾਬ ਦਿੱਤਾ ਗਿਆ ਹੈ। ਨਾਈਜੀਰੀਆ ਨੇ ਐਤਵਾਰ ਨੂੰ ਕਿਹਾ ਕਿ ਉਹ ਇਸਲਾਮੀ ਕੱਟੜਪੰਥੀਆਂ ਨਾਲ ਲੜਨ ਵਿੱਚ ਅਮਰੀਕੀ ਸਹਾਇਤਾ ਸਵੀਕਾਰ ਕਰਦਾ ਹੈ, ਪਰ ਅਮਰੀਕਾ ਨੂੰ ਆਪਣੀ ਪ੍ਰਭੂਸੱਤਾ ਅਤੇ ਖੇਤਰੀ ਅਖੰਡਤਾ ਦਾ ਸਨਮਾਨ ਕਰਨਾ ਚਾਹੀਦਾ ਹੈ।

ਨਾਈਜੀਰੀਆ ਦੇ ਰਾਸ਼ਟਰਪਤੀ ਬੋਲਾ ਟੀਨੂਬੂ ਦੇ ਸਲਾਹਕਾਰ ਡੈਨੀਅਲ ਬਵਾਲਾ ਨੇ ਨਾਈਜੀਰੀਆ ਪ੍ਰਤੀ ਟਰੰਪ ਦੀ ਤਿੱਖੀ ਪ੍ਰਤੀਕਿਰਿਆ ਦਾ ਜਵਾਬ ਦਿੱਤਾ। ਉਨ੍ਹਾਂ ਕਿਹਾ, "ਅਸੀਂ ਇਸਲਾਮੀ ਕੱਟੜਪੰਥੀਆਂ ਵਿਰੁੱਧ ਲੜਾਈ ਵਿੱਚ ਅਮਰੀਕੀ ਸਹਿਯੋਗ ਦਾ ਸਵਾਗਤ ਕਰਦੇ ਹਾਂ, ਬਸ਼ਰਤੇ ਉਹ ਸਾਡੀ ਖੇਤਰੀ ਅਖੰਡਤਾ ਦਾ ਸਤਿਕਾਰ ਕਰਦੇ ਹੋਣ।"

ਜਾਣਕਾਰੀ ਅਨੁਸਾਰ ਬਵਾਲਾ ਨੇ ਕੂਟਨੀਤਕ ਤਰੀਕਿਆਂ ਨਾਲ ਦੋਵਾਂ ਦੇਸ਼ਾਂ ਵਿਚਕਾਰ ਤਣਾਅ ਨੂੰ ਘੱਟ ਕਰਨ ਦੀ ਕੋਸ਼ਿਸ਼ ਕੀਤੀ। ਹਾਲਾਂਕਿ, ਟਰੰਪ ਨੇ ਨਾਈਜੀਰੀਆ ਨੂੰ ਇੱਕ ਬਦਨਾਮ ਦੇਸ਼ ਕਿਹਾ ਸੀ। ਬਵਾਲਾ ਨੇ ਕਿਹਾ, "ਮੈਨੂੰ ਵਿਸ਼ਵਾਸ ਹੈ ਕਿ ਜਦੋਂ ਤੱਕ ਇਹ ਦੋਵੇਂ ਨੇਤਾ ਮਿਲਦੇ ਹਨ ਅਤੇ ਬੈਠਦੇ ਹਨ, ਅੱਤਵਾਦ ਨਾਲ ਲੜਨ ਦਾ ਸਾਡਾ ਸਾਂਝਾ ਇਰਾਦਾ ਬਿਹਤਰ ਨਤੀਜੇ ਦੇਵੇਗਾ।"

ਇਸ ਤੋਂ ਪਹਿਲਾਂ ਸ਼ਨੀਵਾਰ ਨੂੰ, ਨਾਈਜੀਰੀਆ ਪ੍ਰਸ਼ਾਸਨ ਨੇ ਵੀ ਟਰੰਪ ਦੇ ਬਿਆਨ ਦਾ ਖੰਡਨ ਕੀਤਾ ਸੀ, ਇਸਨੂੰ ਝੂਠਾ ਦੱਸਿਆ ਸੀ। ਨਾਈਜੀਰੀਆ ਦੇ ਅਧਿਕਾਰੀਆਂ ਨੇ ਟਰੰਪ ਦੇ ਇਸ ਦਾਅਵੇ ਨੂੰ ਰੱਦ ਕਰ ਦਿੱਤਾ ਸੀ ਕਿ ਉਨ੍ਹਾਂ ਦੇ ਦੇਸ਼ ਵਿੱਚ ਈਸਾਈਆਂ ਨੂੰ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ। ਦੱਸ ਦਇਏ ਕਿ ਸੂਚਨਾ ਮੰਤਰੀ ਮੁਹੰਮਦ ਇਦਰੀਸ ਨੇ ਸਮੂਹਿਕ ਅਤਿਆਚਾਰ ਦੇ ਦਾਅਵਿਆਂ ਨੂੰ "ਬਹੁਤ ਜ਼ਿਆਦਾ ਗੁੰਮਰਾਹਕੁੰਨ" ਦੱਸਿਆ ਅਤੇ ਹਜ਼ਾਰਾਂ ਮੌਤਾਂ ਦੀਆਂ ਰਿਪੋਰਟਾਂ ਨੂੰ ਖਾਰਜ ਕਰ ਦਿੱਤਾ।

ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਨਾਈਜੀਰੀਆ ਵਿੱਚ ਈਸਾਈਆਂ 'ਤੇ ਇਸਲਾਮੀ ਕੱਟੜਪੰਥੀਆਂ ਦੁਆਰਾ ਯੋਜਨਾਬੱਧ ਹਮਲਿਆਂ 'ਤੇ ਨਾਈਜੀਰੀਆ ਨੂੰ ਫੌਜੀ ਕਾਰਵਾਈ ਦੀ ਧਮਕੀ ਦਿੱਤੀ। ਉਨ੍ਹਾਂ ਨੇ ਨਾਈਜੀਰੀਆ ਨੂੰ ਖਾਸ ਚਿੰਤਾ ਵਾਲਾ ਦੇਸ਼ ਦੱਸਿਆ। ਇਸ ਤੋਂ ਇਲਾਵਾ ਟਰੰਪ ਨੇ ਦਾਅਵਾ ਕੀਤਾ ਕਿ ਦੇਸ਼ ਵਿੱਚ ਈਸਾਈ ਧਰਮ ਨੂੰ ਹੋਂਦ ਦੇ ਖ਼ਤਰੇ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਜਿਸ ਦੌਰਾਨ ਰੰਪ ਨੇ ਫਿਰ ਸੋਸ਼ਲ ਮੀਡੀਆ ਸਾਈਟ ਟਰੂਥ ਸੋਸ਼ਲ 'ਤੇ ਨਾਈਜੀਰੀਆ ਸਰਕਾਰ ਨੂੰ ਚੁਣੌਤੀ ਦੇਣ ਵਾਲਾ ਇੱਕ ਸੰਦੇਸ਼ ਪੋਸਟ ਕੀਤਾ। ਟਰੰਪ ਨੇ ਲਿਖਿਆ, "ਜੇ ਨਾਈਜੀਰੀਆ ਸਰਕਾਰ ਈਸਾਈਆਂ ਦੇ ਕਤਲ ਦੀ ਇਜਾਜ਼ਤ ਦਿੰਦੀ ਰਹੀ, ਤਾਂ ਸੰਯੁਕਤ ਰਾਜ ਅਮਰੀਕਾ ਨਾਈਜੀਰੀਆ ਨੂੰ ਦਿੱਤੀ ਜਾਣ ਵਾਲੀ ਸਾਰੀ ਸਹਾਇਤਾ ਤੁਰੰਤ ਬੰਦ ਕਰ ਦੇਵੇਗਾ ਅਤੇ ਹੋ ਸਕਦਾ ਹੈ ਕਿ ਹੁਣ ਬਦਨਾਮ ਹੋਏ ਦੇਸ਼ ਵਿੱਚ 'ਬੰਦੂਕਾਂ' ਲੈ ਕੇ ਦਾਖਲ ਹੋ ਸਕੇ ਤਾਂ ਜੋ ਇਨ੍ਹਾਂ ਭਿਆਨਕ ਅੱਤਿਆਚਾਰਾਂ ਨੂੰ ਅੰਜਾਮ ਦੇਣ ਵਾਲੇ ਇਸਲਾਮੀ ਅੱਤਵਾਦੀਆਂ ਨੂੰ ਪੂਰੀ ਤਰ੍ਹਾਂ ਖਤਮ ਕੀਤਾ ਜਾ ਸਕੇ।"