ਕੈਨੇਡੀਅਨ ਪੰਜਾਬੀ ਮੀਡੀਆ ਲੈ ਕੇ ਆਉਂਦਾ ਹੈ ਤੁਹਾਡੇ ਲਈ ਤੇਜ਼ ਅਤੇ ਨਿਰਪੱਖ ਖਬਰਾਂ 

ਅੱਜ ਦੀਆਂ ਟੌਪ 5 ਖ਼ਬਰਾਂ ( 20-04-2019 ) 

1.. ਮੂਲਰ ਰਿਪੋਰਟ ਤੋਂ ਬਾਅਦ ਡੇਮੋਕ੍ਰੇਟ੍ਸ ਸੀਨੇਟਰ ਨੇ ਕੀਤੀ ਅਪੀਲ - ਰਾਸ਼ਟਰਪਤੀ ਟਰੰਪ ਦੇ ਖਿਲਾਫ ਚਲਾਇਆ ਜਾਵੇ ਅਵਿਸ਼ਵਾਸ ਪ੍ਰਸਤਾਵ 

ਵੀਰਵਾਰ ਨੂੰ ਅਮਰੀਕੀ ਸੰਸਦ ਵਿੱਚ ਰੂਸ ਨਾਲ ਸਬੰਧਾਂ ਤੇ ਅਧਾਰਤ ਮੂਲਰ ਰਿਪੋਰਟ ਦਰਜ ਕੀਤੀ ਗਈ ਹੈ ,ਡੈਮੋਕਰੇਟ ਸੀਨੇਟਰ ਐਲਿਜ਼ਾਬੈਥ ਵੈਰਨ ਨੇ ਸ਼ੁੱਕਰਵਾਰ ਨੂੰ ਅਮਰੀਕੀ ਹਾਊਸ ਆਫ ਰਿਪ੍ਰੈਜ਼ੈਂਟੇਟਿਵਜ਼ ਤੋਂ ਰਾਸ਼ਟਰਪਤੀ ਡੌਨਲਡ ਟਰੰਪ ਦੇ ਵਿਰੁੱਧ ਅਵਿਸ਼ਵਾਸ ਪ੍ਰਸਤਾਵ ਦੀ ਕਾਰਵਾਈ ਸ਼ੁਰੂ ਕਰਨ ਦੀ ਅਪੀਲ ਕੀਤੀ ਹੈ ,ਉਨ੍ਹਾਂ ਨੇ ਚੋਣਾਂ ਵਿੱਚ ਰੂਸੀ ਦਖ਼ਲ ਦੀ ਜਾਂਚ ਦੇ ਨਤੀਜਿਆਂ ਦਾ ਹਵਾਲਾ ਦਿੰਦੇ ਹੋਏ ਇਸ ਗੱਲ ਦੀ ਅਪੀਲ ਕੀਤੀ ਹੈ ਹਾਲਾਂਕਿ ਮੂਲਰ ਰਿਪੋਰਟ ਵਿੱਚ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਦੇ ਖਿਲਾਫ ਕੋਈ ਦੋਸ਼ ਸਾਹਮਣੇ ਨਹੀਂ ਆਏ ਸਨ |

2.. ਕੈਨੇਡਾ ਦੇ ਲੈਂਗਲੇ ਵਿਚ ਘਰ ਢਹਿਣ ਨਾਲ ਘੱਟੋ ਘੱਟ 40 ਹੋਏ ਜ਼ਖਮੀ , ਹਸਪਤਾਲ ਵਿਚ ਗੰਭੀਰ ਜ਼ਖਮੀ ਕਰਵਾਏ ਗਏ ਭਰਤੀ

ਕੈਨੇਡਾ ਦੇ ਲੈਂਗਲੇ ਵਿਚ ਇਕ ਵੱਡਾ ਹਾਦਸਾ ਵਾਪਰਿਆ ਹੈ , ਇਥੇ ਇਕ ਘਰ ਢਹਿਣ ਨਾਲ 40 ਦੇ ਕਰੀਬ ਲੋਕ ਜ਼ਖਮੀ ਹੋ ਗਏ ਹਨ , ਬੀ.ਸੀ. ਐਮਰਜੈਂਸੀ ਦੇ ਅਨੁਸਾਰ ਇਕ ਘਰ ਦੀ ਛੱਤ ਅਚਾਨਕ ਢਹਿ ਗਈ ਇਸ ਘਰ ਵਿੱਚ ਤਕਰੀਬਨ 100 ਲੋਕ ਪਰਿਵਾਰਕ ਜਸ਼ਨ ਲਈ ਇਕੱਠੇ ਹੋਏ ਸਨ, ਇਸ ਹਾਦਸੇ ਵਿੱਚ ਮਬਲੇ ਹੇਠਾਂ 40 ਤੋਂ ਜਿਆਦਾ ਲੋਕ ਆ ਗਏ , ਇਨ੍ਹਾਂ ਵਿੱਚੋ ਕੁਝ ਦੀ ਹਾਲਤ ਗੰਭੀਰ ਦੱਸੀ ਜਾ ਰਹੀ ਹੈ ਜਿਨ੍ਹਾਂ ਨੂੰ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ ਹੈ , ਬੀ.ਸੀ. ਐਮਰਜੈਂਸੀ ਹੈਲਥ ਸਰਵਿਸਿਜ਼ ਨੇ ਸਥਿਤੀ ਨੂੰ ਹੁਣ ਖ਼ਤਰੇ ਤੋਂ ਬਾਹਰ ਦੱਸਿਆ ਹੈ |

3.. ਅਮਰੀਕਾ ਦੇ ਦੱਖਣੀ ਹਿੱਸਿਆਂ ਵਿੱਚ ਤੂਫ਼ਾਨ ਨੇ ਮਚਾਇਆ ਕਹਿਰ , ਹਜ਼ਾਰਾਂ ਘਰਾਂ ਦੀ ਬਿਜਲੀ ਸੇਵਾ ਹੋਈ ਠੱਪ

ਅਮਰੀਕਾ ਵਿੱਚ ਤਿੰਨ ਵਿਅਕਤੀਆਂ ਨੂੰ ਮਾਰਨ ਤੋਂ ਬਾਅਦ ਚਕਰਵਾਤੀ ਤੂਫਾਨ ਸ਼ੁੱਕਰਵਾਰ ਨੂੰ ਪੂਰਬ ਵੱਲ ਨਿਕਲ ਗਿਆ ਜਿਥੇ ਉਸਨੇ ਗੰਭੀਰ ਤਬਾਹੀ ਮਚਾਈ ਹੈ , ਇਸ ਤੂਫ਼ਾਨ ਨੇ ਹੁਣ ਪੈਨਸਿਲਵੇਨੀਆ ਤੋਂ ਫ਼ਲੋਰਿਡਾ ਤੱਕ ਦੇ ਪੂਰਬ ਤੱਟ 'ਤੇ ਵੱਡੀ ਤਬਾਹੀ ਮਚਾਈ ਜਿਸ ਨਾਲ ਬਿਜਲੀ ਦੇ ਕਈ ਖੰਬੇ ਡਿੱਗ ਗਏ ਹਨ , ਇਸ ਤੂਫ਼ਾਨ ਕਾਰਣ ਦੋ ਸੂਬਿਆਂ ਵਿੱਚ 150,000 ਤੋਂ ਵੱਧ ਘਰਾਂ ਅਤੇ ਕਾਰੋਬਾਰਾਂ ਵਿੱਚ ਬਿਜਲੀ ਸੇਵਾ ਠੱਪ ਹੋ ਚੁੱਕੀ ਹੈ , ਤੂਫ਼ਾਨ ਨੂੰ ਲੈ ਕੇ ਸਥਾਨਕ ਪ੍ਰਸਾਸ਼ਨ ਨੇ ਆਮ ਲੋਕਾਂ ਲਈ ਕਈ ਹਦਾਇਤਾਂ ਜਾਰੀ ਕੀਤੀਆਂ ਹਨ , ਕੌਮੀ ਮੌਸਮ ਸੇਵਾ (ਐਨ ਡਬਲਿਊਐਸ) ਦੇ ਮੌਸਮ ਵਿਗਿਆਨੀ ਬੌਬ ਓਰੇਵਿਕ ਨੇ ਕਿਹਾ ਕਿ ਗਰਮੀ ਦਾ ਭਿਆਨਕ ਤੂਫਾਨ ਦੱਖਣ ਅਤੇ ਦੱਖਣ-ਪੂਰਬੀ ਅਮਰੀਕਾ ਨੂੰ ਜਾਰਜੀਆ ਅਤੇ ਫਲੋਰੀਡਾ ਪੈਨਹੈਂਡਲ ਦੇ ਜ਼ਰੀਏ ਪ੍ਰਭਾਵਿਤ ਕਰੇਗਾ |

4.. ਸੁਨੀਲ ਜਾਖੜ ਦੀ ਸ਼ਮਸ਼ੇਰ ਦੂਲੋ ਨੂੰ ਦੋ ਟੁੱਕ - ਜਾਂ ਤਾਂ ਪਤਨੀ ਧਰਮ ਨਿਭਾ ਲਓ ਜਾਂ ਫਿਰ ਪਾਰਟੀ ਧਰਮ 

ਪੰਜਾਬ ਪ੍ਰਦੇਸ਼ ਕਾਂਗਰਸ ਦੇ ਪ੍ਰਧਾਨ ਅਤੇ ਗੁਰਦਾਸਪੁਰ ਤੋਂ ਕਾਂਗਰਸ ਉਮੀਦਵਾਰ ਸੁਨੀਲ ਜਾਖੜ ਨੇ ਕਾਂਗਰਸ ਦੇ ਰਾਜ ਸਭਾ ਮੈਂਬਰ ਸ਼ਮਸ਼ੇਰ ਸਿੰਘ ਦੂਲੋ ਨੂੰ ਲੈ ਕੇ ਵੱਡਾ ਬਿਆਨ ਦਿੱਤਾ ਹੈ , ਉਨ੍ਹਾਂ ਨੇ ਕਿਹਾ ਕਿ ਦੂਲੋ ਦੀ ਪਤਨੀ ਦਾ ਪਾਰਟੀ ਛੱਡਣ ਦਾ ਅਤੇ ਆਮ ਆਦਮੀ ਪਾਰਟੀ ਵਿੱਚ ਜਾਣਾ ਇਕ ਪਰਿਵਾਰਕ ਮਾਮਲਾ ਹੈ , ਹੁਣ ਦੂਲੋ ਨੂੰ ਇਹ ਦੇਖਣ ਦੀ ਜ਼ਰੂਰਤ ਹੋਵੇਗੀ ਕਿ  ਕਿ ਉਹ ਕਿਵੇਂ ਪਤਨੀ ਧਰਮ ਅਤੇ ਪਾਰਟੀ ਦੇ ਧਰਮ ਦੀ ਭੂਮਿਕਾ ਨਿਭਾਉਂਦੇ ਹਨ , ਜਾਖੜ ਨੇ ਕਿਹਾ ਕਿ ਪਾਰਟੀ ਨੇ ਦੂਲੋ ਅਤੇ ਉਨ੍ਹਾਂ ਦੇ ਪਰਿਵਾਰ ਨੂੰ ਬਹੁਤ ਕੁਝ ਦਿੱਤਾ ਹੈ ਇਸ ਲਈ ਉਹ ਇਸ ਮੁੱਦੇ ਨੂੰ ਘਰ ਵਿਚ ਸੁਲਝਾ ਲੈਣ ਤਾਂ ਚੰਗਾ ਹੈ , ਜਨਤਾ ਵਿੱਚ ਇਹ ਮਾਮਲਾ ਆਉਣ ਤੇ ਪਰਿਵਾਰ ਅਤੇ ਦੂਲੋ ਲਈ ਇਹ ਮਾਮਲਾ ਹੋਰ ਵੀ ਔਖਾ ਹੋ ਜਾਵੇਗਾ |

5.. ਕਾਨਪੁਰ ਦੇ ਵਿੱਚ ਹੋਇਆ ਵੱਡਾ ਰੇਲ ਹਾਦਸਾ - ਰੇਲਗੱਡੀ ਪਟੜੀ ਤੋਂ ਹੇਠਾਂ ਉਤਰੀ , 30 ਲੋਕ ਹੋਏ ਜ਼ਖਮੀ

ਹਾਵੜਾ ਤੋਂ ਨਵੀਂ ਦਿੱਲੀ ਤੱਕ ਜਾ ਰਹੀ ਪੂਰਬੀ ਜਾਵਾ ਐਕਸਪ੍ਰੈਸ ਦੇ 12 ਕੋਚ ਪਟੜੀ ਤੋਂ ਉਤਰ ਗਏ ਹਨ , ਇਸ ਵਿੱਚ 30 ਲੋਕ ਜ਼ਖ਼ਮੀ ਹੋਏ ਹਨ , ਇਹ ਹਾਦਸਾ ਕਾਨਪੁਰ ਦੇ ਰੂਮਾ ਪਿੰਡ ਦੇ ਨੇੜੇ ਹੋਇਆ ਹੈ , ਯਾਤਰੀਆਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਪਹਿਲਾ ਇਕ ਉੱਚੀ ਅਵਾਜ਼ ਸੁਣੀ ਜਿਸ ਤੋਂ ਬਾਅਦ ਰੇਲ ਦੇ ਕੋਚ ਵੱਖਰੇ ਹੋ ਗਏ , ਕਾਨਪੁਰ ਡੀਐਮ ਵਿਜੇ ਪੰਤ ਨੇ ਕਿਹਾ ਕਿ ਜ਼ਖ਼ਮੀ ਹੂਏ ਵਿਅਕਤੀਆਂ ਨੂੰ ਹਸਪਤਾਲ ਭੇਜਿਆ ਗਿਆ ਹੈ , ਦੁਰਘਟਨਾ ਦੇ ਕਾਰਨ ਦਾ ਹਾਲੇ ਤੱਕ ਪਤਾ ਨਹੀਂ ਲੱਗਿਆ ਹੈ , ਫਿਲਹਾਲ ਮਾਮਲੇ ਦੀ ਜਾਂਚ ਚੱਲ ਰਹੀ ਹੈ |

ਹੋਰਨਾਂ ਤੇਜ਼ ਖਬਰਾਂ ਲਈ ਜੁੜੇ ਰਹੇ ਕੈਨੇਡੀਅਨ ਮੀਡੀਆ - ਯੂਨਾਈਟਿਡ ਐਨ ਆਰ ਆਈ ਪੋਸਟ ਦੇ ਨਾਲ |